ເຈົ້າໜ້າທີ່ຢູເຄຣນກ່າວວ່າ ພວກຕົນໄດ້ເລີ້ມຕົ້ນຖອນທະຫານ
ອອກຈາກ ເຂດກັນຊົນ ໃນພາກຕາເວັນອອກຂອງປະເທດ ບ່ອນ
ທີ່ເຂົາເຈົ້າໄດ້ຕໍ່ສູ້ກັບພວກຢາກແຍກດິນແດນທີ່ນິຍົມຣັດເຊຍນັ້ນ.
ໂຄສົກກອງທັບຢູເຄຣນ ກ່າວໃນວັນຈັນມື້ນີ້ວ່າ ການໂຈມຕີຂອງ
ພວກກະບົດໄດ້ຫລຸດລົງ ຊຶ່ງອຳນວຍໃຫ້ Kyiv ຈັດຕັ້ງປະຕິບັດຂໍ້
ຕົກລົງທີ່ໄດ້ບັນລຸກັນ ໃນອາທິດແລ້ວນີ້ ກັບພວກຢາກແຍກດິນ
ແດນ ທີ່ຈະຈັດຕັ້ງເຂດກັນຊົນ ໄລຍະ 30 ຫລັກກິໂລແມັດຂຶ້ນນັ້ນ.
ໃນວັນອາທິດວານນີ້ ຢູເຄຣນກ່າວວ່າ ຕົນຈະບໍ່ຖອນກຳລັງທະ
ຫານຂອງຕົນອອກ ຈົນກວ່າການລະເມີດຂໍ້ຕົກລົງຢຸດຍິງ ຈະ
ຢຸດຕິລົງ ແລະວ່າ ການລະເມີດຫລາຍໆຄັ້ງ ຍັງມີຂຶ້ນຢູ່.
ເລື້ອງຢູເຄຣນຈະຢູ່ໃນອັນດັບຕົ້ນ ຂອງກອງປະຊຸມສະມັດຊາໃຫຍ່ສະຫະປະຊາຊາດ ຢູ່
ນະຄອນນິວຢອກໃນສັບປະດານີ້. ແຕ່ປະທານາທິບໍດີຣັດເຊຍ ທ່ານ Vladimir Putin
ຈະບໍ່ໄປຮ່ວມ. ລັດຖະມົນຕີຕ່າງປະເທດ Sergei Lavrov ຈະໄປມີໜ້າແທນ. ຢ່າງໃດກໍ
ຕາມ ເຈົ້າໜ້າທີ່ວັງແຄຣມລິນກ່າວວ່າ ທ່ານພູຕິນຈະໄປຮ່ວມກອງປະຊຸມສຸດຍອດຂອງກຸ່ມ
G20 ຢູ່ອອສເຕຣເລຍ ໃນເດືອນພະຈິກ ບ່ອນທີ່ ແນ່ນອນວ່າ ບັນຫາຢູເຄຣນຈະຄອບງຳ
ການສົນທະນາຫາລືກັນ.
ໃນວັນອາທິດວານນີ້ເຊັ່ນກັນ ປະຊາຊົນຣັດເຊຍຫຼາຍພັນຄົນໄດ້ອອກມາເດີນຂະບວນຢູ່ນະຄອນຫລວງມົສກູ ປະທ້ວງວັງ Kremlin ທີ່ສະໜັບ ສະໜຸນ ຊາວຢູເຄຣນທີ່ຢາກແບ່ງແຍກດິນແດນນັ້ນ.
ຜູ້ປະທ້ວງຄົນນຶ່ງ ກ່າວຕໍ່ວີໂອເອ ວ່າ ປະທານາທິບໍດີ Vladimir Putin ກຳລັງລາກຣັດເຊຍເຂົ້າໄປສູ່ຄວາມວຸ້ນວາຍ ລັດທິຊາດນິຍົມ ແລະ ລັດທິຟາສິສທ໌.
ພວກປະທ້ວງທີ່ເປັນຝ່າຍກົງກັນຂ້າມຈຳນວນນຶ່ງ ຜູ້ທີ່ສະໜັບສະໜຸນ ວັງ Kremlin ໄດ້ອອກມາຮ້ອງໃສ່ພວກເດີນຂະບວນວ່າ ທໍລະຍົດຕໍ່ຊາດ. ມີການປະທະຍູ້ກັນໄປມາແລະຕົບຕີກັນເກີດຂຶ້ນ ລະຫວ່າງທັງສອງຝ່າຍ ເຖິງແມ່ນວ່າ ຈະມີກຳລັງຕຳຫລວດຍາມຢູ່ຫລາຍ ກໍຕາມ.