ບໍລິສັດ AT&T ທີ່ເປັນໜຶ່ງ ໃນບັນດາ ບໍລິສັດໂທລະຄົມມະນາຄົມ
ທີ່ເກົ່າແກ່ ແລະ ໃຫຍ່ທີ່ສຸດຂອງສະຫະລັດ ໄດ້ໃຫ້ການຊ່ວຍເຫຼືອ
ທີ່ມີຄຸນຄ່າ ແກ່ໂຄງການເພື່ອສອດແນມ ການຈາລາຈອນດ້ານ
ອິນເຕີແນັດ ແລະ ການໃຊ້ໂທລະສັບ ພາຍໃນປະເທດ ຂອງ
ອົງການຄວາມໝັ້ນຄົງແຫ່ງຊາດ ຫຼື NSA ອີງຕາມໜັງສືພິມ
The New York Times ນັ້ນ.
ໜັງສືພິມດັ່ງກ່າວ ໃນວັນເສົາວານນີ້ ໄດ້ອ້າງເຖິງ ເອກະສານ
ຈຳນວນໜຶ່ງຂອງ NSA ທີ່ໄດ້ຖືກເປີດເຜີຍໃໝ່ໆ ໂດຍຜູ້ຫລົບໜີ
ກົດໝາຍ ອະດີດພະນັກງານສັນຍາຈ້າງ ນາຍ Edward Snowden.
ເຖິງແມ່ນວ່າ ເອກະສານຈຳນວນນັ້ນ ບໍ່ໄດ້ກ່າວຢ່າງເຈາະຈົງໃສ່ ຊື່ຂອງບໍລິສັດ AT&T
ກໍຕາມ ແຕ່ພວກເຂົາກໍໄດ້ໃຊ້ລະຫັດຕ່າງໆ ທີ່ບົ່ງເຖິງໜັງສືພິມນັ້ນ ທີ່ບັນດາອະດີດ
ເຈົ້າໜ້າທີ່ສືບລັບຫຼາຍຄົນ ກ່າວວ່າ ມັນໄດ້ຊີ້ໃສ່ບໍລິສັດໂທລະຄົມມະນາຄົມດັ່ງກ່າວ.
ບົດລາຍງານກ່າວວ່າ ເອກະສານຈຳນວນດັ່ງກ່າວ ລົງວັນທີ ຈາກປີ 2013 ແລະ ສະແດງ
ໃຫ້ເຫັນວິທີ ບໍລິສັດ AT&T ໃຊ້ກົດລະບຽບຕ່າງໆ ທີ່ຖືກຕ້ອງຕາມກົດໝາຍ ແລະ ໃຊ້
ພວກຄຳສັ່ງຈາກສານ ເພື່ອສະໜອງໃຫ້ NSA ເກັບກຳເອົາອີເມລ ທີ່ຖືກສົງອອກຜ່ານ
ທາງເຄືອຂ່າຍຂອງຕົນໃນສະຫະລັດ ຈຳນວນຫຼາຍຕື້ອີເມລ. ພວກອີເມລເຫຼົ່ານັ້ນ ລວມ
ທັງ ການສົ່ງຂ່ຽນອິນເຕີແນັດ ຢູ່ທີ່ສຳນັກງານໃຫຍ່ ຂອງອົງການສະຫະປະຊາຊາດ ໃນ
ນະຄອນນິວຢອກ ນຳ.
ນອກນັ້ນ ບໍລິສັດ AT&T ຍັງໄດ້ສົ່ງມອບບັນທຶກຂອງການສົນທະນາທາງໂທລະສັບ ຫຼາຍ
ກວ່າໜຶ່ງຕື້ຄັ້ງ ໃຫ້ແກ່ NSA ນຳ.
ອີງຕາມເອກະສານດັ່ງກ່າວ NSA ເຫັນວ່າ ບໍລິສັດ AT&T ເປັນພາຄີ ໃນທຸລະກິດການ
ຕິດຕາມເຝົ້າເບິ່ງ ບໍ່ແມ່ນເປັນແບບສັນຍາຈ້າງ.
ໂຄສົກຂອງ ບໍລິສັດ AT&T ທ່ານ Brad Burns ກ່າວຕໍ່ວີໂອເອ ວ່າ ບໍລິສັດບໍ່ໄດ້
“ສະໜອງຂໍ້ມູນ ໃຫ້ແກ່ບັນດາເຈົ້າໜ້າທີ່ສອບສວນໃດໆ ໂດຍປາດສະຈາກຄຳສັ່ງ
ຂອງສານ ຫຼື ຂັ້ນຕອນຂໍ້ບັງຄັບອື່ນໆ ນອກເໜືອຈາກວ່າ ຊີວິດຂອງຄົນຜູ້ໜຶ່ງນັ້ນ
ແມ່ນຕົກຢູ່ໃນອັນຕະລາຍ ແລະ ເວລາເປັນປັດໃຈ. ຍົກຕົວຢ່າງ ໃນສະຖານະການ
ລັກພາຕົວໄປນັ້ນ ພວກເຮົາອາດສະໜອງການຊ່ວຍເຫຼືອເພື່ອ ຕິດຕາມຊອກຫາ
ນ້ຳເບີໂທລະສັບ ທີ່ໄດ້ໂທເຂົ້າມາ ເພື່ອຊ່ວຍເຫຼືອເຈົ້າໜ້າທີ່ຮັກສາກົດໝາຍ.”
