ກອງປະຊຸມສຸດຍອດ ອົງການເນໂຕ້

ພວກຜູ້ນຳ 28 ປະເທດຂອງກຸ່ມພັນທະມິດເນໂຕ້ພວມ
ປະຊຸມກັນຢູ່ປະເທດປອກຕຸຍກາລເພື່ອສົນທະນາຫາລື
ກ່ຽວກັບສົງຄາມໃນອັຟການິສຖານ ທີ່ດຳເນີນມາເປັນ
ເວລາ 9 ປີແລ້ວນັ້ນ.

ເລຂາທິການໃຫຍ່ຂອງອົງການເນໂຕ້ ທ່ານ Anders
Fogh Rasmussen ກ່າວທີ່ນະຄອນຫຼວງລິສບອນ
ໃນວັນເສົາມື້ນີ້ວ່າ ກອງປະຊຸມດັ່ງກ່າວ ແມ່ນຂີດໝາຍ
ຂອງການເລີ້ມຕົ້ນ ໄລຍະການປະຕິບັດງານໃໝ່ ຢູ່ໃນ
ອັຟການິສຖານ.

ເປັນທີ່ຄາດກັນວ່າ ພວກຜູ້ນຳເຫຼົ່ານີ້ຈະໃຫ້ການຮັບຮອງເອົາແຜນການທີ່ກຳນົດໃຫ້ທະຫານ
ຂອງອົງການເນໂຕ້ມອບໂອນການຮັກສາຄວາມປອດໄພໃຫ້ແກ່ທະຫານລັດຖະບານອັຟກາ
ນິສຖານໃນປີໜ້າ ຊຶ່ງເປັນການເລີ້ມຕົ້ນຂັ້ນຕອນໃນການມອບໂອນທີ່ແນໃສ່ໃຫ້ແລ້ວສຳເລັດ
ພາຍໃນທ້າຍປີ 2014.

ປະທານາທິບໍດີອັຟການິສຖານ ທ່ານຮາມິດ ກາໄຊ ກໍໄປຮ່ວມການປະຊຸມໃນ ວັນເສົາມື້ນີ້.

ໃນວັນສຸກວານນີ້ຊຶ່ງເປັນມື້ເປີດກອງປະຊຸມສຸດຍອດເປັນເວລາ 2 ມື້ນັ້ນພວກຜູ້ນຳຂອງອົງ ການເນໂຕ້ໄດ້ບັນລຸການຕົກລົງກ່ຽວກັບການສ້າງລະບົບປ້ອງກັນລູກສອນໄຟທີ່ຈະກວມເອົາ
ທຸກໆປະເທດສະມາຊິກຂອງເນໂຕ້ ຮວມທັງສະຫະລັດອະເມຣິການຳດ້ວຍ.