ສະພາແຫ່ງຊາດເນປານໄດ້ເລືອກຕັ້ງເອົາຜູ້ນໍາຂັ້ນອາວຸໂສ ທີ່ນິຍົມລັດທິເໝົາເຈີຕຸງ
ເປັນນາຍົກລັດຖະມົນຕີຄົນໃໝ່ຂອງປະເທດ.
ທ່ານ Baburam Bhattarai ສະມາຊິກພັກສາມັກຄີຄອມມີວນິດເນປານ ໄດ້ຮັບສຽງ
ສະໜັບສະໜຸນ 340 ສຽງໃນສະພາແຫ່ງຊາດທີ່ມີບ່ອນນັ່ງທັງໝົດ 601 ບ່ອນນັ່ງ
ໃນການລົງມະຕິໃນວັນອາທິດວານນີ້ ຫລັງຈາກໄດ້ຮັບການໜຸນຈາກພວກພັກການ
ເມືອງນ້ອຍໆຂອງປະເທດ. ທ່ານໄດ້ຊະນະການແຂ່ງຂັນກັບທ່ານ Ram Chandra
Poudel ຈາກພັກ Congress ຂອງເນປານ ທີ່ໄດ້ຮັບສຽງສະໜັບສະໜຸນ 235 ສຽງ.
ທ່ານ Bhattarai ໄວ 57 ປີຈະຂຶ້ນດໍາລົງຕໍາແໜ່ງແທນອະດີດນາຍົກ ລັດຖະມົນຕີ
Jhalnat Khanai ທີ່ໄດ້ລາອອກໄປໃນວັນທີ 14 ເດືອນນີ້ ຫລັງຈາກປະສົບກັບຄວາມ
ລົ້ມແຫລວ ບໍ່ສາມາດເຮັດໃຫ້ການດໍາ ເນີນຂັ້ນຕອນສ້າງສັນຕິພາບຂອງປະເທດ
ຄືບໜ້າຕໍ່ໄປໄດ້.
ທ່ານ Bhattarai ເປັນສະມາຊິກລະດັບສູງສຸດຄົນທີສອງຂອງອະດີດກຸ່ມກະບົດຄອມ
ມີວນິດ ຮອງຈາກທ່ານ Prachanda ທີ່ເປັນຫົວໜ້ານັ້ນ.
ພວກຫົວນິຍົມລັດທິເໝົາໄດ້ຮັບບ່ອນນັ່ງຫລາຍກວ່າພັກອື່ນໆໃນສະພາ ແຕ່ບໍ່ພຽງພໍ
ທີ່ຈະຕັ້ງລັດຖະບານຂຶ້ນຕາມລໍາພັງພັກດຽວ. ພັກດັ່ງກ່າວໄດ້ຮັບອະນຸຍາດໃຫ້ກັບຄືນ
ມາຮ່ວມກັບລັດຖະບານ ຫລັງຈາກບັນລຸຂໍ້ຕົກລົງສັນຕິພາບກັນໃນປີ 2006 ທີ່ໄດ້ເຮັດ
ໃຫ້ການກໍ່ການກະບົດຂອງພວກນິຍົມລັດທິເໝົາມາເປັນເວລານຶ່ງທົດສະວັດສິ້ນສຸດລົງ.
