ມີລາຍງານຂ່າວທີ່ຂັດແຍ້ງກັນກ່ຽວກັບວ່າ ຂະບວນລົດຂະໜາດໃຫຍ່ ຈຸນຶ່ງທີ່ບັນທຸກກໍາລັງທີ່ຈົງຮັກພັກດີຕໍ່ທ່ານມວມມາກາດດາຟີຜູ້ນໍາລີເບຍທີ່ໄດ້ຖືກປົດອອກຈາກອໍານາດໄປນັ້ນໄດ້ຂ້າມຊາຍແດນເຂົ້າໄປໃນປະເທດເພື່ອນບ້ານໄນເຈີນັ້ນແທ້ຫລືບໍ?.
ໃນແລງວັນອັງຄານວານນີ້ ພວກເຈົ້າໜ້າທີ່ລະດັບສູງ 3 ທ່ານຈາກໄນເຈີ ໄດ້ປະຕິເສດຕໍ່ລາຍງານສື່ມວນຊົນທີ່ວ່າ ມີລົດທະຫານຈໍານວນຫລາຍກວ່າ 200 ຄັນຈາກລີເບຍໄດ້ຂ້າມຊາຍແດນເຂົ້າໄປຍັງໄນເຈີນັ້ນ ໂດຍກ່າວວ່າ ມີລົດນ້ອຍພຽງ 3 ຄັນເທົ່ານັ້ນໄດ້ຂ້າມຊາຍແດນເຂົ້າໄປ.
ໜັງສືພິມ New York Times ອ້າງຄໍາເວົ້າຂອງທ່ານ Marou Amadou ລັດຖະມົນຕີກະຊວງຍຸຕິທໍາຂອງໄນເຈີວ່າ ຂະບວນລົດດັ່ງກ່າວມີລົດພຽງແຕ່ 3 ຄັນເປັນຢ່າງຫລາຍ ແລະກໍບໍ່ໄດ້ຕິດອາວຸດໃດໆ. ທ່ານ Mansour Dhao ຫົວໜ້າກອງພົນນ້ອຍຮັກສາຄວາມປອດໄພສໍາລັບທ່ານກາດດາຟີແລະພວກເພື່ອນຮ່ວມງານຫລາຍຄົນເທົ່ານັ້ນທີ່ຮູ້ຈັກກັນວ່າເປັນພວກຜູ້ຄົນທີ່ໄດ້ຂ້າມຊາຍແດນເຂົ້າໄປຍັງໄນເຈີນັ້ນ.
ອົງການຂ່າວ AP ອ້າງຄໍາເວົ້າຂອງຫົວໜ້າກອງເລຂາປະຈໍາທໍານຽບປະທານາທິບໍດີໄນເຈີ ວ່າ ເວລາທ່ານ Dhao ຂ້າມຊາຍແດນເຂົ້າໄປ ທ່ານກໍໄດ້ຖືກນໍາສົ່ງໄປຍັງເມືອງ Niamey ແລະເວລານີ້ກໍາລັງພັກຢູ່ໃນບ້ານພັກແຫ່ງນຶ່ງພາຍໃຕ້ການຄວບຄຸມດູແລຢູ່ຕະຫຼອດເວລານັ້ນ.
ກ່ອນໜ້ານີ້ ກະຊວງການຕ່າງປະເທດສະຫະລັດກ່າວວ່າ ພວກຍານພາຫະນະຈໍານວນນຶ່ງທີ່ບັນທຸກຄະນະນໍາພາຂັ້ນສູງຈໍານວນສິບກວ່າຄົນຫລືຫຼາຍກວ່ານັ້ນຈາກວົງການລັດຖະບານທ່ານກາດດາຟີ ຮວມທັງພວກຜູ້ບັນຊາການທະຫານຕ່າງໆ ແລ່ນມຸ້ງໜ້າໄປສູ່ນະຄອນຫລວງ Niamey ຂອງໄນເຈີນັ້ນ. ທ່ານນາງ Victoria Nuland ໂຄສົກປະຈໍາກະຊວງການຕ່າງປະເທດສະຫະລັດກ່າວວ່າ ທ່ານກາດດາຟີເອງນັ້ນບໍ່ຢູ່ໃນຂະບວນລົດດັ່ງກ່າວ ຊຶ່ງເປັນການຢືນຢັນຕໍ່ຖ້ອຍຖະແຫລງກ່ອນໜ້ານີ້ຈາກລັດຖະມົນຕີຕ່າງປະເທດຂອງໄນເຈີນັ້ນ.
