ຊາວ​​ເນ​ປາລ​ ​ປ່ອນບັດ ເລືອກ​ຕັ້ງເອົາ ສະ​ມາ​ຊິກ​ ສະພາຮ່າງລັດຖະທໍາມະນູນ (ວີດີໂອ/ສະໄລດ໌)

ພວກ​ທີ່​ມີ​ສິດ​ປ່ອນ​ບັດ​ເລືອກ​ຕັ້ງ​ຂອງ​ເນ​ປາລ ​ຈໍານວນ 27
ລ້ານຄົນ ພາກັນ​ໄປ​ລົງ​ຄະ​ແນນ​ສຽງ​ໃນ​ວັນ​ອັງຄານ​ມື້​ນີ້ ເພື່ອ
​ເລືອກ​ເອົາ​ສະ​ມາ​ຊິກ​ສະພາ ຈໍານວນ 601 ຄົນ​ ເພື່ອຮ່າງກົດ
ໝາ​ຍລັດຖະທໍາ​ມະນູນ ເພື່ອຍຸຕິ​ສະພາບ​ທາງ​ດ້ານການ​ເມືອງ
ທີ່​ບໍ່​ແນ່ນອນ ​ທີ່ໄດ້ດໍາ​ເນີນ​ມາເປັນ​ເວລາ ​ຫຼາຍ​ປີແລ້ວນັ້ນ.

ການ​ປ່ອນ​ບັດ​ໃນຄັ້ງ​ນີ້ ​ແມ່ນ​ເປັນ​ຄັ້ງ​ທີ 2 ນັບ​ຕັ້ງ​ແຕ່ສົງຄາມ
​ການ​ເມືອງ​ໃນ​ເນ​ປາລ ​ໄດ້​ສິ້ນສຸດລົງ​ໃນ​ປີ 2006. ຄວາມ​ພະຍາ
ຍາມໃນການ​ເລືອກ​ຕັ້ງ​ປີ 2008 ນັ້ນ ໄດ້ຍັງ​ຜົນ​ໃຫ້ມີ​ລັດ​ຖະບານ​
ອາຍຸ​ສັ້ນໆຫຼາຍຊຸດ ທີ່​ບໍ່​ສາມາດ​ສ້າງ​ຄວາມ​ທຸ່ນ​ທ່ຽງ ​ໃນ​ປະ​ເທດ
​ທີ່​ປະກອບ​ໄປ​ດ້ວຍ​ຫຼາຍຊົນ​ຊາດ​ຊົນ​ເຜົ່າ.


ການ​ປ່ອນ​ບັດໃນວັນ​ອັງຄານມື້​ນີ້ ​ແມ່ນ​ມີ​ຄວາມ​ຮຸນ​ແຮງ​ເກີດ​ຂຶ້ນ​ຢ່າງ​ນ້ອຍຄັ້ງນຶ່ງ ຄື​ເຫດ​
ລະ​ເບີດ​ໃນ​ນະຄອນ Katmandu ທີ່​ເຮັດ​ໃຫ້ 3 ຄົນ​ບາດ​ເຈັບ ​ຊຶ່ງຮວມທັງ​ເດັກນ້ອຍ​ນໍາ​.
ຕໍາ​ຫຼວດ​ກ່າວ​ວ່າ ​ເຫດຮ້າຍ​ດັ່ງກ່າວ​ເກີດຂຶ້ນ ​ຍ້ອນ​ລະ​ເບີດ ທີ່​ໜ່ວຍປ່ອນ​ບັດ​ແຫ່ງນຶ່ງ.

​ໃນ​ການ​ກະກຽມ​ຮັບ​ມື​ກັບຄວາມ​ຮຸນ​ແຮງທີ່​ອາດ​ເກີດ​ຂຶ້ນນັ້ນ ທາງ​ຕໍາຫຼວດ​ໄດ້​ຫ້າມ​ລົດ
ເກືອບ​ວ່າ ​ທັງ​ໝົດບໍ່​ໃຫ້​ອອກ​ແລ່ນ​ຢູ່​ຕາມຖະໜົນ​ຫົນທາງ ດັ່ງນັ້ນ ຈຶ່ງ​ເຮັດ​ໃຫ້​ຜູ້​ຄົນພາກັນ
​ຍ່າງ​ໄປ​ປ່ອນ​ບັດ ​ຢູ່​ຕາມ​ໜ່ວຍ​ປ່ອນ​ບັດ​ຕ່າງໆ ​ແລະ​ເລືອກ​ເອົາ​ຜູ້ສະມັກ ຈາກຫຼາຍ​ກວ່າ
100 ພັກ​ການ​ເມືອງ. ລັດຖະບານ​ໄດ້ປະກາດໃຫ້ພັກ​ການ​ເປັນ​ເວລາ 4 ​ມື້ ​ເພື່ອ​ອຳນວຍ
ໃຫ້​ຜູ້​ຄົນ​ມີ​ເວລາ​ ເດີນທາງ​ໄປ​ແລະ​ກັບ ​ສຳລັບ​ການ​ປ່ອນ​ບັດ.

ຜົນ​ຂອງ​ການ​ເລືອກ​ຕັ້ງ​ທີ່​ວ່າ​ນີ້ ແມ່ນ​ຈະ​ຊາບ​ຜົນ​ກັນ​ໃນ​ອາທິດ​ໜ້າ ຫຼັງ​ຈາກ​ການນັບ​ຄະ​ແນນ​
ສຽງ​ທີ່​ເລີ່​ມທະ​ຍອຍ​ເຂົ້າ​ມາ​ ຈາກໝູ່​ບ້ານ​ທີ່​ຫ່າງ​ໄກ​ສອກຫຼີກ​ຂອງ​ເນ​ປານ​ນັ້ນ.​

ເບິ່ງວີດີໂອ ກ່ຽວກັບຄວາມຫວັງຂອງຊາວເນປາລ ກ່ອນການເລືອກຕັ້ງ: