ອົງການອະວະກາດຂອງສະຫະລັດ ຫຼື NASA ໄດ້ສົ່ງຍານອະກາດລຳນຶ່ງຂຶ້ນໄປປະຕິບັດງານ ເພື່ອທົດລອງຄວາມສາມາດທີ່ຈະທຳລາຍກ້ອນຫີນໃຫຍ່ ຫລື ແອສເຕີຣອຍ ໃຫ້ອອກຈາກເສັ້ນທາງໂຄຈອນທີ່ອາດເປັນໄປໄດ້ສູງວ່າຈະຕຳກັນກັບໂລກ ອັນເປັນໄພອັນຕະລາຍນັ້ນ.
ພາລະກິດທີ່ເອີ້ນວ່າການທົດລອງຫັນປ່ຽນທິດທາງສອງກ້ອນຫີນແອສເຕີຣອຍຫຼື DART (ດາຣຕ໌) ຈະໃຊ້ເວລາ 10 ເດືອນ ເພື່ອຈະໄປເຖິງກ້ອນຫີນແອສເຕີຣອຍ ຊື່ວ່າ ດີມໍຟອສ (Dimorphos) ກ່ອນທີ່ຍານອະວະກາດຈະແລ່ນເຂົ້າຕຳ ດ້ວຍຄວາມໄວ 24,000 ກິໂລແມັດ ຕໍ່ຊົ່ວໂມງ.
ກ້ອນຫີນໃຫຍ່ ດີມໍຟອສ ບໍ່ໄດ້ເປັນໄພອັນຕະລາຍໃດໆຕໍ່ໂລກ ແຕ່ມັນຈະໃຫ້ພວກນັກວິທະຍາສາດຊອກຫາວິທີທາງ ເພື່ອສຶກສາຄົ້ນຄວ້າແນວຄິດ ທີ່ອາດຈະເຄື່ອນຍ້າຍວັດຖຸ ອັນເປັນໄພອັນຕະລາຍ ອອກໄປໃຫ້ໄກພຽງພໍ ແລະໄວພຽງພໍຈາກເສັ້ນໂຄຈອນຂອງມັນ ເພື່ອວ່າ ມັນຈະບິນຜ່ານໂລກໄປ.
ພາລະກິດຍານອະວະກາດ DART ແມ່ນມີຂະໜາດປະມານຊໍ່າກັບລົດນ້ອຍຄັນນຶ່ງ ແລະບັນຈຸດ້ວຍຍານນ້ອຍ ຂະໜາດຫີບໜ່ວຍນຶ່ງ ທີ່ຈະຖືກສົ່ງອອກໄປ ໃນເວລາບໍ່ດົນ ກ່ອນທີ່ຍານອະວະ ກາດ DART ຈະບິນເຂົ້າຕຳ ກ້ອນຫີນໃຫຍ່ນັ້ນ ເພື່ອທີ່ຍານນ້ອຍດັ່ງກ່າວ ຈະທຳການບັນທຶກພາບວີດີໂອ ຂອງເຫດການທີ່ເກີດຂຶ້ນ.
ອົງການ NASA ກ່າວວ່າ ພາລະກິດນີ້ ມີຄ່າໃຊ້ຈ່າຍປະມານ 330 ລ້ານໂດລາ.
