ຕໍາຫຼວດໃນຊິຄາໂກ ໄດ້ຈັບກຸມພວກປະທ້ວງຢ່າງນ້ອຍ 45 ຄົນ ຫຼັງຈາກໄດ້ເກີດການປະທະກັນ ກັບພວກເຈົ້າໜ້າທີ່ ຢູ່ທາງນອກສະຖານທີ່ຈັດກອງປະຊຸມສຸດຍອດຂອງ NATO ນັ້ນ.
ພວກປະທ້ວງຕໍ່ຕ້ານສົງຄາມ ຈໍານວນຫຼາຍພັນຄົນ ໄດ້ປະກອບສ່ວນໃນການປະທ້ວງທີ່ຂ້ອນຂ້າງສະງົບໃນວັນອາທິດວານນີ້ ແຕ່ພໍຕົກແລງມາ ພວກປະທ້ວງຈໍານວນນຶ່ງ ໄດ້ພະຍາຍາມຈະລໍ້າເສ້ນທີ່ເຈົ້າໜ້າທີ່ຕໍາຫລວດຢືນຢູ່ ເພື່ອຕັນພວກປະທ້ວງບໍ່ໃຫ້ເຂົ້າໄປໃນຕຶກປະຊຸມ ທີ່ຕັ້ງຢູ່ຂ້າງທະເລສາບ ບ່ອນທີ່ບັນດາຜູ້ນໍາແລະຂະນະຜູ້ແທນ ຈາກ 50 ປະເທດ ພວມປະຊຸມກັນຢູ່ນັ້ນ.
ປະຊາຊົນຫລາຍກຸ່ມ ພາກັນປະທ້ວງກອງປະຊຸມເນໂຕ້ ດ້ວຍສາເຫດຕ່າງໆກັນ:
ຕໍາຫຼວດໃນຊຸດເຄື່ອງແບບປາມການຈະລາຈົນ ໄດ້ໃຊ້ໄມ້ຄ້ອນ ຮັບມືກັບພວກປະທ້ວງ ຫຼັງຈາກທີ່ພວກປະທ້ວງໄດ້ແກ່ວງແກ້ວແລະສິ່ງຂອງອື່ນໆ ໃສ່ພວກຕໍາຫຼວດ. ມີຕໍາຫຼວດ 4 ຄົນໄດ້ຮັບບາດເຈັບເລັກນ້ອຍຈາກການປະທະກັນດັ່ງກ່າວນີ້.
ການປະທ້ວງຂອງວັນອາທິດນັ້ນແມ່ນຕິດຕາມມາ ຫຼັງຈາກທີ່ໄດ້ມີການປະທ້ວງ ລະດັບ
ນ້ອຍກ່ວາຫຼາຍຄັ້ງທີ່ສະງົບ ໃນສອງມື້ກ່ອນໜ້ານີ້.
ເຊົ້າວັນອາທິດ ກ່ອນໜ້າການປະທະກັນນັ້ນ ຕໍາຫຼວດກ່າວວ່າ ມີຊາຍສອງຄົນ ຖືກຈັບກຸມ
ໃນຂໍ້ຫາວາງແຜນການທີ່ຈະເຮັດລະເບີດ ເພື່ອໃຊ້ໃນຂະນະທີ່ກອງປະຊຸມດໍາເນີນໄປຢູ່ນັ້ນ.