ອົງການອະວະກາດ ຫຼືນາຊາຂອງສະຫະລັດ ພວມນຳເອົາຕົວຢ່າງດິນຈາກດາວເຄາະນ້ອຍທີ່ໄດ້ຮັບຈາກຍານອະວະກາດເມື່ອເດືອນແລ້ວນີ້ອອກມາໃຫ້ເບິ່ງ ອີງຕາມລາຍງານຂອງອົງການຂ່າວເອພີ.
ພວກນັກວິທະຍາສາດແລະຜູ້ນຳອົງການອະວະກາດສະຫະລັດເຂົ້າຮ່ວມໃນການເປີດເຜີຍຄັ້ງໃຫຍ່ ທີ່ສູນກາງອະວະກາດຈອນສັນ ໃນນະຄອນຮຸສຕັນ ເມື່ອວັນພຸດວານນີ້.
ຝຸ່ນແລະກ້ອນຫີນສີດຳດຶກດຳບັນເຫຼົ່ານີ້ ແມ່ນມາຈາກດາວເຄາະນ້ອຍທີ່ອຸດົມສົມບູນໄປດ້ວຍທາດຄາບອນ ຊື່ວ່າ ເບັນນູ ຊຶ່ງຢູ່ຫ່າງອອກໄປ ປະມານ 60 ລ້ານໄມລ໌ ຫຼື 90 ກວ່າລ້ານກິໂລແມັດ.
ຍານອະວະກາດຂອງອົງການນາຊາ ໄດ້ລົງໄປຕັກເອົາຕົວຢ່າງຝຸ່ນແລະກ້ອນຫີນເຫຼົ່ານີ້ເມື່ອ 3 ປີກ່ອນແລະຫຼັງຈາກນັ້ນກໍໄດ້ຖິ້ມລົງມາໃນລະຫວ່າງບິນຜ່ານໂລກເມື່ອເດືອນແລ້ວນີ້.
ພວກນັກວິທະຍາສາດຄາດວ່າ ຈະໄດ້ຮັບຕົວຢ່າງຝຸ່ນແລະກ້ອນຫິນ ຢ່າງໜ້ອຍ 1 ຈອກຊຶ່ງນັບເປັນເທື່ອທຳອິດທີ່ໄດ້ນຳມາຈາກດາວເຄາະນ້ອຍ. ພວກເຂົາເຈົ້າຍັງບໍ່ແນ່ເທື່ອວ່າ ຍານອະວະກາດ ໄດ້ນຳກັບມາຫຼາຍປານໃດ ຍ້ອນວ່າຕົວຢ່າງຝຸ່ນແລະຫີນດັ່ງກ່າວນີ້ ຍັງບໍ່ທັນເປີດເທື່ອ.
