ທະຫານໄນຈີເຣຍ ກ່າວວ່າ ຕົນໄດ້ບຸກເຂົ້າໄປຊ່ວຍພວກຜູ້
ຍິງ ແລະເດັກນ້ອຍ 234 ຄົນ ທີ່ໄດ້ຖືກລັກພາໂຕໄປ ໂດຍ
ພວກຫົວຮຸນແຮງ Boko Haram ຢູ່ທາງພາກຕາເວັນອອກ
ສຽງເໜືອ ຂອງປະເທດ.
ເຈົ້າໜ້າທີ່ທະຫານຄົນນຶ່ງ ກ່າວວ່າ ການກູ້ໄພເທື່ອຫລ້າສຸດ
ນີ້ ມີຂື້ນໃນວັນພະຫັດທີ່ຜ່ານມາ ຢູ່ໃນປ່າ Sambisa.
ຖະແຫລງການສະບັບນຶ່ງກ່າວວ່າ “ການປະຕິບັດງານດັ່ງ
ກ່າວ ແມ່ນໄດ້ຊ່ວຍ ສ່ວນບຸກຄົນ ເພີ້ມເຕີມໃສ່ການກູ້ໄພ
ກ່ອນໜ້ານີ້ ໃນລະຫວ່າງການປະຕິບັດງານຢູ່ໃນຂົງເຂດ
ທີ່ກຳລັງດຳເນີນຕໍ່ໄປ”.
ທະຫານຍັງໄດ້ກ່າວຕໍ່ໄປອີກວ່າ “ການບຸກໂຈມຕີຢູ່ໃນປ່າ ແມ່ນການສືບຕໍ່ໂຈມ ຕີຈາກຫລາຍທິດທາງ ແລະຄວາມພະຍາຍາມແມ່ນສຸມໃສ່ການກູ້ໄພຊ່ວຍເອົາ ໂຕປະກັນອອກ
ມາ ແລະທຳລາຍຄ້າຍຂອງພວກກໍ່ການຮ້າຍ ແລະສະຖານທີ່ ຕ່າງໆທັງໝົດ ຢູ່ໃນປ່າ
ດັ່ງກ່າວ.”
ໃນຕົ້ນອາທິດນີ້ ພວກໂຕປະກັນໃນຈຳນວນເທົ່າໆກັນ ກໍໄດ້ຖືກຊ່ວຍອອກມາ ຈາກປ່າ
ແຫ່ງດຽວກັນນີ້. ເດັກນ້ອຍຜູ້ຍິງ ແລະຜູ້ຍິງຫລາຍຮ້ອຍຄົນ ບັດນີ້ມີລາຍງານວ່າ ໄດ້ກັບ
ຄືນມາດ້ວຍຄວາມປອດໄພແລ້ວ ໃນອາທິດທີ່ຜ່ານມາ.
ມັນຍັງບໍ່ເປັນທີ່ແຈ້ງຂາວເທື່ອວ່າ ການຊ່ວຍເຫລືອພວກຜູ້ຍິງອອກມາແມ່ນຮວມ ທັງພວກ
ນັກຮຽນຜູ້ຍິງ ທີ່ໄດ້ຖືກລັກພາໂຕໄປ ຈາກໂຮງຮຽນກິນນອນທີ່ເມືອງ Chibok ເມື່ອນຶ່ງປີ
ກ່ອນນັ້ນຫລືບໍ່. ການລັກພາໂຕດັ່ງກ່າວ ໄດ້ເປັນຈຸດສົນໃຈ ແລະໂກດແຄ້ນແກ່ຊາວໂລກ
ເປັນສ່ວນໃຫຍ່ ແລະມີທ່າທາງວ່າໄດ້ເຮັດໃຫ້ ປະ ທານາທິບໍດີ Goodluck Jonatha
ເສຍໄຊການປ່ອນບັດເລືອກຕັ້ງຫວ່າງມໍ່ໆມານີ້.
ທ່ານ Jonathan ຊຶ່ງສະໄໝການດຳລົງຕຳແໜ່ງຂອງທ່ານສີ້ນສຸດລົງໃນເດືອນນີ້ ກ່າວວ່າ
ປ່າເປັນບ່ອນລີ້ຊ່ອນສຸດທ້າຍຂອງພວກຫົວຮຸນແຮງອິສລາມ ແລະໄດ້ໃຫ້ຄຳໝັ້ນສັນຍາທີ່
ຈະ “ເຮັດໃຫ້ ໄນຈີເຣຍ ປາດສະຈາກທີ່ໝັ້ນອັນເຂັ້ມແຂງຂອງການກໍ່ການຮ້າຍທັງໝົດ.”
ຊື່ Boko Haram ໝາຍຄວາມວ່າ “ການສຶກສາຂອງຕາເວັນຕົກເປັນບາບ”. ພວກຜູ້ຍິງ
ຫລາຍຄົນທີ່ຖືກກັກຂັງ ໄດ້ຖືກໃຊ້ເປັນຂ້າທາດທາງເພດ ແລະໃຊ້ເປັນເຄື່ອງກຳບັງ
ຕໍ່ການໂຈມຕີ.
