ອະດີດຜູ້ນໍາກຸ່ມຫົວຮຸນແຮງຂອງໄນຈີເຣຍກຸ່ມນຶ່ງໄດ້ປະ ຕິເສດຕໍ່ການມີສ່ວນພົວພັນໃນເຫດການລະເບີດ ທີ່ຍັງ ຜົນໃຫ້ມີຜ້ເສຍຊີວິດ 12 ຄົນ ຢູ່ໃກ້ໆ ສະຖານທີ່ ສະເຫລີມສະຫລອງວັນເອກກະລາດໃນເມືອງຫລວງ ຂອງໄນຈີເຣຍ ເມື່ອວັນສຸກຜ່ານມານັ້ນ.
ທະນາຍຄວາມຂອງນາຍ Henry Okah ຜູ້ທີ່ຖືກຈັບກຸມ ໃນປະເທດອາຟຣິກາໃຕ້ ໃນວັນເສົາວານນີ້ ກ່າວວ່າ ລູກຄວາມຂອງຕົນປະຕິເສດວ່າຕົນບໍ່ໄດ້ມີຄວາມຜິດໃນການກໍ່ອາຊຍາກຳໃດໆ ບໍ່ວ່າຢູ່ໃນປະເທດອາຟຣິກາໃຕ້ຫລືແຫ່ງອື່ນໃດເລີຍ. ທະນາຍຄວາມ Piet du Plessis ກ່າວວ່າ ການຈັບກຸມ ນາຍໂອກາ ນັ້ນແມ່ນບໍ່ມີເຫດຜົນອັນສົມຄວນໃດໆເລີຍ ແລະເປັນຄວາມພະຍາຍາມແບບບໍ່ມີການໄກ່ກອງ ເພື່ອເອົາໃຈພວກເຈົ້າໜ້າທີ່ໄນຈີເຣຍເທົ່ານັ້ນ.
ເຊື່ອກັນວ່າ ນາຍ Henry Okah ເປັນອະດີດຜູ້ນໍາຂອງກຸ່ມຂະບວນການເພື່ອການ ປົດປ່ອຍເຂດສາມຫລ່ຽມປາກແມ່ນໍ້າ Niger ຫລື MEND ທີ່ໄດ້ອ້າງເອົາຄວາມ ຮັບຜິດຊອບໃນເຫດການລະເບີດດັ່ງກ່າວ.
ຖະແຫລງການສະບັບນຶ່ງຂອງຂະບວນການ MEND ທີ່ອອກເມື່ອວັນເສົາວານນີ້ ເວົ້າວ່າ ນາຍ ໂອກາ ບໍ່ເຄີຍມີສ່ວນພົວພັນໃນການປະຕິບັດການ ໃດໆຂອງກຸ່ມດັ່ງກ່າວ. ຂະບວນການ MEND ກ່າວວ່າ “ທ່າທີທີ່ຂາດຄວາມຮັບຜິດຊອບ” ຂອງເຈົ້າໜ້າທີ່ຮັກສາ ຄວາມປອດໄພ ແມ່ນເປັນສາເຫດ ຂອງການສູນ ເສຍຊີວິດໃນຄັ້ງນີ້. ກຸ່ມດັ່ງກ່າວເວົ້າອີກວ່າ ພວກຕົນໄດ້ປະກາດໃຫ້ທາງລັດຖະບານໄນຈີເຣຍຮູ້ຫ້າມື້ລ່ວງໜ້າ ກ່ອນຈະທໍາການໂຈມຕີ.