ພວກປະຊາຊົນໃນທົ່ວປະເທດ ກໍໄດ້ພາກັນຮ່ວມກັບພວກຄອບຄົວຂອງຄົນງານບໍ່ຖ່ານຫີນ 29 ຄົນ ທີ່ໄດ້ເສຍຊີວິດໄປ ໃນການໄວ້ອາໄລ ອາວອນນໍາພວກເຄາະຮ້າຍ ໃນອັນທີ່ເອີ້ນວ່າ ໄພຫາຍະນະຄັ້ງຮ້າຍແຮງທີ່ສຸດໃນບໍ່ແຮ່ໃນຮອບຫລາຍທົດສະວັດຜ່ານມາ.
ໄດ້ມີການຊັກທຸງລົງເຄິ່ງເສົາ ແລະລັ່ນລະຄັງໃນໂບດໃນທົ່ວປະເທດໃນ ມື້ໄວ້ອາໄລແຫ່ງຊາດໃນວັນພະຫັດມື້ນີ້. ຕະຫລາດຮຸ້ນກໍໄດ້ເປີດຊ້າກວ່າປົກກະຕິ ໃນການສະແດງຮ່ອງ ຮອຍແຫ່ງການເຄົາລົບນັບຖື ແລະພວກທີມກີລາຕ່າງໆກໍໄດ້ໃຫ້ຄໍາໝັ້ນສັນຍາ ທີ່ຈະລະລຶກເຖິງດວງວິນຍານຂອງພວກຄົນງານບໍ່ ໂດຍພາກັນເອົາຜ້າຂາວມັດແຂນເປັນສັນຍາລັກ.
ນາຍົກລັດຖະມົນຕີ John Key ທີ່ໄດ້ໄປຢ້ຽມຢາມບ່ອນເກີດເຫດໃນວັນພະຫັດມື້ນີ້ ກັບພວກຍາດຕິພີ່ນ້ອງຂອງພວກທີ່ໄດ້ຮັບເຄາະຮ້າຍໃຫ້ຄໍາໝັ້ນສັນຍາວ່າ ຈະມີການສືບສວນສອບສວນໃຫ້ຄໍາຊີ້ແຈງຢ່າງເຕັມສ່ວນສໍາລັບໂສກນາຕະກໍາຄັ້ງນີ້ ຊຶ່ງເກີດຈາກແກສລະເບີດຂຶ້ນໃນບໍ່ຖ່ານຫິນ Pike River ທີ່ເກາະໃຕ້ຫລື South Island ຂອງນີວຊີແລນນັ້ນ.
