ທ່ານ Anders Fogh Rasmussen ຫົວໜ້າກຸ່ມເນໂຕ້ ກ່າວວ່າພັນທະມິດເນໂຕ້ໄດ້ທໍາການທົດສອບລະບົບປ້ອງກັນລູກສອນໄຟຂອງຕົນສໍາລັບຢູໂຣບນັ້ນ ຢ່າງສໍາເລັດຜົນ.
ໃນບົດຄິດເຫັນທີ່ຂຽນລົງໃນໜັງສືພິມ The Wall Street Journalທ່ານ Rasmussen ກ່າວວ່າ ກຸ່ມເນໂຕ້ວາງແຜນທີ່ຈະປະກາດໃຫ້ຮູ້ ກ່ຽວກັບອັນທີ່ເອີ້ນວ່າ “ສະມັດຖະພາບຊົ່ວຄາວ” ດັ່ງກ່າວຂອງລະບົບ ຕໍ່ຕ້ານລູກສອນໄຟນໍາວີຖີຂອງຕົນ ທີ່ກອງປະຊຸມໃນທ້າຍເດືອນນີ້. ທ່ານ Rasmussen ກ່າວຕື່ມວ່າ ລະບົບດັ່ງກ່າວຍັງຈະຢູໃນລະດັບຈໍາກັດຢູ່ ແຕ່ການພັດທະນາລະບົບນີ້ຂຶ້ນມາ ຈະເປັນຂີດໝາຍຂອງບາດກ້າວທີ່ແທ້ຈິງທໍາອິດ ໄປສູ່ການປົກປ້ອງພວກປະເທດສະມາຊິກທັງໝົດຂອງກຸ່ມເນໂຕ້ ໃນຢູໂຣບນັ້ນ.
ທ່ານ Rasmussen ໄດ້ເນ້ນເຖິງໄພຂົ່ມຂູ່ຂອງພວກລູກສອນໄຟຕ່າງໆ ໂດຍກ່າວວ່າ ມີຫຼາຍກວ່າ 30 ປະເທດທີ່ມີເຕັກໂນໂລຈີເຊ່ນນີ້ ແລະວ່າ ໃນຂະນະທີ່ກຸ່ມເນໂຕ້ຢາກທໍາການແກ້ໄຂບັນຫາຕ່າງໆທາງດ້ານການທູດ ແຕ່ເນໂຕ້ກໍຈະຕ້ອງສາມາດຕອບໂຕ້ຕໍ່ຜູ້ຮຸກຮານໃດໆກໍຕາມ ທີ່ບໍ່ຍອມຮັບເອົາຄວາມພະຍາຍາມເຫຼົ່ານັ້ນ.
ຣັດເຊຍຄັດຄ້ານຕໍ່ລະບົບປ້ອງກັນລູກສອນໄຟໃນຢູໂຣບ ນັບແຕ່ມີການລິເລີ້ມໂຄງການນີ້ມາ ໂດຍກ່າວວ່າ ມັນເປັນໄພຂົ່ມຂູ່ຕໍ່ຄວາມໝັ້ນຄົງຂອງຣັດເຊຍ. ລັດຖະມົນຕີປ້ອງກັນປະເທດຂອງຣັດເຊຍກ່າວໃນຕົ້ນເດືອນນີ້ວ່າ ຣັດເຊຍ ກຸ່ມເນໂຕ້ ແລະສະຫະລັດຍັງບໍ່ທັນໄດ້ພົບເຫັນການແກ້ໄຂທ່ີເປັນທີ່ຮັບເອົາໄດ້ຈາກທຸກພັກຝ່າຍເທື່ອ.