ຊາຍຄົນຜູ້ທີ 4 ຢູ່ໃນ New York City ແມ່ນກຳລັງປະເຊີນໜ້າ
ກັບຂໍ້ກ່າວຫາ ທີ່ໄດ້ມີການປະກາດໄປແລ້ວກ່ຽວກັບແຜນການ
ທີ່ຈະສະໜອງ ການສະໜັບສະໜຸນ ທາງວັດຖຸ ໃຫ້ແກ່ພວກ
ຫົວຮຸນແຮງລັດອິສລາມ.
ບັນດາເຈົ້າໜ້າທີ່ ລັດຖະບານກາງ ແລະ ທ້ອງຖິ່ນ ໄດ້ປະກາດ
ໃນວັນຈັນມື້ວານນີ້ ວ່າ ທ້າວ Dilkhayot Kasimov ອາຍຸ 26 ປີ
ໄດ້ຖືກ ຟ້ອງໂດຍຄະນະຕຸລາການ ພ້ອມກັນກັບ ຊາຍອີກ 3 ຄົນ
ພວກກ່ຽວ ໄດ້ຖືກຈັບກຸ່ມຕັ້ງແຕ່ເດືອນກຸມພາຜ່ານມາ.
ທ້າວ Kasimov ຖືກກ່າວຫາວ່າ ທຳງານກັບຊາຍອີກຄົນນຶ່ງ ຊື່ວ່າ
Abror Habibov ເພື່ອລະດົມທຶນ 1,600 ດອນລາ ເພື່ອຊ່ວຍ
ເຫຼືອຊາຍຜູ້ຄົນທີ 3 ຄື ທ້າວ Akhror Saidakhmetov ໃນການເດີນທາງໄປຊີເຣຍ
ເພື່ອທີ່ຈະເຂົ້າຮ່ວມກັບ ກຸ່ມຫົວຮຸນແຮງຈັດອິສລາມ. ສຳນວນເອກະສານຂອງສານ
ກ່າວວ່າ ທ້າວ Saidakhmetov ໄດ້ຖືກຈັບກຸມຢູ່ທີ່ສະໜາມບິນ John F. Kennedy
ໃນຂະນະທີ່ຜູ້ກ່ຽວກຳລັງພະຍາຍາມ ຈະຂຶ້ນເຮືອບິນໄປຍັງ ນະຄອນ Istanbul ປະເທດ
ເທີກີ.
ບັນດາໄອຍະການ ຍັງກ່າວອີກວ່າ ການສືບສວນສອບສວນເພີ້ມຕື່ມ ໄດ້ເປີດເຜີຍວ່າ
ຂໍ້ຄວາມທາງອີເລັກໂທຣນິກຕ່າງໆ ຈາກທ້າວ Kasimov ນັ້ນ ໄດ້ຊຸກຍູ້ໃຫ້ຊາຍຄົນອື່ນໆ
ເຂົ້າຮ່ວມ ໃນການ “ກໍ່ການຮ້າຍສົງຄາມສັກສິດທາງສາສະໜາ.” ລາວກຳລັງປະເຊີນ
ໜ້າກັບໂທດຈຳຄຸກລວມທັງໝົດ ເຖິງ 30 ປີ ຖ້າຖືກຕັດສິນວ່າຜິດ. ຜູ້ກ່ຽວ ມີກຳນົດ ຈະໄປ
ປາກົດໂຕຢູ່ສານເປັນຄັ້ງທຳອິດ ໃນວັນພຸດມື້ອື່ນນີ້.
