ເອກອັກຄະລັດຖະທູດສະຫະລັດ ປະຈຳປະເທດກຳປູເຈຍ ຄົນໃໝ່
ກ່າວວ່າ ທ່ານຈະເພັ່ງເລັງໃສ່ການປັບປຸງສາຍພົວພັນແລະການຄ້າ
ລະຫວ່າງປະເທດທັງສອງ ໃນຊ່ວງໄລຍະທີ່ທ່ານປະຕິບັດໜ້າທີ່
ສຳຄັນນີ້.
ໃນການໃຫ້ສຳພາດພິເສດກັບ VOA ພາກພາສາຂະເໝນ
ເອກອັກຄະລັດຖະທູດ William Heidt ໄດ້ກ່າວວ່າ ໄດ້ມີໂອກາດຫຼາຍໆຢ່າງເກີດຂຶ້ນ ລະຫວ່າງປະເທດທັງສອງ ທີ່ຈະສານ ຕໍ່ການພົວພັນໃຫ້ເຂັ້ມແຂງຂຶ້ນ.
ທ່ານ Heidt ໄດ້ກ່າວວ່າ “ຂ້າພະເຈົ້າ ຖືວ່າເປັນຜູ້ທີ່ໂຊກດີ ທີ່ໄດ້ມາປະຈຳການຜູ້ທີ່ນີ້ ໃນປະເທດກຳປູເຈຍ ໃນຂະນະທີ່ມີຫຼາຍສິ່ງຫຼາຍຢ່າງທີ່ໜ້າສົນໃຈທີ່ອາດເປັນໄປໄດ້ ທີ່ຈະເຮັດວຽກຮ່ວມກັນ ໃຫ້ໃກ້ຊິດຍິ່ງຂຶ້ນໃນບັນຫາຕ່າງໆນັ້ນ. ຂ້າພະເຈົ້າຕື່ນເຕັ້ນດີໃຈ ໃນຂັ້ນຕອນການດຳເນີນງານຂອງການຄ້າ ແລະການເສດຖະກິດ. ຂ້າພະເຈົ້າກໍຍັງໄດ້ຮູ້ເຖິງຄວາມສຳພັນ
ລະຫວ່າງປະຊາຊົນ ຕໍ່ປະຊາຊົນ ສາຍພົວພັນລະຫວ່າງສະຫະລັດ ແລະກຳປູເຈຍ ນັ້ນແມ່ນເຂັ້ມແຂງດີ.”
ທ່ານ Heidt ໄດ້ປະຕິບັດງານ ໃນຖານະເປັນນັກເສດຖະສາດ
ໃນສະຖານທູດ ແຕ່ປີ 1997 ຫາ 1999. ທ່ານປາກພາສາຂະເໝນ
ໄດ້ ແລະຍັງໄດ້ແຕ່ງງານກັບຊາວຂະເໝນ ອີກນຳ.
ທ່ານໄດ້ກ່າວວ່າ ທ່ານຍັງຈະສາມາດປະຕິບັດງານໃນການປັບປຸງ
ເລື້ອງຄວາມປອດໄພທາງດ້ານອາຫານການກິນ ແລະການປົກ
ປ້ອງສະພາບແວດລ້ອມຕ່າງໆ.
ທ່ານ Heidt ໄດ້ກ່າວອີກວ່າ ທ່ານຍັງຈະລິເລີ້ມເພື່ອສ້າງຕັ້ງສົນທິ
ສັນຍາການລົງທຶນສອງຝ່າຍ ທີ່ຈະສາມາດປັບປຸງການຄ້າ ໂດຍ
ຊຸກຍູ້ໃຫ້ມີການລົງທຶນຫຼາຍຂຶ້ນ.
