ກອງທັບອິສຣາແອລ ກ່າວໃນວັນຈັນມື້ນີ້ວ່າ ກອງກຳລັງຂອງຕົນໄດ້ຖອນອອກຈາກເຂດໂຮງໝໍ ຊີຟາ ໃນພາກເໜືອຂອງເຂດ ກາຊາ ຫຼັງຈາກໄດ້ສຳເລັດການປະຕິບັດການຢູ່ທີ່ນັ້ນ.
ການຖອນຕົວດັ່ງກ່າວ ມີຂຶ້ນສອງອາທິດຫຼັງຈາກກອງກຳລັງອິສຣາແອລ ໄດ້ເປີດການປະຕິບັດການຢູ່ໃນໂຮງໝໍທີ່ໃຫຍ່ທີ່ສຸດຂອງເຂດກາຊາ, ໂດຍກ່າວຫາວ່າ ຜູ້ບັນຊາການກຸ່ມ ຮາມາສ ໃຊ້ສະຖານທີ່ດັ່ງກ່າວ ເພື່ອດຳເນີນການກໍ່ການຮ້າຍ.
ກອງທັບອິສຣາແອລ ກ່າວວ່າ ຕົນໄດ້ສັງຫານພວກຫົວຮຸນແຮງ 200 ຄົນໃນພື້ນທີ່ຂອງໂຮງໝໍ ບ່ອນທີ່ຕົນໄດ້ດຳເນີນການ ທັງການສູ້ລົບທາງພາກພື້ນດິນ ແລະການໂຈມຕີທາງອາກາດ.
ສົບໄດ້ຖືກພົບເຫັນຢູ່ພາຍໃນ ແລະ ພາຍນອກຂອງຕຶກໂຮງໝໍ ໃນຂະນະທີ່ປະຊາຊົນເດີນທາງກັບຄືນມາສະຖານທີ່ເກີດເຫດ ຫລັງຈາກທີ່ລົດຖັງ ແລະທະຫານອິສຣາແອລ ອອກໄປ.
ນາຍົກລັດຖະມົນຕີອິສຣາແອລ ທ່ານ ເບັນຈາມິນ ເນຕັນຢາຮູ ກ່າວໃນວັນອາທິດວານນີ້ວ່າ ທ່ານໄດ້ອະນຸມັດແຜນການປະຕິບັດການທາງທະຫານ ສຳລັບເມືອງ ຣາຟາ ທາງພາກໃຕ້ຂອງເຂດ ກາຊາ ຊຶ່ງເປັນເຂດທີ່ສ້າງຄວາມວິຕົກກັງວົນໃຫ້ກັບນາໆຊາດ ເນື່ອງຈາກວ່າ ເຄິ່ງນຶ່ງຂອງຈຳນວນປະຊາກອນຂອງເຂດ ກາຊາ ຫຼົບໄພຈາກສົງຄາມ ຢູ່ທີ່ນັ້ນ.
ທ່ານ ເນຕັນຢາຮູ ກ່າວໃນກອງປະຊຸມຖະແຫຼງຂ່າວວ່າ ກອງທັບອິສຣາແອລ ໄດ້ກຽມພ້ອມທີ່ຈະຍົກຍ້າຍພົນລະເຮືອນ ແລະໃຫ້ການຊ່ວຍເຫຼືອດ້ານມະນຸດສະທຳ. ແຕ່ເຊັ່ນດຽວກັບກັບການປະກາດຄັ້ງກ່ອນໜ້ານີ້ ກ່ຽວກັບແຜນການຂອງອິສຣາແອລທີ່ຈະດຳເນີນການໂຈມຕີຢູ່ເມືອງ ຣາຟາ, ຍັງບໍ່ທັນມີລາຍລະອຽດວ່າຊາວປາແລັສໄຕນ໌ ຈະສາມາດໄປຢູ່ບ່ອນໃດ ໄດ້ຢ່າງປອດໄພ.
ຟໍຣັມສະແດງຄວາມຄິດເຫັນ