ນາຍົກລັດຖະມົນຕີອິສຣາແອລ ທ່ານ Benjamin Netanyahu
ໄດ້ເຕືອນປະຊາຊົນທີ່ອາໄສຢູ່ໃນເຂດກາຊາ ໃຫ້ພາກັນຍົກຍ້າຍ
ໜີອອກ ຈາກບ່ອນໃດກໍຕາມ ທີ່ພວກຫົວຮຸນແຮງປາແລສໄຕນ໌
ກຳລັງປະຕິບັດງານຢູ່ນັ້ນ ແລະບອກວ່າ ພວກສະຖານທີ່ຕ່າງໆ
ເຫຼົ່ານັ້ນ ສາມາດຕົກເປັນເປົ້າໝາຍຂອງການໂຈມຕີໄດ້.
ນາຍົກລັດຖະມົນຕີອິສຣາແອລໄດ້ກ່າວໃນວັນອາທິດມື້ນີ້ ນຶ່ງມື້
ຫຼັງຈາກການໂຈມຕີທາງອາກາດຂອງອິສຣາແອລໄດ້ທຳລາຍຕຶກ
apartment ຫຼັງນຶ່ງ ຢ່າງຮາບຄາບຈົມດິນ ວ່າພວກຊາວກາຊາ
ຄວນຈະ “ອອກຈາກໄປໃນທັນທີ” ຈາກທຸກໆເຂດທີ່ກຸ່ມຮາມັສ
ກຳລັງດຳເນີນ ອັນທີ່ທ່ານເອີ້ນວ່າ ກິດຈະກຳກໍ່ການຮ້າຍນັ້ນ.
ກອງທັບອິສຣາແອລ ກ່າວວ່າ ຕົນໄດ້ເຕືອນພວກປະຊາຊົນ ທີ່ອາໄສຢູ່ຕຶກອາຄານຫຼາຍຊັ້ນຫລັງນັ້ນ ໃຫ້ພາກັນອອກໜີໄປ ໃນເວລາບໍ່ດົນ ກ່ອນພວກຕົນຈະທຳການໂຈມຕີ ທີ່
ໄດ້ເຮັດໃຫ້ມີຄົນໄດ້ຮັບບາດເຈັບ ເກືອບ 20 ຄົນນັ້ນ.
ວິກິດການ ໃນເຂດ Gaza - ວັນອາທິດ ທີ 24 ສິງຫາ
ການໂຈມຕີທາງອາກາດອີກບັ້ນນຶ່ງຂອງອິສຣາແອລ ໃນວັນເສົາວານນີ້ຕຶກຫ້ອງການ 7
ຊັ້ນຫຼັງນຶ່ງ ໄດ້ຖືກທຳລາຍ ຊຶ່ງອິສຣາແອລ ກ່າວວ່າ ອາຄານຫຼັງນີ້ ໄດ້ຖືກໃຊ້ເປັນຫ້ອງ
ການຕ່າງໆຂອງກຸ່ມຮາມັສ.
ໃນວັນອາທິດມື້ນີ້ ການໂຈມຕີທາງອາກາດບັ້ນນຶ່ງຂອງອິສຣາແອລ ໄດ້ສັງຫານປະຊາຊົນ
2 ຄົນທີ່ຂີ່ລົດຈັກຊ້ອນກັນໄປ ໃນເຂດກາຊາ.
ໃນແຫ່ງອື່ນໆອີກ ໃນວັນອາທິດມື້ນີ້ ຈະຫຼວດຈຳນວນນຶ່ງທີ່ຍິງມາຈາກ ຊີເຣຍ ໄດ້ຕົກລົງ
ໃສ່ເຂດເປົ່າແປນຫລາຍແຫ່ງໃນພາກເໜືອຂອງອິສ ຣາແອລ. ແຕ່ບໍ່ມີລາຍງານແຈ້ງໃຫ້ຊາບໃນທັນທີກ່ຽວກັບຄວາມເສັຍຫາຍ ຜູ້ບາດເຈັບຫລືລົ້ມຕາຍ ແລະກໍບໍ່ເປັນທີ່ຈະແຈ້ງເທື່ອວ່າ ແມ່ນພວກໃດຍິງລູກຈະຫຼວດເຫຼົ່ານີ້.
ອີຈິບ ໄດ້ຮຽກຮ້ອງໃຫ້ ອິສຣາແອລແລະປາແລສໄຕນ໌ ຮັບເອົາການ ຢຸດຍິງຖາວອນ ແລະກັບຄືນໄປເຈລະຈາກັນໂດຍທາງອ້ອມໃນນະຄອນຫຼວງໄຄໂຣອີກ ໃນຂະນະທີ່ທັງສອງຝ່າຍສືບຕໍ່ລະອົມຍິງໃສ່ກັນຢູ່ນີ້.
