ລິ້ງ ສຳຫລັບເຂົ້າຫາ

ວັນອັງຄານ, ໑໖ ກໍລະກົດ ໒໐໒໔

ບັນ​ດາ​ປະ​ມຸກ​ລັດ​ຂອງ​ອົງ​ການ NATO ຈະ​ປະ​ຊຸມ​ກັນ​ໃນ​ນະ​ຄອນຫຼວງ ວ​ໍ​ຊິງ​ຕັນ ຢູ່ກອງ​ປຸ​ຊຸມ​ສຸດຍອດ


ກອງ​ທັບ​ບົກ ສະ​ຫະ​ລັດ ທຳ​ການ​ສະ​ແດງ​ຕີ​ກອງ ແລະ ເປົ່າ​ແກ ໃນ​ລະ​ຫວ່າງ​ງານ​ລະ​ນຶກ​ເຖິງວັນ​ຄົບ​ຮອບ 75 ປີ​ຂອງ​ການ​ສ້າງ​ຕັ້ງ​ອົງ​ການ NATO ຢູ່​ຫໍ​ປະ​ຊຸມ Andrew W. Mellon, ນະ​ຄອນຫຼວງ ວໍ​ຊິງ​ຕັນ, 9 ກໍ​ລະ​ກົດ, 2024.
ກອງ​ທັບ​ບົກ ສະ​ຫະ​ລັດ ທຳ​ການ​ສະ​ແດງ​ຕີ​ກອງ ແລະ ເປົ່າ​ແກ ໃນ​ລະ​ຫວ່າງ​ງານ​ລະ​ນຶກ​ເຖິງວັນ​ຄົບ​ຮອບ 75 ປີ​ຂອງ​ການ​ສ້າງ​ຕັ້ງ​ອົງ​ການ NATO ຢູ່​ຫໍ​ປະ​ຊຸມ Andrew W. Mellon, ນະ​ຄອນຫຼວງ ວໍ​ຊິງ​ຕັນ, 9 ກໍ​ລະ​ກົດ, 2024.

ບັນ​ດາ​ປະ​ມຸກ​ລັດຂອງ​ປະ​ເທດ​ສະ​ມາ​ຊິກ​ອົງ​ການ NATO ຈະ​ເຕົ້າ​ໂຮມ​ກັນ​ໃນ​ນະ​ຄອນຫຼວງ ວໍ​ຊິງ​ຕັນ ວັນ​ພຸດມື້ນີ້ ສຳ​ລັບ​ການ​ປະ​ຊຸມ​ທີ່​ເພັ່ງ​ເລັງ​ໃສ່​ການ​ເຮັດ​ວຽກ​ເພື່ອ​ບັນ​ລຸ​ເປົ້າ​ໝາຍ​ໃນ​ກອງ​ປະ​ຊຸມ​ສຸດຍອດ ໃນ​ຂະ​ນະ​ທີ່​ເຂົາ​ເຈົ້າ​ພະ​ຍາ​ຍາມ​ທີ່​ຈະ​ຂະ​ຫຍາຍ​ການ​ສະ​ໜັບ​ສະ​ໜູນ​ຂອງ​ພັນ​ທະ​ມິດ​ນັ້ນ​ສຳ​ລັບ ຢູ​ເຄ​ຣນ ແລະ ເສີມ​ຂະ​ຫຍາ​ຍ​ການ​ປ້ອງ​ກັນ​ປະ​ເທດ​ຂອງ​ເຂົາ​ເຈົ້າເອງ ແລະ ຄວາມ​ພະ​ຍາ​ຍາມ​ຍັບ​ຢັ້ງ.

ການ​ເຈ​ລະ​ຈາ​ດັ່ງ​ກ່າວ​ໄດ້​ດຳ​ເນີນ​ມາຫຼາຍ​ເດືອນ​ແລ້ວ​ໃນ​ລະ​ດັບ​ທີ່​ຕ່ຳ​ກວ່າ, ລວມ​ທັງ​ກອງ​ປະ​ຊຸມ​ຂອງ​ບັນ​ດາ​ລັດ​ຖະ​ມົນ​ຕີການ​ຕ່າງ​ປະ​ເທດ NATO ໃນ​ຕົ້ນ​ປີນີ້, ແຕ່​ບັດ​ນີ້​ມັນ​ຂຶ້ນ​ກັບ​ບັນ​ດາ​ຜູ້​ນຳ​ທີ່​ຈະ​ທຳ​ກາ​ນ​ຕົກ​ລົງ​ຄັ້​ງ​ສຸດ​ທ້າຍ​ຂອງ​ເຂົາ​ເຈົ້າ.

ແຜນ​ການ​ຂອງວັນ​ພຸດ​ມື້ນີ້​ຈະ​ປິດ​ລົງ​ດ້ວຍຂໍ້​ຄວາມ​ທາງ​ສັງ​ຄົມ, ດ້ວຍ​ປະ​ທາ​ນາ​ທິ​ບໍ​ດີ ສະ​ຫະ​ລັດ ທ່ານ ໂຈ ໄບ​ເດັນ ຈະ​ຈັດ​ງານ​ຮັບ​ປະ​ທານ​ອາ​ຫານ​ຄ່ຳ​ສຳ​ລັບ​ບັນ​ດາ​ພັນ​ທະ​ມິດ​ຂອງ​ອົງ​ການ NATO ຢູ່​ທຳ​ນຽບ​ຂາວ.

ດ້ວຍ​ອົງ​ການ NATO ປະ​ເຊີນ​ກັບ​ສິ່ງ​ທີ່​ອາດ​ເປັນ​ການ​ທົດ​ສອບ​ທີ່​ໃຫຍ່​ທີ່​ສຸດ​ຂອງ​ເຂົາ​ເຈົ້າ​ໃນ​ປະ​ຫວັດ​ສາດ 75 ປີ​ນັ້ນ, ທ່ານ ໄບ​ເດັນ ໃນ​ວັນ​ອັງ​ຄານ​ວານນີ້​ໄດ້​ໃຫ້​ການ​ອະ​ທິ​ບາຍ​ທີ່​ເຂັ້ມ​ແຂງ​ສຳ​ລັບ​ສັນ​ຕິ​ພາບ​ຜ່ານ​ຄວາມເຂັ້ມ​ແຂງ.

ທ່ານ ໄບ​ເດັນ ກ່າວ, ໃນ​ການ​ໃຫ້​ຄຳ​ເຫັນ​ໃນ​ຕອນ​ເລີ່ມ​ຕົ້ນ​ຂອງກອງ​ປະ​ຊຸມ​ສຸດຍອດ​ສາມ​ວັນ​ວ່າ “ມັນ​ດີ​ທີ່​ພວກ​ເຮົາ​ແຂ່ງ​ແກ່ນ​ຂຶ້ນກວ່າທີ່​ເຄີຍ​ມີ​ມາ. ເພາະ​ວ່າ​ຊ່ວງ​ເວ​ລານີ້​ໃນ​ປະ​ຫວັດ​ສາດ​ໄດ້​ຮຽກ​ຮ້ອງ​ສຳ​ລັບ​ຄວາມ​ແຂ່ງ​ແຂ່ງ​ລວມ​ກັນ​ຂອງ​ພວກ​ເຮົາ.”

ທ່ານ​ກ່າວ​ວ່າ “ພວກ​ຜະ​ເດັດ​ການ​ຢາກ​ທີ່​ຈະ​ຕ່າວ​ປີ້ນ​ຄວາມ​ເປັນ​ລະ​ບຽບ​ຂອງ​ໂລກ, ເຊິ່ງ​ສ່ວນ​ໃຫຍ່​ຖືກ​ຮັກ​ສາ​ໄວ້​ໄດ້​ເກືອບ 80 ປີ​ແລ້ວ ແລະ ກຳ​ລັງ​ນັບ​ຕໍ່​ໆ​ໄປ. ພວກ​ກຸ່ມ​ກໍ່​ການ​ຮ້າຍ​ສືບ​ຕໍ່​ວາງ​ແຜນ​ການ​ທີ່​ຊົ່ວ​ຮ້າຍ, ເພື່ອ​ທຳ​ຮ້າຍ​ຜູ້​ອື່ນ ແລະ ​ສ້າງຄວາມ​ວຸ້ນ​ວາຍ ແລະ ຄວາມ​ທຸກ​ທໍ​ລະ​ມານ. ໃນ​ຢູ​ໂຣບ, ສົງ​ຄາມ​ຂອງ​ທ່ານ ປູ​ຕິນ ເພື່ອ​ຮຸກ​ຮານ​ປະ​ເທດ ຢູ​ເຄ​ຣນ ກໍ​ໄດ້​ສືບ​ຕໍ່​ໄປ.”

ທ່ານ​ເວົ້າ​ຕື່ມ​ວ່າ “ແລະ ທ່ານ ປູ​ຕິນ ບໍ່​ຢາກ​ໄດ້​ຫຍັງ​ໜ້ອຍກວ່າ, ບໍ່​ມີ​ຫຍັງ​ໜ້ອຍກວ່າ​ການ​ປາບ​ປາບ ຢູ​ເຄ​ຣນ ທັງ​ໝົດ, ເພື່ອ​ສິ້ນ​ສຸດ​ປະ​ຊາ​ທິ​ປະ​ໄຕ​ຂອງ ຢູ​ເຄ​ຣນ, ເພື່ອ​ທຳ​ລາຍ​ວັດ​ທະ​ນະ​ທຳ​ຂອງ ຢູ​ເຄ​ຣນ ແລະ ເພື່ອ​ລຶບ ຢູ​ເຄ​ຣນ ອອກ​ຈາກ​ແຜນ​ທີ່. ແລະ ພວກ​ເຮົາ​ກໍ​ຮູ້​ແລ້​ວ່າ ທ່ານ ປູ​ຕິນ ຈະ​ບໍ່​ຢຸດ​ຢູ່​ທີ່ ຢູ​ເຄ​ຣນ. ແຕ່​ຢ່າ​ເຮັດ​ຜິດ​ພາດ: ຢູ​ເຄ​ຣນ ສາ​ມາດ ແລະ ຈະ​ຢຸດ​ທ່ານ ປູ​ຕິນ.”

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG