ໃນວັນສຸກມື້ນີ້ ພະສັນຕະປາປາ ແຟຣນຊິສ ໄດ້ຊົງທໍາການບວດຄຸນພໍ່ 16 ອົງ ຢູ່
ໃນການປະກອບພິທີທາງສາສະໜາ ກາງແຈ້ງຄັ້ງໃຫຍ່ ທີ່ນະຄອນຫລວງຂອງ
ບັງກລາແດັສ.
ປະມານ 100,000 ຄົນ ໄດ້ເຂົ້າຮ່ວມ ໃນການປະກອບພິທີທາງສາສະໜາດັ່ງ
ກ່າວ ຢູ່ໃນສວນສາທາລະນະຊຸຣາວະດີອຸເດືອນ (Suhrawardy Udyan) ໃນ
ນະຄອນດາກາ (Dhaka).
ຫລັງຈາກນັ້ນ ຜູ້ນໍາທາງສາສະໜາໂຣມັນກາໂຕລິກ ມີກໍານົດທີ່ຈະພົບກັບອົບພະຍົບ
ຊາວໂຣຮິງຢາ ທີ່ໄດ້ຫລົບໜີຈາກມຽນມາ ໄປຢູ່ບັງກລາແດັສ.
ພະອົງໄດ້ຊົງໃຊ້ເວລາປະພາດມຽນມາຢູ່ສີ່ວັນກ່ອນຈະຊົງສະເດັດໄປຍັງບັງກລາແດັສ
ໃນວັນພະຫັດວານນີ້.
ພະອົງຖືກຕໍາໜິຈາກພວກນັກເຄື່ອນໄຫວດ້ານສິດທິມະນຸດ ວ່າບໍ່ໄດ້ເອີ່ຍເຖິງ ຊາວ
ໂຣຮິງຢາເປັນການສະເພາະເລີຍ ໃນເວລາທີ່ພະອົງຢູ່ໃນມຽນມານັ້ນ.
ຊາວໂຣຮິງຢາເປັນຊົນກຸ່ມນ້ອຍ ທີ່ຖືກກີດກັນໃນດ້ານສິດທິຂັ້ນພື້ນຖານ ມາໄດ້
ຫຼາຍທົດສະວັດແລ້ວຢູ່ໃນປະເທດມຽນມາ ທີ່ເປັນປະເທດນັບຖືສາສາໜາພຸດເປັນ
ສ່ວນໃຫຍ່ ທີ່ເບິ່ງພວກເຂົາເຈົ້າວ່າເປັນພວກຍົກຍ້າຍຖິ່ນຖານມາຈາກປະເທດ
ບັງກລາແດັສ ເຖິງແມ່ນວ່າ ຕາມຄວາມຈິງແລ້ວ ຊາວໂຣຮິງຢາຫຼາຍໆຄອບຄົວໄດ້
ຕັ້ງຖິ່ນຖານຢູ່ໃນມຽນມາ ໄດ້ຫຼາຍຊົ່ວລຸ້ນຄົນມາແລ້ວກໍຕາມ.
ສະຖານະການຂອງພວກເຂົາເຈົ້າ ໄດ້ຮ້າຍແຮງຂຶ້ນ ຕັ້ງແຕ່ເດືອນສິງຫາ ເປັນຕົ້ນມາ ເວລາທີ່ກອງທັບຂອງມຽນມາ ໄດ້ເລີ່ມປະຕິບັດການຈູດເຜົາບ້ານເຮືອນທັງຫລາຍ
ຂອງຊາວໂຣຮິງຢາ ຢູ່ທີ່ລັດຣາໄຄນ໌ທາງພາກເໜືອຂອງປະເທດ ເພື່ອເປັນການ
ຕອບໂຕ້ ຕໍ່ການໂຈມຕີປ້ອມຕຳຫຼວດຂອງມຽນມາໂດຍພວກຫົວຮຸນແຮງໂຣຮິງຢາ. ການປະຕິບັດທີ່ໂຫດຮ້າຍທາລຸນດັ່ງກ່າວ ຊຶ່ງລວມທັງ ການລາຍງານຂອງການ
ຂົ່ມຂືນໝູ່ ແລະການສັງຫານແບບບໍ່ເລືອກໜ້າ ທີ່ກໍ່ໃຫ້ເກີດ ມີການຫລັ່ງໄຫລຂອງ
ຊາວໂຣຮິງຢາ ຫຼາຍກວ່າ 620,000 ຄົນເຂົ້າໄປໃນປະເທດບັງກລາແດັສ ເຊິ່ງອົງ
ການສະຫະປະຊາຊາດ ໄດ້ໃຫ້ຄໍາເຫັນວ່າ ເປັນ “ແບບສະບັບຂອງຕົວຢ່າງໃນ
ການຂ້າລ້າງຊົນຊາດຊົນເຜົ່າ.”
ພະສັນຕະປາປາ ໄດ້ຊົງກ່າວປະນາມ ການກະທຳຕໍ່ພວກຊາວໂຣຮິງຢາ ຢູ່ໃນການ
ໃຫ້ຄຳໂອວາດ ຕໍ່ມະຫາຊົນກ່ອນໜ້ານີ້ແລ້ວ ແຕ່ບັນດາທີ່ປຶກສາຂອງພະອົງ ໄດ້
ແນະນຳ ບໍ່ໃຫ້ພະອົງເວົ້າຫຍັງກ່ຽວກັບບັນຫາດັ່ງກ່າວ ໃນຂະນະທີ່ຢູ່ໃນມຽນມາ
ເພາະຢ້ານວ່າ ຈະເກີດເຫດການທີ່ບໍ່ດີຕໍ່ຊາວກາໂຕລິກ 650,000 ຄົນ ຢູ່ໃນປະເທດ
ດັ່ງກ່າວ.
ພະສັງຄະລາດ ຈອນ ຫາສານ ຈີ ຂອງມຽນມາ ໄດ້ຊົງໃຫ້ຄຳເຫັນທີ່ນອກເໜືອໄປກວ່າ
ນັ້ນ ໃນວັນພຸດຜ່ານມານີ້ ໂດຍຕັ້ງຂໍ້ສົງໄສກ່ຽວກັບລາຍງານຂອງການກຳທຳໂຫດຮ້າຍ
ທາລຸນຕໍ່ຊາວໂຣຮິງຢາ ແລະຮຽກຮ້ອງໃຫ້ພວກວິຈານລັດ ຖະບານ ມຽນມາໃຫ້ໄປຍັງ
ສະຖານທີ່ເກີດເຫດ “ເພື່ອສຶກສາເບິ່ງຄວາມເປັນຈິງ ແລະປະຫວັດສາດ” ຂອງບັນຫາ ແລະຮຽນຮູ້ເຖິງຄວາມເປັນຈິງ.
ສ່ວນໂຄສົກ ຂອງວັງວາຕິກັງ ທ່ານ ເກຣກ ເບີກ (Greg Burke) ໄດ້ກ່າວ ໃນວັນພຸດ
ມື້ວານນີ້ ວ່າ ພະສັນຕະປາປາ ແຟຣນຊິສ ບໍ່ໄດ້ສູນເສຍ “ອຳນາດສິນລະທຳ” ຂອງ
ພະອົງ ຕໍ່ບັນຫາດັ່ງກ່າວ ແລະ ໄດ້ສະເໜີແນະວ່າ ພະອົງ ອາດໄດ້ເວົ້າໄປຢ່າງກົງໄປ
ຫຼາຍແລ້ວ ໃນລະຫວ່າງການເຈລະຈາເປັນສ່ວນຕົວ ກັບຜູ້ນຳທີ່ແທ້ຈິງຂອງມຽນມາ
ທ່ານນາງ ອອງ ຊານ ຊູ ຈີ ແລະ ຜູ້ບັນຊາການກອງທັບທີ່ມີອຳນາດສູງສຸດ ທ່ານ ມິນ
ອ່ອງ ແລັງ.
ອ່ານຂ່າວນີ້ເພີ້ມເປັນພາສາອັງກິດ
