ບັນດານັກເຈລະຈາຈາກ ອິຣ່ານ ແລະ ກຸ່ມຂອງບັນດາ 6 ປະເທດ ລວມມີ ສະຫະລັດ, ອັງກິດ, ຈີນ, ຝຣັ່ງ, ຣັດເຊຍ ແລະ ເຢຍລະມັນ ໄດ້ເຮັດວຽກຮ່ວມກັນໃນວັນຈັນມື້ນີ້ ເພື່ອປິດສາກການເຈລະຈາ 18 ເດືອນ ແລະ ສະຫຼຸບຂໍ້ຕົກລົງອັນຮັດກຸມ ເຊິ່ງໃຊ້ເວລາດົນນານຂອງພວກເພ່ິນ ກ່ຽວກັບໂຄງການນິວເຄລຍຂອງ ອິຣ່ານ.
ລັດຖະມົນຕີຕ່າງປະເທດ ອິຣ່ານ ທ່ານ Abbas Aragchi ໄດ້ສະແດງຄວາມຫວັງ, ແຕ່ກ່າວວ່າ ບາງບັນຫາຍັງຄົງມີຢູ່ ແລະ ວ່າ ທ່ານບໍ່ສາມາດໃຫ້ຄຳສັນຍາວ່າ ການແກ້ໄຂບັນຫາຈະບັນລຸໃນຕອນທ້າຍ ຂອງມື້ຫຼືບໍ່. ບັນດານັກການທູດໄດ້ໃຫ້ຮ່ອງຮອຍໃນວັນອາທິດວານນີ້ວ່າ ທັງສອງຝ່າຍແມ່ນໃກ້ຈະສຳເລັດການຮ່າງເອກະສານອັນຊັບຊ້ອນຂອງຕົນ.
ວັນຈັນມື້ນີ້ ແມ່ນຄັ້ງຫຼ້າສຸດທີ່ບັນດານັກເຈລະຈາໄດ້ກຳນົດເສັ້ນຕາຍຫຼາຍຄັ້ງ ເຊິ່ງພວກເຂົາໄດ້ກຳນົດຂຶ້ນມາເອງ, ແຕ່ວ່າເຈົ້າໜ້າທີ່ການຕ່າງປະເທດຂອງ ອິຣ່ານ ທ່ານ Alireza Miryousefi ໄດ້ກ່າວວ່າ, ບໍ່ມີໃຜຄິດວ່າຈະຍືດເວລາຂອງການເຈລະຈາອອກໄປອີກແລ້ວ.
ທ່ານໄດ້ກ່າວໄວ້ໃນ Twitter ວ່າ “ທຸກຄົນໄດ້ເຮັດວຽກຢ່າງໜັກເພື່ອຫາຄຳວ່າ ຕົກລົງ ໃນມື້ນີ້, ແຕ່ການຮຽກຮ້ອງທາງດ້ານການເມືອງແມ່ນຍັງຄົງມີຢູ່.”
ໃນຂະນະດຽວກັນ, ລັດຖະມົນຕີຕ່າງປະເທດຂອງ ຈີນ ທ່ານ ຫວັງຢີ ກໍໄດ້ກ່າວວ່າ ສະຖານະການແມ່ນເຂົ້າສະພາບດີສຳລັບ “ການຕົກລົງທີ່ຈະມີຂຶ້ນ.”
ທ່ານໄດ້ກ່າວວ່າ “ພວກເຮົາເຊື່ອວ່າ ການເຈລະຈາບໍ່ຄວນທີ່ຈະຖືກເລື່ອນອອກໄປອີກແລ້ວ.”
ທ່ານ ຫວັງ ແລະ ບັນດາຄູ່ຮ່ວມເຈລະຈາຈາກ ສະຫະລັດ, ອັງກິດ, ຈີນ, ຝຣັ່ງ, ຣັດເຊຍ ແລະ ເຢຍລະມັນ ໄດ້ຈັດການປະຊຸມສ່ວນຕົວຂອງພວກເພິ່ນ ກ່ອນທ່ຽງຂອງວັນຈັນມື້ນີ້ໃນນະຄອນ ຫຼວງ ວຽນນາ. ລັດຖະມົນຕີຕ່າງປະເທດຂອງ ອັງກິດ ທ່ານ Philip Hammond ແມ່ນມີກຳນົດທີ່ເຂົ້າຮ່ວມການເຈລະຈາ ໃນເວລາຕໍ່ມາໃນມື້ນີ້.
ໃນຂະນະທີ່ການເຈລະຈາໄດ້ເລີ່ມຂຶ້ນ, ນັກຂ່າວຄົນໜຶ່ງໄດ້ຖາມ ລັດຖະມົນຕີຕ່າງປະເທດ ສະຫະລັດ ທ່ານ John Kerry ວ່າຈະມີການຍືດເວລາອອກອີກບໍ່, ແຕ່ທ່ານ Kerry ບໍ່ໄດ້ໃຫ້ຄຳຕອບຫຍັງ.
