ເຖິງແມ່ນວ່າ ຈະບໍ່ມີຄວາມແນ່ນອນເທື່ອກ່ຽວກັບຈຳນວນຂອງກຳລັງທະຫານສະຫະລັດໃນ ອັຟການິສຖານ ໃນອະນາຄົດກໍຕາມ ແຕ່ຜູ້ບັນຊາການທະຫານສ່ວນໃຫຍ່ຂອງອົງການເນໂຕ ກ່າວວ່າ ພວກເຂົາເຈົ້າຍັງບໍ່ມີແຜນການ ທີ່ຈະຖອນກຳລັງຂອງຕົນອອກຈາກປະເທດສົງຄາມແຫ່ງນີ້ ປະທານຄະນະກຳມະການທະຫານຂອງອົງການເນໂຕ ໄດ້ກ່າວໃນວັນພຸດວານນີ້.
ທ່ານ Petr Pavel ໄດ້ບອກກັບບັນດານັກຂ່າວ ໃນສຳນັກງານໃຫຍ່ຂອງອົງການເນໂຕທີ່ນະຄອນ Brussels ວ່າ “ມັນເປັນທີ່ຮັບຮູ້ໂດຍທົ່ວໄປແລ້ວໂດຍພັນທະມິດສ່ວນໃຫຍ່ ຂອງ ອົງການເນໂຕ” ທີ່ວ່າ ພວກເຂົາເຈົ້າ “ຍັງຈະຕ້ອງຮັກສາກອງກຳລັງໃນລະດັບເທົ່າເດີມຢູ່ທີ່ອັຟການິສຖານ” ທ່ານໄດ້ກ່າວວ່າ ການຕັດສິນໃຈດັ່ງກ່າວແມ່ນເປັນຍ້ອນມີຄວາມເຊື່ອວ່າ “ສະຖານະການຢູ່ທີ່ນັ້ນ ແມ່ນຍັງບໍ່ທັນເໝາະສົມເທື່ອ” ສຳຫຼັບເນໂຕທີ່ຈະຖອນກຳລັງອອກໄປ.
ປະທານາທິບໍດີສະຫະລັດ ທ່ານ ບາຣັກ ໂອບາມາ ໄດ້ຮຽກຮ້ອງໃຫ້ຫລຸດກຳລັງສະຫະລັດໃນອັຟການິສຖານ ລົງຈາກ 9 ພັນ 800 ຄົນມາເປັນປະມານ 5 ພັນ 500 ຄົນ ໃນທ້າຍ ປີນີ້. ຍ້ອນການມີໜ້າທີ່ສຳຄັນ ຂອງກຳລັງທະຫານສະຫະລັດໃນອັຟການິສຖານ ແຜນການໃນອະ ນາຄົດຂອງອົງການເນໂຕ ຢູ່ອັຟການິສຖານ ຈຶ່ງໄດ້ຢຸດຊະງັກລົງ ໃນຂະນະທີ່ລັດຖະບານ ຂອງສະຫະລັດພະຍາຍາມທີ່ຈະຕັດສິນໃຈວ່າຈະປະຕິບັດຕາມແຜນການຖອນທະຫານ ຕາມໝາຍກຳໜົດການຂອງຕົນຫຼືບໍ່?
ເຈົ້າໜ້າທີ່ຂອງອົງການເນໂຕ ໄດ້ກ່າວໃນວັນພຸດວານນີ້ວ່າ “ພວກເຮົາແມ່ນລໍຖ້າເບິ່ງ ການຕັດສິນໃຈບັ້ນສຸດທ້າຍທີ່ວ່າ ແມ່ນຫຍັງແທ້ທີ່ຈະເກີດຂຶ້ນ ເພື່ອທີ່ພວກເຮົາຈະສາມາດດຳເນີນການໃນສິ່ງໃດກໍຕາມທີ່ໄດ້ມີການຕົກລົງກັນໄປນັ້ນ.”
ທ່ານ Pavel ໄດ້ກ່າວວ່າ ຜູ້ບັນຊາການຂອງອົງການເນໂຕໄດ້ຮຽກຮ້ອງໃຫ້ມີການປະຕິບັດ ງານ “ທີ່ສາມາດປັບປ່ຽນໄດ້” ອິງຕາມສະຖານະການຕົວຈິງທາງພາກພື້ນດິນ.
ຜູ້ບັນຊາການສູງສຸດຄົນໃໝ່ ຂອງອົງການພັນທະມິດເນໂຕ ໃນພາກພື້ນຢູໂຣບ ນາຍພົນ Curtis M. Scaparrotti ໄດ້ກ່າວເພີ້ມຕື່ມວ່າ ກອງກຳລັງອັຟການິສຖານ ກ່ອນອື່ນໝົດ ຈະຕ້ອງເປັນກອງກຳລັງທີ່ສາມາດປ້ອງກັນຕົນເອງໃຫ້ໄດ້ ກ່ອນທີ່ອັຟການິສຖານຈະບໍ່ກາຍເປັນບ່ອນຫລົບລີ້ຂອງພວກກໍ່ການຮ້າຍໄດ້ອີກຕໍ່ໄປ.
ການໃຫ້ຄວາມເຫັນດັ່ງກ່າວແມ່ນໄດ້ທີ່ສະທ້ອນໃຫ້ເຫັນ ຄຳໃຫ້ການກ່ອນໜ້ານີ້ ຂອງນາຍພົນ John Cambell ຂອງສະຫະລັດ ຊຶ່ງເປັນຜູ້ບັນຊາການຂອງກອງກຳລັງນາໆຂາດໃນ ອັຟການິສຖານ ໃນຂະນະນັ້ນ.
