ລິ້ງ ສຳຫລັບເຂົ້າຫາ

ວັນພະຫັດ, ໒໙ ກຸມພາ ໒໐໒໔

ນາຍົກລັດຖະມົນຕີ ຄົນໃໝ່ຂອງ ລາວ ຢືນຢັນວ່າ ປະເທດ ກຳລັງກ້າວ ໄປສູ່ ສັງຄົມນິຍົມ


ນາຍົກລັດຖະມົນຕີ ລາວ ທ່ານ ທອງລຸນ ສີສຸລິດ ກ່າວຄຳປາໄສໃນລະຫວ່າງກອງປະຊຸມສະພາແຫ່ງຊາດ.
ນາຍົກລັດຖະມົນຕີ ລາວ ທ່ານ ທອງລຸນ ສີສຸລິດ ກ່າວຄຳປາໄສໃນລະຫວ່າງກອງປະຊຸມສະພາແຫ່ງຊາດ.

ນາຍົກລັດຖະມົນຕີຄົນໃໝ່ຂອງ ລາວ ຢືນຢັນວ່າກາພັດທະນາປະເທດ ລາວ ໃນໄລຍະ 5 ປີຕໍ່ໄປນີ້ຍັງຈະຢືນຢູ່ບົນເປົ້າໝາຍການພັດທະນາປະເທດຊາດໄປສູ່ສັງຄົມນິຍົມໃຫ້ໄດ້ໃນ ທີ່ສຸດ.

ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກປະຊາຊົນປະຕິວັດ ລາວ ໄດ້ ໃຫ້ຄຳໝັ້ນຕໍ່ກອງປະຊຸມສະໄໝສາມັນຄັ້ງປະຖົມມະເລີກຂອງ ສະພາແຫ່ງຊາດ ລາວ ຊຸດ ທີ 8 ຫຼັງຈາກທີ່ທ່ານໄດ້ຮັບການເລືອກຕັ້ງໃຫ້ເປັນນາຍົກລັດຖະມົນຕີຄົນໃໝ່ຂອງ ລາວ ຢ່າງເປັນທາງການໃນວັນທີ 20 ເມສາທີ່ຜານມານີ້ ວ່າທ່ານຈະປະຕິບັດໜ້າທີ່ຢ່າງຊື່ສັດ ແລະ ໂປ່ງໄສໃນທຸກວຽກງານ ແລະ ໄດ້ຮຽກຮ້ອງໃຫ້ບັນດາສະມາຊິກສະພາແຫ່ງຊາດ ລາວ ຊຸດທີ 8 ຈົ່ງໄດ້ກວດສອບການຈັດຕັ້ງປະຕິບັດ ແລະ ປະກອບຄວາມຄິດຄວາມເຫັນ ໃນທຸກວຽກງານຂອງລັດຖະບານຢ່າງສ້າງສັນເພື່ອແນໃສ່ການ ການພັດທະນາປະເທດ ລາວ ໃຫ້ກ້າວໄປສູ່ສັງຄົມນິຍົມຢ່າງສົມບູນດັ່ງທີ່ທ່ານໄດ້ຢືນຢັນວ່າ.

"ຂ້າພະເຈົ້າຂໍຮຽກຮ້ອງມາຍັງສະມາຊິກສະພາແຫ່ງຊາດ ແລະ ສະພາທ້ອງຖິ່ນຈົ່ງໄດ້ ໃຫ້ການສະໜັບສະໜູນ ຊ່ວຍເຫຼືອເຮັດການກວດກາຢ່າງໃກ້ຊິດ ໃຫ້ຄຳຕຳໜິຕິຊົມທີ່ ສ້າງສັນ ໃຫ້ຄວາມຄິດເຫັນແກ່ລັດຖະບານໄດ້ປະຕິບັດພາລະກິດໃຫ້ມີປະສິດທິຜົນສູງ ແນໃສ່ນຳເອົາປະເທດຊາດຫຼຸດພົ້ນອອກຈາກຄວາມດ້ອຍພັດທະນາ ເຮັດໃຫ້ຄວາມທຸກ ຍາກຂອງປະຊາຊົນໄດ້ຮັບການແກ້ໄຂຢ່າງເປັນຮູບປະທຳ ສ້າງປະເທດຊາດໃຫ້ຮັ່ງມີ ເຂັ້ມແຂງ ປະຊາຊົນໃຫ້ມີຜາສຸກ ສັງຄົມມີປະຊາທິປະໄຕ ຍຸດຕິທຳ ແລະ ສີວິໄລ ກ້າວ ສູ່ຈຸດໝາຍສັງຄົມນິຍົມໃນອະນາຄົດ."

ແຕ່ຢ່າງໃດກໍຕາມ ທ່ານ ທອງລຸນ ກໍບໍ່ໄດ້ໃຫ້ລາຍລະອຽດວ່າ ເປົ້າໝາຍຂອງການກ້າວໄປ ສູ່ການເປັນປະເທດສັງຄົມນິຍົມຢ່າງສົມບູນຂອງ ສປປ ລາວ ນັ້ນຈະເກີດຂຶ້ນໄດ້ຢ່າງແທ້ ຈິງເມື່ອໃດແທ້ ຫາກແຕ່ທ່ານກໍໄດ້ເນັ້ນຢ້ຳທີ່ຈະດຳເນີນທຸກມາດຕະການເພື່ອໃຫ້ບັນລຸເປົ້າ ໝາຍຕາມວິໄສທັດການພັດທະນາ ລາວ ມຸ່ງສູ່ປີ 2030.

ທັງນີ້ກອງປະຊຸມໃຫຍ່ພັກປະຊາຊົນປະຕິວັດ ລາວ ຄັ້ງທີ 10 ທີ່ໄດ້ດຳເນີນການປະຊຸມໃນ ຊ່ວງວັນທີ 18-22 ມັງກອນ 2016 ທີ່ຜ່ານມາໄດ້ຮັບຮອງເອົາວິໄສທັດການພັດທະນາ ລາວ ມຸ່ງສູ່ປີ 2030 ຢ່າງເປັນທາງການພ້ອມດ້ວຍການຮັບຮອງເອົາແຜນຍຸດທະສາດ ການພັດທະນາເສດຖະກິດ ແລະ ສັງຄົມໃນຊ່ວງປີ 2016-2025 ແລະແຜນການພັດທະ ນາເສດຖະກິດສັງຄົມແຫ່ງຊາດໄລຍະ 5 ປີຄັ້ງທີ 8 ໃນຊ່ວງປີ 2016-2020 ໃນໂອກາດ ດຽວກັນ.

ສຳລັບວິໄສທັດການພັດທະນາ ລາວ ມຸ່ງສູ່ປີ 2030 ດັ່ງກ່າວນີ້ ຄະນະກົມການເມືອງສູນ ກາງພັກຊຸດທີ 9 ທີ່ນຳໂດຍ ທ່ານ ຈູມມະລີ ໄຊຍະສອນ ເລຂາທິການໃຫຍ່ພັກ ໄດ້ມີມະ ຕິມອບໝາຍໃຫ້ໜ່ວຍງານຄົ້ນຄວ້າແຜນຍຸດທະສາດການພັດທະນາເສດຖະກິດແຫ່ງ ຊາດທີ່ມີທ່ານ ບົວສອນ ບຸບຜາວັນ ເປັນຫົວໜ້າຄະນະນັ້ນ ໃຫ້ເປັນພາກສ່ວນຮັບຜິດຊອບ ດຳເນີນການຮ່າງ ນັບແຕ່ຕົ້ນປີ 2014 ແລະ ນຳເອົາຮ່າງວິໄສທັດດັ່ງກ່າວນີ້ໄປໃຫ້ສະມາ ຊິກພັກປະກອບຄວາມເຫັນໃນທົ່ວປະເທດ ໃນຕະຫຼອດປີ 2015 ເພື່ອນຳສະເໜີຕໍ່ກອງ ປະຊຸມໃຫຍ່ຄັ້ງທີ 10 ຂອງພັກໃນຄັ້ງດັ່ງກ່າວ.

ໂດຍວິໄສທັດການພັດທະນາ ລາວ ສູ່ປີ 2030 ດັ່ງກ່າວນີ້ຍັງຄົງສືບຕໍ່ເປົ້າໝາຍຂອງພັກ ທີ່ຈະນຳພາປະເທດຊາດໃຫ້ຫຼຸດພົ້ນຈາກສະພາບດ້ອຍພັດທະນາໃຫ້ໄດ້ໃນປີ 2020 ເພື່ອ ຈະຍົກລະດັບໃຫ້ ລາວ ເປັນປະເທດກຳລັງພັດທະນາ ທີ່ປະຊາກອນມີລາຍຮັບໃນລະດັບ ປານກາງໄປຫາສູງ ໃນປີ 2030 ເພື່ອກ້າວໄປສູ່ສັງຄົມນິຍົມໃຫ້ໄດ້ຢ່າງສົມບູນ ໃນອະນາ ຄົດ.

ທາງດ້ານທ່ານ ສົມດີ ດວງດີ ຮອງນາຍົກລັດຖະມົນຕີ ແລະ ລັດຖະມົນຕີວ່າການກະຊວງ ການເງິນຄົນໃໝ່ກໍໄດ້ຢືນຢັນວ່າລັດຖະບານ ລາວ ໄດ້ວາງຄາດໝາຍການພັດທະນາເສດ ຖະກິດ ໃຫ້ຂະຫຍາຍຕົວເພີ່ມຂຶ້ນໃນອັດຕາສະເລ່ຍບໍ່ນ້ອຍກວ່າ 7.5 ເປີເຊັນຕໍ່ປີໃນຕະ ຫຼອດການຈັດຕັ້ງປະຕິບັດແຜນການພັດທະນາເສດຖະກິດ ແລະ ສັງຄົມແຫ່ງຊາດໄລຍະ 5 ປີຄັ້ງທີ 8 ໃນຊ່ວງປີ 2016-2020 ຊຶ່ງຈະເຮັດໃຫ້ມູນຄ່າຜະລິດຕະພັນລວມພາຍໃນ (GDP) ສະເລ່ຍເປັນລາຍຮັບຂອງປະຊາຊົນ ລາວ ໄດ້ເຖິງ 3,100 ໂດລາຕໍ່ຄົນໃນປີ 2020.

ແຕ່ການທີ່ຈະສາມາດບັນລຸເປົ້າໝາຍດັ່ງກ່າວນີ້ໄດ້ຢ່າງແທ້ຈິງນັ້ນກໍຈະຕ້ອງຊຸກຍູ້ໃຫ້ພາກ ກະສິກຳຂະຫຍາຍຕົວເພີ່ມຂຶ້ນ 3.2 ເປີເຊັນຕໍ່ປີ ສ່ວນພາກອຸດສາຫະກຳ ແລະ ພາກບໍລິ ການນັ້ນກໍຈະຕ້ອງຂະຫຍາຍຕົວເພີ່ມຂຶ້ນ 9.3 ເປີເຊັນ ແລະ 8.9 ເປີເຊັນຕໍ່ປີຕາມລຳດັບ ຊຶ່ງເຮັດໃຫ້ຈຳເປັນຈະຕ້ອງລະດົມເງິນທຸກທີ່ຈະນຳໃຊ້ໃນໂຄງການພັດທະນາຕ່າງໆ ຂອງ ລັດຖະບານ ລາວ ໃຫ້ໄດ້ເຖິງ 27 ຕື້ໂດລາໃນໄລຍະ 5 ປີດັ່ງກ່າວໂດຍໃນນີ້ເປັນການລົງ ທຶນຂອງພາກລັດຖະບານ ລາວ 24-28 ເປີເຊັນ, ພາກເອກະຊົນ 54-58 ເປີເຊັນ ແລະ ສິນເຊື່ອໃນລະບົບທະນາຄານ 19-21 ເປີເຊັນຂອງການລົງທຶນທັງໝົດດັ່ງກ່າວ.

XS
SM
MD
LG