ຄືນຄ່ຳນີ້ ວັນນະສອນຈະພາທ່ານຜູ້ຟັງໄປຮ່ວມມ່ວນຊື່ນ
ແລະຮຽນຮູ້ກັບເລື້ອງລາວຂອງຊາວລາວໃນຕ່າງແດນ
ໂດຍສະເພາະຊາວຫຼວງພະບາງ ຊຶ່ງການຈັດງານສັງສັນ
ຄັ້ງທຳອິດ ໄດ້ຈັດຂຶ້ນເມື່ອປະມານ 5 ປີກ່ອນໜ້ານີ້ ຫຼັງຈາກ
ທີ່ໄດ້ຈັດງານປະສົບຜົນສຳເລັດແລ້ວແລະມີການຕອບຮັບ
ຢ່າງດີແລ້ວນັ້ນ ແລະກໍໄດ້ທີການຮຽກຮ້ອງໃຫ້ມີຂຶ້ນອີກ
ແລະນັ້ນລະ ຄືເປັນຈຸດເກີດຂອງຄັ້ງທີ່ 2 ຕາມມາ ທີ່ໄດ້
ຈັດຂຶ້ນໃນທ້າຍເດືອນຕຸລາຜ່ານມານີ້ເມືອງໄດ້ ທີ່ນະຄອນ
Las Vegas, Nevada. ການຈັດງານຄັ້ງທີ 2 ນີ້ ຖືວ່າ
ປະສົບຜົນສຳເລັດຢ່າງໃຫຍ່ຫຼວງ ເປັນພິເສດຊຶ່ງໄດ້ມີ
ແຂກຜູ້ເຂົ້າຮ່ວມ ຫຼາຍກວ່າ 500 ຄົນ ທີ່ໄດ້ເດີນທາງ
ມາຈາກຫຼາຍທະວີບ ໃນທົ່ວໂລກເຊັ່ນ: ອອສເຕຣເລຍ,
ຢູໂຣບ, ເອເຊຍ, ແລະສະຫະລັດ.
ການຈັດງານຄັ້ງນີ້ ມີຂຶ້ນຮວມກັນທັງໝົດ 3 ມື້ ດ້ວຍກັນ ຊຶ່ງເລີ້ມຕົ້ນຕັ້ງແຕ່ແລງວັນສຸກ ທີ່ເອີ້ນກັນວ່າ “Meet and Greet” ເພື່ອຈັດໃຫ້ແຂກທີ່ຖະຍອຍກັນເຂົ້າມານັ້ນໄດ້ check in ຮັບເອົາເອກກະສານທີ່ລົງທະບຽນຕ່າງໆ ມີການໂອ້ລົມ ຖາມຂ່າວກັນ ມ່ວນຊື່ນລື້ນເລີງ ຮ້ອງເພງລຳວົງ ວົງດົນຕີກໍຄົບຊຸດ ໃນບັນຍາກາດແບບເປັນກັນເອງທີ່ໜ້າຮັກ ຊຶ່ງຕ່າງຄົນ ຕ່າງກໍຕຽມໃຈແລະຕຽມພ້ອມໃນການເປີດງານຢ່າງເປັນທາງການໃນວັນເສົາ ມື້ຕໍ່ມາ.
ຫ້ອງສະແດງດົນຕີ concert ລະດັບມາດຕະຖານສາກົນ
ຂອງໂຮງແຮມ Sam’s Town ຄັບແຄບລົງທັນທີ ຊຶ່ງຖືກ
ຈັດຕຽມພ້ອມງົດງາມຕະການຕາ ມີປ້າຍ ເຄື່ອງເອ້ ປະດັບ
ປະດາ ໃຫ້ເປັນແບບຫຼວງພະບາງຂະໜານແທ້...ປະດັບ
ດ້ວຍປູເຍີ ຍ່າເຍີ ຊຶ່ງເປັນສັນຍາລັກຂອງເທວະດາຫຼວງ
ທີ່ຊາວຫຼວງພະບາງບູຊາແລະນັບຖື ເພື່ອໃຫ້ເພິ່ນໄດ້ຄຸ້ມ
ຄອງ ປົກປັກຮັກສາ ໃຫ້ຢູ່ເຟັນເປັນສຸກ ເຖິງແມ່ນວ່າ ຈະໄປ
ຢູ່ແຫ່ງຫົນໃດກໍຕາມ ຊາວຫຼວງພະບາງ ຍັງມີຄວາມຮູ້ສຶກແບບນີ້ ຮັກສາເຄົ້າຄອງເດີມສືບທອດສະເໜີມາ ແລະຈະຕະຫຼອດໄປ.
ນັ້ນແມ່ນບາງຕອນຂອງການກ່າວເປີດງານຕ້ອນຮັບແຂກຂອງປະທານຈັດງານ ຍາເອື້ອຍບົວວັນ ຫຼັງຈາກທີ່ ໄດ້ກ່າວເປີດພິທີຢ່າງເປັນທາງການເປັນພາສາລາວແລ້ວ ກໍແມ່ນທ່ານອະນຸຣັກ ສຸຂະເສີມ ນຶ່ງໃນຄະນະກຳມະການຈັດງານຂຶ້ນກ່າວຕ້ອນຮັບແຂກເປັນພາສາອັງກິດ ເພື່ອໃຫ້ແຂກທີ່ເຂົ້າຮ່ວມທີ່ບໍ່ແມ່ນຄົນລາວໄດ້ເຂົ້າໃຈ.
ພ້ອມດຽວກັນນັ້ນທ່ານ ໄຊປຣະເສີດ ຣັດຕະນົງຕາງໜ້າຈາກ
ອອສເຕຣເລຍ, ຍາເອື້ອຍນາຣີ ສີສະວັສ ມ້າວຄຳຜີວ ຕົວແທນ
ຈາກການາດາ ແລະຕົວແທນຈາກເອີໂຣບ ໄດ້ແກ່ ທ່ານຈັ ນທະບູນ
ແກ້ວຣາສີ ຊຶ່ງຕ່າງຕົນກໍກ່າວໃນທຳນອງທີ່ມີຄວາມໝາຍແບບ
ດຽວກັນ ທີ່ວ່າ “ດີໃຈທີ່ໄດ້ມາພົບພໍ້ກັນ ຫຼັງຈາກທີ່ໄດ້ພັດພາກ
ກັນມານານ 30-40 ແລ້ວ.” ດັ່ງຕໍ່ໄປນີ້:
ໃນຊ່ວງທີ່ຮັບປະທານອາຫານນັ້ນ ວົງດົນຕີ Lao Vegas
ກໍໄດ້ມາກ່ອມອາລົມແຂກຜູ້ມີກຽດພ້ອມນີ້ກໍໄດ້ມີຫຼາກຫຼາຍ
ສິນລະປິນ ກິຕິມະສັກ ຂຶ້ນຮ້ອງເພງຂັບກ່ອມ ໃນບັນຍາກາດ
ອົບອຸ່ນ ຮັກຫໍ່ໂຮມກັນ ແບບກິນເຂົ້າເຄົ້າສຽງເພງໄປພ້ອມໆກັນ ພ້ອມນີ້ ທາງລາຍການ ສຽງກະຊິບຮວມເຜົ່າລາວ ຈາກ Philadelphia PA ກໍໄດ້ມາບັນທຶກງານແລະສຳພາດຕ່າງໆນາໆ ຊຶ່ງໄດ້ນຳສະເໜີທາງ TV ທີ່ນຳພາໂດຍສອງສາມີ ພັນລະຍາ ທ່ານສົມບູນ ແລະຍານາງມາລາສະຫວັນ ສຸຂະຜົນ.
ນອກຈາກທີ່ໄດ້ຮັບປະທານອາຫານແຊບແລະມ່ວນຊື່ນລຳວົງສາມັກຄີກັນແລ້ວ ກໍໄດ້ມີ
ຫຼາກຫຼາຍບຸກຄົນທີ່ເດີນທາງມາຈາກຫຼາຍໆບ່ອນ ຊຶ່ງຕ່າງຄົນຕ່າງກໍໄດ້ສະແດງເຖິງຄວາມ
ເຫັນຂອງການຮ່ວມຄັ້ງນີ້ ຊຶ່ງວັນນະສອນໄດ້ເກັບກຳສຳພາດກັບປະທານຈັດງານ ຕ່າງໜ້າ
ຂອງຫຼາຍໆປະເທດຮວມທັງແຂກຜູ້ມີກຽດທີ່ເຂົ້າຮ່ວມໃນງານ ຊຶ່ງວ່າ ໃຜຈະເປັນໃຜນັ້ນ ຂໍເຊີນທ່ານຮັບຟັງການສຳພາດໄດ້ເລີຍ:
ຈຸດເດັ່ນຂອງງານຄົງເປັນການສະແດງແບບເສື້ອຜ້າພື້ນເມືອງ
ຫຼວງພະບາງຂະໜານແທ້ ນັບຕັ້ງແຕ່ ຊຸດຜູ້ເຖ້າ ຜູ້ແກ່
ທີ່ສ່ວມໃສ່ຢູ່ໃນບ້ານແລະໄປວັດ ຈົນຮອດຊຸດລາຕີໃໝ່ທັງແບບ
ດັ້ງເດີ້ມແລະປະຍຸກ ທີ່ເປັນຝືໄມ້ລາຍມືຂອງຊາວລາວ ຊາວ
ຫຼວງພະບາງ. ນອກນັ້ນຍັງມີການສະແດງຊຸດລະຄອນ ເລື້ອງພະລັກ ພະລາມ ແລະເຊັ່ນ: ຫະນຸມານ ພິເຜກ ແລະຊຸດນາງແກ້ວ ນຳອີກ ຊຸດທີ່ເດັ່ນສຸດ ເຫັນຈະເປັນຊຸດນາງສັງຄານ ທີ່ວັນນະສອນ ຖືເປັນກຽດ ໄດ້ສວມໃສ່ຈາກການອຸບປະຖຳເສື້ອຜ້າແລະໜ້າ ຜົມ ຂອງຍາເອື້ອຍກິນນະລີ ບານຸວົງແລະຍາເອື້ອຍ ບາງທອງ ຈິນດາວັນ ຊຶ່ງຄ່ຳຄືນນັ້ນ ຍາເອື້ອຍຍາງທອງ ພ້ອມດ້ວຍສາມີ ກໍໃຫ້ກຽດເດີນແບບ ໃສ່ ຊຸດສາລະບັບ ເປັນເຈົ້າສາວໃນພິທີອະພິເສກຣົດ ແບບຕົ້ນສະບັບ ລາດຊະວັງຫຼວງພະບາງເລີຍ…ບັນຍາກາດລວມໆແລ້ວ ເຮັດໃຫ້ຫຼາຍໆທ່ານທີ່ເຂົ້າຮ່ວມ ນ້ຳຕາຄໍເປົ້າ ຄິດຮອດອະດີດໃຄວາມເກົ່າຄວາມຫຼັງ ເມື່ອຄັ້ງຍັງເຍົາໄວພຸ້ນ...
ການສະແດງທີ່ນັບວ່າຂາດບໍ່ໄດ້ນັ້ນ ກໍຄົງແມ່ນການຮ້ອງເພງໝູ່ ຮ້ອງເພງທີ່ກ່ຽງກັບຫຼວງພະບາງ ແລະການສະແດງທີ່ພິເສດອີກອັນນຶ່ງແມ່ນ ການອ່ານໜັງສື ຂັບສະຫຼາມ ສາມສາວຂອງໜຸ່ມສາວ ຂັບກ້ຽວຈີບກັນ ແລ້ວ ກໍລົງທ້າຍດ້ວຍການຂັບທຸ້ມຫຼວງພະບາງ ທີ່ຂັບຮ້ອງໂດຍທ່ານ ກິ່ງໄຊ Robert ແລະຍາເອື້ອຍນາຣີ ສີສະວັສ ມ້າວຄຳຜີວ ....
ນອກຈາກການສະໜຸກສະໜານໃນວັນງານແລ້ວ. ໃນຕອນບ່າຍວັນອາທິດ ກໍໄດ້ມີການ ກິນເຂົ້າສາມັກຄີ ສະບັບແທ້ຫຼວງພະບາງ. ກິດຈະກຳທີ່ໜ້າຮັກແລະສະໜຸກສະໜານອີກອັນນຶ່ງແມ່ນການລະຫຼິ້ນແບບພື້ນເມືອງລາວທີ່ມີທັງ ແກ້ສ້າວ, ແລ່ນຖົງ ຄາບໄຂ່ ເປັນຕົ້ນ. ສະຫຼຸບພາບລວມແລ້ວກໍແມ່ນວ່າ ງານສັງສັນຄັ້ງນີ້ ຖືວ່າ ດີເລີດ ປະເສີດສີ ຈຶ່ງພາໃຫ້ມີການຮຽກຮ້ອງໃຫ້ຈັດຂຶ້ນອີກຕື່ມ ແຕ່ຄົງຈະບໍ່ເຖິງ ອີກ 5 ປີ ເພາະຫຼາຍໆທ່ານວ່າ ອາດຈະບໍ່ມີອາຍຸຍືນຮອດ 5 ປີ.
ວັນນະສອນຂໍຕາງໜ້າຊາວຫຼວງພະບາງແລະແຂກທີ່ມາຮ່ວມໃນງານ ຂໍຂອບໃຈມາຍັງຄະນະກຳມະການທຸກຝ່າຍທີ່ເຮັດໃຫ້ງານນີ້ຈົບລົງດ້ວຍດີ ທຸກປະການແລະຫວັງວ່າໂອກາດໜ້າ ວັນນະສອນຄົງໄດ້ມີໂອກາດເຂົ້າຮວ່ມ ແລະນຳສະເໜີເລື້ອງລາວຊາວຫຼວງພະບາງ ມາສະເໜີທ່ານຜູ້ຟັງອີກ ພ້ອມນີ້ ວັນນະສອນຂໍຝາກບົດກອນນີ້ ໄວ້ແກ່
ຊາວລາວ ຊາວຫຼວງພະບາງທຸກໆທ່ານ ໃຫ້ຮັກຫໍ່ໂຮມກັນ ດັ່ງເນື້ອໃນຂອງບົດກອນນີ້ ທີ່ປະພັນໂດຍ ທ່ານ ບຸນຜົງ ແກ້ວດາຣາ ພົມທະວົງ.
