ພວກເຈົ້າໜ້າທີ່ການເດີນເຮືອກ່າວວ່າ ກໍ່າປັ່ນບັນທຸກສິນຄ້າລໍານຶ່ງທີ່ເກີຍຕື້ນຢູ່ນອກຝັ່ງທະເລນີວຊີແລນດ໌ ມາຕັ້ງແຕເດືອນຕຸລາປີຜ່ານມາ ໄດ້ແຕກຫັກລົງ ໃນວັນອາທິດມື້ນີ້ ສົ່ງຜົນໃຫ້ຕູ້ສິນຄ້າແລະສິ່ງຫັກພັງຕ່າງໆພັດອອກຈາກກໍ່າປັ່ນ ແລະເກີດຄວາມຢ້ານກົວວ່າຈະມີນໍ້າມັນຮົ່ວລົ້ນອອກສູ່ນໍ້າທະເລ.
ການຫັກພັງລົງຂອງກໍ່າປັ່ນທີ່ຊື່ວ່າ Rena ທີ່ເປັນຂອງປະເທດກຣີສນັ້ນ ນັບວ່າເປັນໄພພິບັດຕໍ່ສະພາບແວດລ້ອມການເດີນເຮືອທີ່ຮ້າຍແຮງທີ່ສຸດຂອງນີວຊີແລນດ໌ ແມ່ນແຕ່ກ່ອນໜ້າກໍ່າປັ່ນລໍາດັ່ງກ່າວໄດ້ຖືກຄື້ນຟອງຊັດຈົນສ່ວນທ້າຍຂອງກໍ່າປັ່ນແຕກອອກ ໃນລະຫວ່າງພາຍຸບັ້ນນຶ່ງຜ່ານມານັ້ນ.
ນໍ້າມັນດິບຫລາຍກວ່າ 1,000 ຕັນ ໄດ້ຖືກປໍ້າອອກ ແຕ່ກໍຍັງມີອີກຫລາຍຢູ່ ທີ່ຍັງປໍ້າອອກບໍ່ໝົດ.
ພວກເຈົ້າໜ້າທີ່ການເດີນເຮືອກ່າວວ່າ ພວກທີມງານຮັບມືກັບໄພພິບັດແລະສັດປ່າ ໄດ້ຖືກລະດົມກໍາລັງມາຊ່ວຍກັນ ແລະພວມຕຽມການຈັດການກັບນໍ້າມັນດິບ ທີ່ອາດຖືກພັດຂຶ້ນຊາຍຫາດທີ່ອ່າວ Tauranga Harbor ເທິງ ເກາະເໜືອ ຫລື North Island ນັ້ນ.
ກັບຕັນເຮືອ ແລະເຈົ້າໜ້າທີ່ບັງຄັບການເດີນເຮືອ Rena ທີ່ເປັນຊາວຟີລິບປິນທັງສອງນັ້ນ ຖືກຈັບກຸມໃນຂໍ້ຫາຫລາຍກະທົງ ໂຮມທັງການແລ່ນກໍ່າປັ່ນໃນລັກສະນະທີ່ສ້າງໄພອັນຕະລາຍ ຫລືສ່ຽງທີ່ບໍ່ມີເຫດຜົນພຽງພໍ ແລະປ່ອຍສານພິດອັນຕະລາຍສູ່ສະພາບແວດລ້ອມ.
