ທ່ານ Goodluck Jonatha ປະທານາທິບໍດີຄົນໃໝ່ຂອງໄນຈີເຣຍ ໄດ້ສາບານຕົວເຂົ້າຮັບ
ຕໍາແໜ່ງເຕັມກໍາໜົດ ສະໄໝທໍາອິດຂອງທ່ານແລ້ວ
ທ່ານໂຈນາທານ ໄດ້ເຂົ້າພິທີຮັບຕໍາແໜ່ງທີ່ນະຄອນຫລວງ Abuja ໃນວັນອາທິດມື້ນີ້ ຊ້ອງ ໜ້າບຸກຄົນສໍາຄັນຫລາຍພັນຄົນ ໂຮມທັງພວກຜູ້ນໍາຫລາຍໆປະເທດຈາກຂົງເຂດອາຟຣິກາ
ພາລະກິດທ້າທາຍຂອງທ່ານໂຈນາທານ ກໍຄືການທ້ອນໂຮມຊາດໃຫ້ເປັນອັນນຶ່ງອັນດຽວກັນ ທີ່ໄດ້ຖືກແຕກແຍກຍ້ອນການກໍ່ຈະລາຈົນຫລັງການເລືອກຕັ້ງເມື່ອເດືອນຜ່ານມາ ທີ່ຍັງຜົນໃຫ້ ມີຜູ້ເສຍຊີວິດຫລາຍກວ່າ 800 ຄົນ ທ່ານໂຈນາທານ ໄດ້ຖືກເລືອກຕັ້ງໃນເດືອນເມສາ ຜ່ານມາ ໃນການປ່ອນບັດທີ່ຝ່າຍຄ້ານທ້າທາຍວ່າ ມີການໂກງບັດເລືອກຕັ້ງນັ້ນ.
ທ່ານໂຈນາທານ ໄດ້ເຂົ້າມາກໍາອໍານາດເປັນເທື່ອທໍາອິດເມື່ອເດືອນພຶດສະພາປີຜ່ານມາ ຫລັງ ຈາກການເສຍຊີວິດຂອງປະທານາທິບໍດີ Umaru Yar’ Adua ຊຶ່ງເປັນຊາວມູສລິມ ຈາກ ພາກເໜືອຂອງປະເທດ ທີ່ເສຍຊີວິດຫລັງໄດ້ເຂົ້າຮັບຕໍາແໜ່ງບໍ່ຮອດສາມປີຊໍ້າ.
ການໂຄສະນາຫາສຽງເລືອກຕັ້ງຂອງທ່ານໂຈນາທານ ແມ່ນຖືກຄັດຄ້ານໂດຍພວກຊາວ ມູສລິມ ຈາກພາກເໜືອຂອງປະເທດ ທີ່ພາກັນຄິດວ່າຜູ້ທີ່ຈະຂື້ນມາຮັບຕໍາແໜ່ງສືບແທນ ທ່ານ Yar’Adua ນັ້ນ ຄວນຈະເປັນຊາວມູສລິມເຊັ່ນກັນ.
