ລິ້ງ ສຳຫລັບເຂົ້າຫາ

ປະຊາຊົນໄນຈີເຣຍ ໄປປ່ອນບັດເລືອກຕັ້ງ ສະພາແຫ່ງຊາດ

  • ໄພສານ ວໍຣະຈັກ

ຊາວໄນຈີເຣຍ ເຂົ້າແຖວປ່ອນບັດ ເລືອກຕັ້ງສະພາແຫ່ງຊາດ (9 ເມສາ 2011)

ປະຊາຊົນໄນຈີເຣຍ ພວມພາກັນໄປປ່ອນບັດເລືອກຕັ້ງ
ສະພາແຫ່ງຊາດຊຸດໃໝ່ໃນວັນເສົາມື້ນີ້ ຖ້າມກາງການ
ຮັກສາຄວາມປອດໄພຢ່າງເຄັ່ງຄັດລຸນຫຼັງທີ່ໄດ້ເກີດເຫດ
ລະເບີດທີ່ສຳນັກງານຄະນະກຳມະການເລືອກຕັ້ງ.

ເຫດລະເບີດ ທີ່ສຳນັກງານຄະນະກຳມະການເລືອກຕັ້ງ
ແຫ່ງຊາດທີ່ເປັນອິດສະຫຼະໃນຕອນແລງຂອງມື້ວັນສຸກ
ວານນີ້ໃກ້ໆນະຄອນຫຼວງອາບູຈານັ້ນ ເຮັດໃຫ້ມີຜູ້ເສຍ
ຊີວິດຢ່າງນ້ອຍ 8 ຄົນ.

ນອກນັ້ນຍັງມີຜູ້ໄດ້ຮັບບາດເຈັບອີກຫຼາຍໆຄົນໃນເຫດ
ລະເບີດທີ່ເມືອງ Suleja. ອົງການຂ່າວຝຣັ່ງລາຍງານ
ວ່າ ການປ່ອນບັດທີ່ເມືອງ Suleja ໄດ້ຖືກເລື່ອນເວລາ
ອອກໄປ.

ໄນຈີເຣຍໄດ້ເລື່ອນເວລາໃນການເລືອກຕັ້ງສະພາແຫ່ງຊາດມາແລ້ວ 2 ເທື່ອ. ການປ່ອນບັດ
ໃນສັບປະດາແລ້ວໄດ້ຖືກຍົກເລີກຍ້ອນອຸບປະກອນແລະເອກກະສານໃນການປ່ອນບໍ່ມີພຽງ
ພໍ.

ທີ່ລັດ Borno ຕຳຫຼວດເວົ້າວ່າ ມືປືນໄດ້ຍິງສັງຫານ 4 ຄົນໃນຕອນແລງຂອງມື້ວານນີ້ຂະ
ນະທີ່ພວກເຂົາເຈົ້າ ພວມກະກຽມແຈກຢາຍອຸບປະກອນ ແລະເອກກະສານກ່ຽວກັບການ
ປ່ອນບັດ. ຕຳຫຼວດເວົ້າວ່າ ນຶ່ງໃນພວກທີ່ເສຍຊີວິດແມ່ນເຈົ້າໜ້າທີ່ຂອງພັກປະຊາທິປະໄຕ
ປະຊາຊົນ ຊຶ່ງເປັນພັກລັດຖະບານປົກຄອງປະເທດໄນຈີເຣຍຢູ່ໃນເວລານີ້.

ໄນຈີເຣຍໄດ້ເພີ່ມມາດຕະການຮັກສາຄວາມປອດໄພກ່ອນການປ່ອນບັດໃນວັນເສົາມື້ນີ້ໂດຍ
ທີ່ກະຊວງພາຍໃນ ໄດ້ສັ່ງໃຫ້ອັດດ່ານຂ້າມຊາຍແດນທາງບົກ ຂອງປະເທດທັງໝົດ ຂະນະທີ່
ຕຳຫຼວດໄດ້ສົ່ງກຳລັງເພີ່ມຕື່ມອອກໄປລາດຕະເວນຢູ່ຕາມຖະໜົນຫົນທາງແລະເລີ້ມກວດ
ກາຍວດຍານພາຫະນະ ທີ່ສັນຈອນໄປມາ. ນອກນັ້ນ ພວກທະຫານຍັງໄດ້ພາກັນຍາມ ຢູ່
ຕາມໜ່ວຍປ່ອນບັດຕ່າງໆ.

ໃນມື້ວັນພະຫັດຜ່ານມານີ້ຄະນະກຳມະການເລືອກຕັ້ງກ່າວວ່າ ບັດທີ່ຈະປ່ອນຍັງມີການ
ຂາດແຄນ ຢູ່ໃນບາງເຂດ ດັ່ງນັ້ນການປ່ອນບັດ ຈະບໍ່ມີຂຶ້ນຢູ່ໃນປະມານ 15% ຂອງເຂດ
ເລືອກຕັ້ງຢູ່ໃນໄນຈີເຣຍ. ປະທານຄະນະກຳມະການເລືອກຕັ້ງບໍ່ໄດ້ແຈ້ງໃຫ້ຊາບວ່າ ເວລາ
ໃດການປ່ອນບັດຢູ່ໃນເຂດເຫຼົ່ານີ້ຈຶ່ງຈະມີຂຶ້ນ.

ມີກຳນົດວ່າ ໄນຈີເຣຍຈະຈັດການເລືອກຕັ້ງປະທານາທິບໍດີ ໃນວັນທີ 16 ເດືອນນີ້ ແລະ
ການເລືອກຕັ້ງລະດັບລັດຈະມີຂຶ້ນວັນທີ 26 ຂອງເດືອນນີ້ຄືກັນ.

XS
SM
MD
LG