ຫົວໜ້າຂອງອົງການເນໂຕໄດ້ປະນາມການເພີ້ມທະວີກິດຈະ
ການທາງທະຫານທີ່ໄດ້ສ້າງຄວາມວິຕົກກັງວົນຂອງຣັດເຊຍ
ໃນຊີເຣຍ ນຶ່ງມື້ຫຼັງຈາກມົສກູ ໄດ້ຍິງລູກສອນໄຟນຳວິຖີ ຊຶ່ງ
ເປັນພາກສ່ວນນຶ່ງ ຂອງການໂຈມຕີທາງອາກາດ ຕໍ່ພວກຕໍ່
ຕ້ານ ລັດຖະບານຊີເຣຍ.
ທ່ານ Jen Stoltenberg ໄດ້ໃຫ້ຄວາມເຫັນດັ່ງກ່າວ ໃນວັນ
ພະຫັດມື້ນີ້ ໃນຂະນະທີ່ທ່ານເດີນທາງໄປຮ່ວມກອງປະຊຸມ
ລັດຖະມົນຕີປ້ອງກັນປະເທດຂອງອົງການເນໂຕ ໃນນະຄອນ
Brusselsບ່ອນທີ່ຄາດກັນວ່າການແຊກແຊງຂອງຣັດເຊຍ ໃນ
ສົງຄາມກາງເມືອງຂອງຊີເຣຍ ນັ້ນ ຈະເປັນຫົວຂໍ້ສຳຄັນຂອງ
ກອງປະຊຸມ.
ບັນຫາດັ່ງກ່າວນີ້ ແມ່ນໄດ້ມີຄວາມສຳຄັນຂຶ້ນອີກ ຫຼັງຈາກທີ່ມີລາຍງານໃນສັບປະດານີ້ວ່າ ເຮືອບິນລົບອາຍພົ່ນຂອງຣັດເຊຍ ທີ່ໄດ້ເຂົ້າຮ່ວມການໂຈມຕີທາງອາກາດໃນຊີເຣຍໄດ້ລະ ເມີດເຂດນ່ານຟ້າຂອງເທີກີ ຊຶ່ງເປັນສະມາຊິກປະເທດນຶ່ງຂອງອົງການພັນທະມິດເນໂຕ
ທີ່ໄດ້ຮັບການສະໜັບສະໜຸນຈາກສະຫະລັດນັ້ນ.
ທ່ານ Stoltenberg ໄດ້ກ່າວວ່າ: “ອົງການເນໂຕ ແມ່ນພ້ອມແລ້ວ ແລະສາມາດປົກປ້ອງພັນທະມິດທັງໝົດ ຊຶ່ງຮວມມີເທີກີ ຕໍ່ການຂົ່ມຂູ່ໃດໆກໍຕາມ. ອົງການເນໂຕ ໄດ້ຕອບໂຕ້ ໂດຍການເພີ່ມສະມັດຖະພາບ ຄວາມສາມາດຂອງພວກເຮົາທີ່ຈະສົ່ງກອງກຳລັງໄປຍັງ
ພາກໃຕ້ ຊຶ່ງຮວມທັງເທີກີ ນຳ.”
ບັນດາລັດຖະມົນຕີ ປ້ອງກັນປະເທດຂອງອົງການເນໂຕ ຈະໃຊ້ກອງປະຊຸມໃນວັນພະຫັດມື້ນີ້ ເພື່ອພະຍາຍາມຫາທາງຜ່ອນເບົາວິກິດການດັ່ງກ່າວລົງ ອິງຕາມລັດຖະມົນຕີປ້ອງກັນປະເທດຂອງອັງກິດ ທ່ານ Michael Fallon ທີ່ໄດ້ກ່າວວ່າ “ຣັດເຊຍ ແມ່ນຍິ່ງເຮັດໃຫ້ສະຖານະການທີ່ຮ້າຍແຮງຢູ່ແລ້ວໃນຊີເຣຍນັ້ນ ເປັນອັນຕະລາຍຫຼາຍຂຶ້ນ.”
ທ່ານ Fallon ໄດ້ບອກກັບພວກນັກຂ່າວ ກ່ອນທີ່ຈະເຂົ້າຮ່ວມກອງປະຊຸມວ່າ “ສິ່ງດຽວທີ່
ທາງຣັດເຊຍ ຈະຊ່ອຍໄດ້ ແມ່ນການໃຊ້ອິດທິພົນຂອງຕົນ ຍຸດຕິປະທານາທິບໍດີຊີເຣຍ ທ່ານ Bashar al-Assad ບໍ່ໃຫ້ຖິ້ມລະເບີດໃສ່ປະຊາຊົນຂອງຕົນເອງ.”
ລັດຖະມົນຕີ ປ້ອງກັນປະເທດສະຫະລັດ ທ່ານ Ashton Carter ຊຶ່ງຈະເຂົ້າຮ່ວມໃນການສົນທະນາຫາລືນັ້ນ ໃນວັນພຸດວານນີ້ ໄດ້ຕຳນິຕິຕຽນຢ່າງແຮງ ຕໍ່ການປະຕິບັດງານທາງທະຫານຂອງຣັດເຊຍ ແລະປະຕິຍານວ່າ ວໍຊີງຕັນຈະບໍ່ປະສານງານກັບຣັດເຊຍ ກ່ຽວກັບ
ເລື້ອງນີ້.
