ວັນຈັນມື້ນີ້ ເຈົ້າໜ້າທີ່ເນປາລພາກັນກຽມໂຕຮັບມື ກັບສະພາວະບໍ່ມີສະຖຽນລະພາບທາງດ້ານການເມືອງ ແລະກັບການປະທ້ວງຕາມຖະໜົນຫົນທາງ ທີ່ຄາດວ່າຈະມີຂຶ້ນເປັນເວລາຫຼາຍເດືອນ ຫຼັງຈາກສະພາແຫ່ງຊາດພາດກໍານົດເວລາເສ້ນຕາຍໃນເວລາທ່ຽງຄືນວັນອາທິດວານນີ້ ສໍາລັບໃຫ້ເສັດສິ້ນການຂຽນກົດໝາຍລັດຖະທໍາມະນູນສະບັບໃໝ່ ໃນຍຸກຫຼັງຈາກສົງຄາມນັ້ນ.
ທ່ານ Baburam Bhattarai ນາຍົກລັດຖະມົນຕີເນປາລ ໄດ້ອອກມາປະກາດໃນວັນອາທິດວານນີ້ວ່າ ສະພາຮ່າງລັດຖະທໍາມະນູນບໍ່ສາມາດບັນລຸເປົ້າໝາຍຂອງຕົນ ໃນການຮ່າງລັດຖະທໍາມະນູນໃໝ່ໃຫ້ສໍາເລັດນັ້ນ ແລະກ່າວຕໍ່ໄປວ່າ ທ່ານຈະດໍາລົງຕໍາແໜ່ງຢູ່ຕໍ່ໄປຈົນຮອດມີການເລືອກຕັ້ງເອົາສະພາຊຸດໃໝ່ ຊຶ່ງກໍານົດຈະມີຂຶ້ນໃນວັນທີ 22 ພະຈິກປີນີ້.
ລັດຖະບານໄດ້ສົ່ງພວກກໍາລັງຮັກສາຄວາມສະຫງົບໄປປະຈໍາການຢູ່ໃນ ທົ່ວນະຄອນຫຼວງ ກັດມັນດູ ໃຫ້ຢູ່ໃນທ່າຕຽມພ້ອມຢ່າງສູງ ຫຼັງຈາກພວກປະທ້ວງປະທະກັບພວກຕໍາຫຼວດຢູ່ນອກຕຶກສະພາແຫ່ງຊາດໃນວັນອາທິດວານນີ້.
ສະຫາຮ່າງລັດຖະທໍາມະນູນ ທີ່ຈັດຕັ້ງຂຶ້ນມາໃນປີ 2008 ຫຼັງຈາກ ການລົບລ້າງລະບົບລາຊາທິປະໄຕຂອງຊາວຮິນດູ ທີ່ປົກຄອງເນປາລ ມາຫຼາຍສັດຕະວັດ ໄດ້ຮັບມອບໝາຍໃຫ້ຮ່າງກົດໝາຍລັດຖະທໍາມະນູນໃໝ່ຂອງປະເທດ. ພວກສະມາຊິກສະພາຮ່າງລັດຖະທໍາມະນູນໄດ້ ຮັບການຕໍ່ອາຍຸສະໄໝການດໍາລົງຕໍາແໜ່ງມາ 4 ເທື່ອແລ້ວ ແຕ່ບັດນີ້ສານສູງສຸດໄດ້ປະຕິເສດ ຕໍ່ການຕໍ່ເວລາໃດໆຕື່ມອີກ.