ໃນວັນອັງຄານມື້ນີ້ ກອງກຳລັງ Israel ໄດ້ມ້າງເຮືອນຂອງຊາວ
ປາແລັສໄຕນ໌ ຜູ້ຊຶ່ງໄດ້ທຳການໂຈມຕີຮ້າຍແຮງ ໃນນະຄອນ
Jerusalem ເມື່ອປີກາຍນີ້ ກ່ອນທີ່ຈະຖືກຕຳຫຼວດສັງຫານນັ້ນ.
ການມ້າງເຮືອນດັ່ງກ່າວ ແມ່ນຮວມທັງຂອງຄອບຄົວຂອງຊາຍ
ຜູ້ນຶ່ງທີ່ໄດ້ສັງຫານພວກສວດ ມົນພາວະນາ 5 ຄົນ ແລະຕຳຫຼວດ
ນຶ່ງຄົນ ໃນການໂຈມຕີທີ່ວັດສາສະໜາຢິວ ແລະອີກຊາຍຄົນນຶ່ງ
ທີ່ໄດ້ສັງຫານອີກຄົນນຶ່ງດ້ວຍລົດດຸດ. ກອງກຳລັງ Israel ຍັງໄດ້
ປິດກັ້ນເຮືອນອີກຫຼັງນຶ່ງທີ່ພົວພັນກັບຊາວປາແລສໄຕນ໌ ທີ່ໄດ້ສັງ
ຫານນັກເຄື່ອນໄຫວຊາວຢິວ ນັ້ນ.
ນາຍົກລັດຖະມົນຕີ Israel ທ່ານ Benjamin Netanyahu ໄດ້ໃຫ້ຄຳໝັ້ນສັນຍາ ໃນຄ່ຳວັນຈັນວານນີ້ວ່າ ຈະເລັ່ງມືໃນການມ້າງບ້ານເຮືອນຂອງພວກກໍ່ການຮ້າຍດັ່ງກ່າວ ແລະ
ກັກຂັງພວກທີ່ສົງໄສວ່າ ເປັນພວກກໍ່ການຮ້າຍ ໂດຍປາສະຈາກການດຳເນີນຄະດີໃດໆ.
ທ່ານໄດ້ກ່າວກ່ອນກອງປະຊຸມສຸກເສີນຂອງຄະນະຄວາມໝັ້ນຄົງລັດຖະບານກ່ຽວກັບການໃຫ້ສິດອຳນາດຢ່າງບໍ່ມີຂອບເຂດຈຳກັດ ຕໍ່ກອງກຳລັງຮັກສາຄວາມປອດໄພຂອງປະເທດ ໃນຂະນະທີ່ຮັບມືກັບການກໍ່ຄວາມຮຸນແຮງຂອງຊາວປາແລັສໄຕນ໌.
ທ່ານ Netanyahu ກ່າວວ່າ “ພວກເຮົາອະນຸຍາດໃຫ້ກອງກຳລັງຂອງພວກເຮົາສາມາດທີ່ຈະເອົາບາດກ້າວຢ່າງແຂງຂັນ ຕໍ່ພວກທີ່ແກ່ວງກ້ອນຫີນແລະລະເບີດໄຟ. ພວກເຮົາບໍ່ໄດ້ຕຽມທີ່ຈະໃຫ້ການຍົກເວັ້ນຕໍ່ຜູ້ໃດກໍຕາມ ຕໍ່ພວກທີ່ທຳການປະທ້ວງ ຫຼືຜູ້ກໍ່ການຮ້າຍຢູ່ໃສ ກໍຕາມ.”
ປະທານາທິບໍດີປາແລັສໄຕນ໌. ທ່ານ Mahmoud Abbas ໄດ້ພົບກັບຄະນະຮັກສາຄວາມປອດໄພຂອງທ່ານໃນວັນຈັນວານນີ້ ຮຽກຮ້ອງພວກເຂົາເຈົ້າ ບໍ່ໃຫ້ກໍ່ຄວາມຮຸນແຮງຂຶ້ນຕື່ມ ແລະ ບໍ່ໃຫ້ຕົກເປັນເຄື່ອງມືຂອງລັດຖະບານ Israel.
ຄວາມຮຸນແຮງລະຫວ່າງ Israel ແລະປາແລັສໄຕນ໌ ໄດ້ເພີ້ມທະວີຂຶ້ນ ໃນບໍ່ເທົ່າໃດສັບປະ ດາຜ່ານມານີ້. ໂດຍສະເພາະແມ່ນທີ່ວັດ al-Aqsa ຊຶ່ງເປັນສະຖານທີ່ສັກສິດສຳລັບຊາວ ມຸສລິມ ແລະສຳລັບຊາວຢິວເອີ້ນວ່າວັດ Temple Mount ໃນພາກຕາເວັນອອກຂອງນະ ຄອນຂອງ Jerusalem ນັ້ນ.
