ປະຊາຊົນທີ່ໄດ້ຮັບຜົນກະທົບຈາກແຜ່ນດິນໄຫວໃນເນປານ ແມ່ນຂາດແຄນນຳດື່ມແລະສິ່ງຂອງຈຳເປັນຂັ້ນພື້ນຖານອື່ນໆ ໃນວັນອັງຄານມື້ນີ້ ໃນຂະນະທີ່ເຈົ້າໜ້າທີ່ຊ່ອຍກູ້ໄພ ແລະອົງການມະນຸດສະທຳ ໄດ້ສືບຕໍ່ດຳເນີນຄວາມພະຍາຍາມທີ່ຈະເຂົ້າໄປຍັງປະເທດດັ່ງກ່າວ ແລະ ຜູ້ຄົນຍັງຖືກທັບຖົມຢູ່ຕາມຊາກຫັກພັງຈາກເຫດແຜ່ນດິນໄຫວຄັ້ງນີ້.
ອົງການສະຫະປະຊາຊາດ ໄດ້ກ່າວວ່າ ໄພພິບັດຄັ້ງນີ້ ໄດ້ມີຜົນກະທົບຕໍ່ປະຊາຊົນ 8 ລ້ານຄົນ ຊຶ່ງຈຳນວນ 1 ລ້ານ 4 ແສນຄົນນັ້ນ ແມ່ນຕ້ອງການ ຄວາມຊ່ອຍເຫລືອໃນດ້ານເຂົ້າປາອາຫານ. ເຈົ້າໜ້າທີ່ໄດ້ກ່າວໃນວັນອັງຄານມື້ນີ້ວ່າ ຈຳນວນຜູ້ເສຍຊີວິດ ໄດ້ຖີບຕົວຂຶ້ນຫຼາຍກວ່າ 4 ພັນ 300 ຄົນແລ້ວ ແລະມີປະມານ 8 ພັນຄົນບາດເຈັບ. ພວກເຂົາໄດ້ກ່າວວ່າ ຈຳນວນຜູ້ເຄາະຮ້າຍ ອາດຈະເພີ້ມຂຶ້ນຕື່ມ ໃນຂະນະທີ່ພວກເຈົ້າໜ້າທີ່ກູ້ໄພ ໄດ້ຊ່ອຍເອົາພວກທີ່ຍັງຕົກຄ້າງຢູ່ຕາມຊາກຫັກພັງອອກມາ ແລະເຂົ້າໄປເຖິງຂົງເຂດທີ່ຫ່າງໄກສອກຫຼີກນັ້ນ.
ພາບກ່ຽວກັບແຜ່ນດິນໄຫວ ຢູ່ເນປາລ ວັນທີ 27 ເມສາ
ຜູ້ຄົນຈຳນວນບໍ່ໜ້ອຍ ໄດ້ພາກັນຫລັບນອນຕື່ມອີກຄືນນຶ່ງຢູ່ຂ້າງນອກ ຫຼືບໍ່ກໍ່ໃນຕູບຜ້າຕັ້ງ ໃນຂະນະທີ່ແຜ່ນດິນໄຫວ ທີ່ມີຄວາມແຮງ ຂະໜາດ 4 ແລະ 5 ຍັງສັ່ນສະເທືອນໃນຂົງເຂດ ທີ່ຕິດຕາມມາ ຂອງແຜ່ນດິນໄຫວ ທີ່ວັດແທກໄດ້ 7.8 ໃນວັນເສົາທີ່ຜ່່ານມານີ້.
ນັກຂ່າວຂອງ VOA ທ່ານ Steve Herman ຜູ້ຊຶ່ງປະຈຸບັນນີ້ ເກັບກຳຂ່່າວທີ່ນະຄອນຫຼວງ Kathmandu ໄດ້ກ່າວວ່າ ການເດີນທາງໄປຍັງນະຄອນຫຼວງຂອງປະເທດ ແມ່ນບໍ່
ປະເຊີນກັບບັນຫາໃດໆ ໃນວັນອັງຄານມື້ນີ້, ແຕ່ວ່າ ການທີ່ຈະເຂົ້າເຖິງຂົງເຂດທີ່ຢູ່ອ້ອມ ແອ້ມນັ້ນ ແມ່ນຍັງມີຄວາມທ້າທາຍຢູ່.
ເບິ່ງ: ພາບວີໂດ ທີ່ກ່ຽວຂ້ອງ ຈາກນັກຂ່າວ Zlatica Hoke ຈາກ VOA
ທ່ານ Steve Herman ໄດ້ກ່າວວ່າ “ຄວາມເປັນຫ່ວງກັງວົນທີ່ໃຫຍ່ຫຼວງທີ່ສຸດນັ້ນແມ່ນ ໝູ່ບ້ານທີ່ຢູ່ໃກ້ກັບ ຈຸດສູນກາງຂອງແຜ່ນດິນໄຫວ,” ຊຶ່ງທ່ານໄດ້ກ່າວວ່າ“ມັນບໍ່ມີທາງ
ທີ່ຈະເຂົ້າເຖິງຂົງເຂດທີ່ວ່ານີ້ດ້ວຍທາງລົດ. ວິທີທາງດຽວທີ່ຈະເຂົ້າໄປຮອດທີ່ນັ້ນແມ່ນ
ໂດຍທາງເຮືອບິນເຮລິຄອບເຕີ ແລະພວກເຮົາ ໄດ້ຮັບລາຍງານກ່ຽວກັບໝູ່ບ້ານນີ້ວ່າ ມີປະຊາຊົນປະມານ 500 ຄົນ ແລະອີກໝູ່ບ້ານນຶ່ງນັ້ນ ແມ່ນມີ ປະມານ 1 ພັນຄົນ ແລະມີໝູ່ບ້ານອື່ນໆ ໃນທຳນອງດຽວກັນນີ້ ແມ່ນຖືກທຳລາຍຮາບເປັນໜ້າກອງເລຍ.”
ເຈົ້າໜ້າທີ່ສາທາລະນະສຸກ ໄດ້ເຕື່ອນກ່ຽວກັບຄວາມສ່ຽງໃນການລະບາດຂອງພະຍາດ
ຕ່າງໆ ດ້ວຍຂາດແຄນນ້ຳດື່ມສະອາດ ແລະມີຜູ້ຄົນຮວມຕົວກັນຢູ່ຢ່າງເປັນກຸ່ມກ້ອນ
ໃນຈຳນວນຫຼວງຫຼາຍຂ້າງນອກກາງແປນນີ້.
