ບັນດາຜູ້ນໍາຂອງກຸ່ມເນໂຕ້ກໍາລັງເພ່ງເລັງໃສ່ເລື້ອງອັຟການິສຖານໃນມື້ທີສອງຂອງກອງ
ປະຊຸມສຸດຍອດຂອງກຸ່ມພັນທະມິດ ຢູ່ Chicago ລັດອິລລີນອຍ ໃນຂະນະທີ່ພວກເຂົາ
ເຈົ້າວາງແນວທາງສໍາລັບກ້າວເດີນຕໍ່ໄປ ຫຼັງຈາກໄດ້ທໍາສົງຄາມມາເປັນເວລານຶ່ງທົດສະ
ວັດແລ້ວນັ້ນ.
ຄາດວ່າພວກເຈົ້າໜ້າທີ່ເຫຼົ່ານີ້ຈະເສັດສິ້ນວາງແຜນການໃນວັນຈັນມື້ນີ້ ສໍາລັບການມອບ
ໂອນອໍານາດໃນການຄວບຄຸມວຽກງານຮັກສາຄວາມປອດໄພໄປໃຫ້ອັຟການິສຖານພາຍ
ໃນກາງປີໜ້າ ກ່ອນກໍານົດການຖອນກໍາລັງຕ່າງປະເທດສ່ວນໃຫຍ່ອອກໄປພາຍໃນທ້າຍ
ປີ 2014 ນັ້ນ.
ໃນວັນອາທິດວານນີ້ ປະທານາທິບໍດີ Hamid Karzai cເຫ່ງອັຟການິສຖານຢືນຢັນຄັ້ງ
ໃໝ່ເຖິງຄວາມໝາຍໝັ້ນຂອງລັດຖະບານຂອງທ່ານ ຕໍ່ຕາລາງເວລາດັ່ງກ່າວນັ້ນ ເພື່ອບໍ່ໃຫ້ອັຟການິສຖານເປັນພາລະແບກ ຫາບສໍາລັບປະຊາຄົມໂລກຕໍ່ໄປອີກ.
ແຕ່ທ່ານ Anders Fogh Rasmussen ຫົວໜ້າກຸ່ມເນໂຕ້ ກ່າວວ່າຈະບໍ່ມີຄວາມຟ້າວ
ຟັ່ງໃດໆໃນການຖອນອອກໄປນັ້ນ ແລະວ່າ ກຸ່ມເນໂຕ່ຍັງຄົງມີຄວາມໝາຍໝັ້ນຕໍ່ການ
ເປັນພາຄີໄລຍະຍາວກັບປະຊາ ຊົນອັຟການິສຖານ ກາຍປີ 2014 ໄປອີກ.
ເວລານີ້ ມີທະຫານຕ່າງປະເທດປະມານ 130 ພັນຄົນຍັງປະຕິບັດງານ ຢູ່ໃນອັຟການິສ
ຖານ ອັນເປັນພາກສ່ວນນຶ່ງຂອງກໍາລັງປະສົມເນໂຕ້ ພາຍໃຕ້ການນໍາພາຂອງສະຫະລັດ.
ໃນສັບປະດາແລ້ວນີ້ ທ່ານ Francois Hollande ປະທານາທິບໍດີທີ່ຖືກເລືອກຕັ້ງໃໝ່
ຂອງຝຣັ່ງ ໄດ້ຢືນຢັນຄໍາໝັ້ນສັນຍາຂອງທ່ານຄືນອີກວ່າ ຈະຖອນກໍາລັງສູ້ລົບຂອງ ຝຣັ່ງ
ທັງໝົດ ອອກຈາກອັຟການິສຖານໄປພາຍໃນທ້າຍປີນີ້. ຝຣັ່ງມີ ທະຫານປະມານ 3300 ຄົນຢູ່ໃນອັຟການິສຖານ ຊຶ່ງເປັນຈໍານວນຫລາຍອັນດັບ 5 ທີ່ເຂົ້າປະກອບສ່ວນໃນກໍາ
ລັງປະສົມນັ້ນ.