ບັນດາລັດຖະມົນຕີປ້ອງກັນປະເທດຂອງກຸ່ມເນໂຕ້ ທີ່ເຂົ້າຮ່ວມກອງປະຊຸມເປັນເວລາ 2 ມື້ຢູ່
ນະຄອນ Brussels ໄດ້ຮ່ວມສົມທົບກັບສະຫະລັດ ແລະຝຣັ່ງຮຽກຮ້ອງໃຫ້ກອງກຳລັງຂອງ
ອັຟການິສຖານຮັບເອົາບົດບາດນຳພາໃນການປະຕິບັດງານສູ້ລົບທັງໝົດຢູ່ໃນປະເທດດັ່ງກ່າວ
ພາຍໃນປີ 2013 ນຶ່ງປີໄວກວ່າທີ່ໄດ້ວາງແຜນໄວ້ໃນຂັ້ນຕົ້ນ.
ເລຂາທິການໃຫຍ່ຂອງອົງການເນໂຕ້ ທ່ານ Anders-Fogh Rasmussen ກ່າວຕໍ່ກອງ
ປະຊຸມວ່າທ່ານໃຫ້ການສະໜັບສະໜຸນຕໍ່ຕາຕະລາງເວລາໃໝ່ແຕ່ກໍກ່າວຢໍ້າວ່າທາງອົງການ
ເນໂຕ້ບໍ່ມີແຜນການທີ່ຈະຖອນທະຫານອອກຈາກອັຟການິສຖານໄວກ່ອນກຳນົດ. ທ່ານເວົ້າ
ວ່າອົງການເນໂຕ້ຄາດວ່າຈະມີການມອບບັນດາແຂວງຈຸສຸດທ້າຍໃຫ້ແກ່ອັຟການິສຖານພາຍ
ໃນກາງປີ 2013 ແລະນັບແຕ່ນັ້ນໄປບົດບາດຂອງທະຫານອົງການເນໂຕ້ ກໍຈະຄ່ອຍໆປ່ຽນ
ໄປຈາກການສູ້ລົບເປັນການໃຫ້ຄວາມສະໜັບສະໜຸນ.
ທ່ານ Rasmussen ກ່າວຕື່ມວ່າ ການເຄື່ອນໄຫວໃດໆກໍຕາມ ຂອງແຕ່ລະປະເທດພັນທະ
ມິດຈະຕ້ອງໄດ້ມີການປະສານງານກັນກັບກອງບັນຊາການທະຫານເນໂຕ້ ທີ່ນະຄອນຫຼວງກາ
ບູລ.
ລັດຖະມົນຕີກະຊວງປ້ອງກັນປະເທດສະຫະລັດທ່ານ Leon Panetta ແລະປະທານາທິບໍ
ດີຝຣັ່ງທ່ານ Nicolas Sarkozy ໄດ້ສະເໜີແນະວ່າກຳລັງປະສົມຈະສິ້ນສຸດການມີບົດບາດ
ໃນການສູ້ລົບໃນປີ 2013 ນຶ່ງປີໄວ້ກວ່າທີ່ໄດ້ວາງແຜນໄວ້. ທ່ານ Panetta ເອີ້ນປີ 2013
ວ່າ ເປັນປີທີ່ມີຄວາມສຳຄັນໃນການມອບໂອນຂັ້ນສຸດທ້າຍເຂດຕ່າງໆທີ່ຍັງເຫຼືອຢູ່ນັ້ນໃຫ້ແກ່
ກອງກຳລັງຮັກສາຄວາມສະຫງົບຂອງອັຟການິສຖານແຕ່ທ່ານກໍກ່າວຕື່ມວ່າຍັງບໍ່ທັນມີການ
ຕັດສິນໃຈໃດໆເທື່ອ ກ່ຽວກັບລະດັບຂອງກຳລັງທະຫານຂອງສະຫະລັດ ທີ່ຍັງເຫຼືອຢູ່ໃນອັຟ
ການິສຖານ ເວລາໃດທີ່ບົດບາດໃນການສູ້ລົບສິ້ນສຸດລົງແລ້ວ.
ໃນລະຫວ່າງກອງປະຊຸມເປັນເວລາ 2 ມື້ ບັນດາລັດຖະມົນຕີປ້ອງກັນປະເທດຂອງອົງການ
ເນໂຕ້ຈະໄດ້ຮັບຟັງການລາຍງານ ຂອງຜູ້ບັນຊາການເນໂຕ້ໃນອັຟການິສຖານຄືນາຍພົນທະ
ຫານມາຣີນ John Allen ຂອງສະຫະລັດ. ນອກນັ້ນບັນດາລັດຖະມົນຕີຂອງເນໂຕ້ຍັງຈະ
ພາກັນສຶກສາເບິ່ງວ່າ ແຜນການຂອງຝຣັ່ງແລະສະຫະລັດທີ່ຈະສິ້ນສຸດບົດບາດການສູ້ລົບໃນ
ປີ 2013 ນັ້ນ ເປັນແຜນການທີ່ສາມາດປະຕິບັດໄດ້ຫຼືບໍ່.
ທີ່ກຸງວໍຊິງຕັນ ທ່ານ Jay Carney ໂຄສົກຂອງທຳນຽບຂາວ ກ່າວວ່າ ຂັ້ນຕອນໃນການ
ໂອນອຳນາດຂອງອົງການເນໂຕ້ໄປໃຫ້ກຳລັງອັຟການິສຖານນັ້ນ ໄດ້ເລີ່ມມາແລ້ວແລະກໍຈະ
ດຳເນີນຕໍ່ໄປ. ທ່ານເວົ້າວ່າ ກຳລັງສະຫະລັດອາດເປັນໄປໄດ້ທີ່ຈະສືບຕໍ່ມີບົດບາດໃນການສູ້
ລົບໄປຈົນຮອດທ້າຍປີ 2014.
