ໄນຈີເຣຍ ໄດ້ປະກາດເລື່ອນ ການເລືອກຕັ້ງເອົາປະທານາທິບໍດີ
ອອກໄປ 6 ອາທິດ ຈາກວັນທີ 14 ກຸມພາ ໄປເປັນວັນທີ 28 ມີນາ
ຍ້ອນຄວາມກັງວົນເລື້ອງຄວາມປອດໄພ ແລະການກະບົດຂອງ
ພວກຫົວຮຸນແຮງ Boko Haram.
ຫົວໜ້າຄະນະກຳມະການ ເລືອກຕັ້ງອິດສະຫລະແຫ່ງຊາດ
ທ່ານ Attahiru Jega ກ່າວຖະແຫລງຕໍ່ກອງປະຊຸມນັກຂ່າວ
ໃນວັນເສົາວານນີ້ວ່າ “ຖ້າຫາກຄວາມປອດໄພ ຂອງບັນດາ
ພະນັກງານ ບັນດາຜູ້ປ່ອນບັດ ບັນດາຜູ້ສັງເກດການ
ເລືອກຕັ້ງ ແລະວັດຖຸເລືອກຕັ້ງຕ່າງໆ ບໍ່ສາມາດຮັບປະ
ກັນໄດ້ແລ້ວ ຊີວິດຂອງພວກຊາຍໜຸ່ມ ແລະຍິງສາວ
ຜູ້ບໍລິສຸດ ແລະໂອກາດທີ່ຈະມີການເລືອກຕັ້ງ ທີ່ເສລີ ຍຸດຕິທຳ ແລະ ເຊື່ອຖືໄດ້
ກໍແມ່ນຈະຕົກຢູ່ໃນສະພາບ ທີ່ອັນຕະລາຍຢ່າງໃຫຍ່ຫລວງ.”
ພວກຫົວຮຸນແຮງ Boko Haram ຄວບຄຸມເນື້ອທີ່ສ່ວນໃຫຍ່ ໃນພາກຕາເວັນອອກສຽງ
ເໜືອ ຂອງໄນຈີເຣຍ. ບັນດານັກຊ່ຽວຊານ ກ່າວວ່າ ການດຳເນີນການປ່ອນບັດເລືອກຕັ້ງ
ຢ່າງສັນຕິ ໃນເຂດດັ່ງກ່າວນັ້ນ ແມ່ນຈະເປັນໄປໄດ້ຍາກ.
ຊາວໄນຈີເຣຍ ປະທ້ວງ ການເລືອກຕັ້ງ
ເຖິງຢ່າງໃດກໍຕາມ ລັດຖະມົນຕີຕ່າງປະເທດສະຫະລັດ ທ່ານ John Kerry ກ່າວໃນຄຳ
ຖະແຫລງສະບັບນຶ່ງວ່າ ວໍຊິງຕັນ ແມ່ນ “ຜິດຫວັງຢ່າງເລິກເຊິ່ງ” ນຳການຕັດສິນໃຈຂອງ
ໄນຈີເຣຍ ທີ່ເລື່ອນການເລືອກຕັ້ງອອກໄປນັ້ນ. ທ່ານ Kerry ກ່າວອີກວ່າ “ການແຊກ
ແຊງທາງການເມືອງ ຕໍ່ຄະນະກຳມະການເລືອກຕັ້ງອິດສະຫລະແຫ່ງຊາດ ແມ່ນ
ຮັບເອົາບໍ່ໄດ້. ມັນມີຄວາມສຳຄັນສູງ ທີ່ລັດຖະບານຕ້ອງບໍ່ໃຊ້ເລື້ອງຄວາມກັງວົນ
ນຳຄວາມປອດໄພ ມາເປັນຂໍ້ອ້າງ ໃນການຂັດຂວາງຂັ້ນຕອນ ຂອງປະຊາທິປະໄຕ.”
