ຜູ້ອຳນວຍການຕຳຫລວດລັບສະຫະລັດ ທ່ານນາງ Julia
Pierson ໄດ້ລາອອກຈາກຕຳແໜ່ງ ຫຼັງຈາກໄດ້ເກີດການຜິດ
ພາດໃນເລື່ອງຄວາມ ປອດໄພທີ່ສຳຄັນ 2 ຄັ້ງ ທີ່ອາດເຮັດໃຫ້
ປະທານາທິບໍດີ ຕົກຢູ່ໃນຄວາມອັນຕະລາຍໄດ້.
ໂຄສົກທຳນຽບຂາວ ທ່ານ Josh Earnest ໄດ້ກ່າວໃນວັນພຸດ
ວານນີ້ວ່າ ທ່ານນາງ Pierson ໄດ້ເຂົ້າພົບປະທານາທິບໍດີ ບາຣັກ
ໂອບາມາ ຊຶ່ງທ່ານໄດ້ສະແດງ ການຮູ້ບຸນຄຸນ ຕໍ່ການຮັບໃຊ້
ປະເທດຊາດເປັນເວລາ 30 ປີ ຂອງທ່ານນາງ. ທ່ານ Earnest
ໄດ້ກ່າວຕໍ່ໄປວ່າ ທ່ານນາງ Pierson ໄດ້ຮັບເອົາຄວາມຮັບຜິດ
ຊອບ ກ່ຽວກັບການອາລັກຂາທີ່ຂາດຕົກບົກຜ່ອງ ແລະເພື່ອໃຫ້ເລື່ອງເຫຼົ່ານີ້ ໄດ້ຮັບການ
ແກ້ໄຂ.
ທ່ານນາງ Pierson ໄດ້ປະເຊີນກັບຄຳສອບຖາມ ຢ່າງໜັກໜ່ວງ ຈາກສະມາຊິກສະພາ ໃນອາທິດນີ້ ຫຼັງຈາກທີ່ໄດ້ມີການບຸກລຸກຜ່ານການປ້ອງກັນໃນການອາລັກຂາປະທານາທິບໍດີ
ທີ່ຮ້າຍແຮງ 2 ຄັ້ງ ໃນເດືອນແລ້ວນີ້.
ທ້າວ Omar Gonzalez ອະດີດນັກລົບເກົ່າສົງຄາມອີຣັກທີ່ມີມີດເປັນ ອາວຸດ ໄດ້ປີນຂ້າມຮົ້ວທຳນຽບຂາວ ແລ້ວແລ່ນເຂົ້າໄປໃນຕຶກທຳນຽບ ປະທານາທິບໍດີ ຫຼັງຈາກສາມາດຫລົບຫລີກໜ່ວຍຍາມປ້ອງກັນ. ລາວໄດ້ຖືກຈັບໄດ້ຢູ່ໃນຫ້ອງໜຶ່ງໃນຕຶກທຳນຽບຂາວ. ໃນເວລານັ້ນ ປະທາ ນາທິບໍດີ ແລະຄອບຄົວຂອງທ່ານ ບໍ່ໄດ້ຢູ່ໃນທຳນຽບຂາວ.
3 ມື້ກ່ອນໜ້ານັ້ນ ພະນັກງານຍາມຮັກສາຄວາມປອດໄພທີ່ມີອາວຸດຕິດ ໂຕຄົນໜຶ່ງ ຜູ້ທີ່ເຄີຍມີປະຫວັດຄວາມຜິດທາງອາຍາມາແລ້ວ ໄດ້ເຂົ້າໄປໃນລິບດຽວກັນກັບທ່ານ ໂອບາມາ ແລະ ໜ່ວຍອາລັກຂາຂອງທ່ານ ຢູ່ນະຄອນ Atlanta ລັດ Georgia.
ໃນ ປີ 2011 ມີການຍິງປືນຖືກທຳນຽບຂາວ ແຕ່ຄວາມເສຍຫາຍຈາກລູກປືນນັ້ນ ບໍ່ໄດ້ກວດພົບ ຈົນ 4 ມື້ຕໍ່ມາ ຫລັງຈາກໄດ້ເກີດເຫດ.
