ເປັນຄັ້ງທຳອິດ ນັບຕັ້ງແຕ່ປີ 2011 ທີ່ມູນນິທິ Mo Ibrahim ໄດ້
ມອບລາງວັນຂອງຕົນ ສຳຫລັບຄວາມດີເດັ່ນໃນການເປັນຜູ້ນຳ
ອາຟຣິກາ ໃນວັນຈັນມື້ນີ້ ໂດຍສະດຸດີວຽກງານຂອງປະທານາທິບໍດີ
ນາມີເບຍ ທ່ານ Hifikepunye Pohamba ທີ່ກຳລັງຈະພົ້ນຈາກ
ຕຳແໜ່ງນັ້ນ ດ້ວຍລາງວັນເງິນ 5 ລ້ານດອນລາ.
ທ່ານ Pohamba ໄດ້ນຳພາ ນາມີເບຍ ນັບຕັ້ງແຕ່ປີ 2005 ເປັນ
ຕົ້ນມາ ແລະ ໄດ້ຖືກເລືອກເປັນສະໄໝທີສອງ ໃນປີ 2009 ຂະນະ
ທີ່ປະເທດໄດ້ຮັບສະຖຽນລະພາບທາງການເມືອງ.
ຄະນະກຳມະການມອບລາງວັນ ໄດ້ຊົມເຊີຍ ປະທານາທິບໍດີ
Pohamba ສຳຫລັບ “ການເປັນຜູ້ນຳທີ່ສະຫລາດສຸຂຸມ ແລະ ໜັກແໜ້ນ” ແລະ ການ
ສົ່ງເສີມປະຊາທິປະໄຕ ໃນລະຫວ່າງທີ່ທ່ານດຳລົງຕຳແໜ່ງຢູ່ນັ້ນ.
ຫົວໜ້າຄະນະກຳມະການ ທ່ານ Salim Ahmed Salim ກ່າວວ່າ “ນາມີເບຍໄດ້ຮັບ
ຊື່ສຽງຢ່າງໝັ້ນຄົງ ວ່າເປັນປະເທດປະຊາທິປະໄຕ ທີ່ມີການປົກຄອງທີ່ດີ ທຸ່ນທ່ຽງ
ແລະ ຮວມເອົາທຸກພັກຝ່າຍ ດ້ວຍການມີສື່ສັງຄົມທີ່ອິດສະຫລະ ແລະມີການ
ເຄົາລົບນັບຖື ຕໍ່ສິດທິມະນຸດ.”
ຄະນະກຳມະການ ຈະຈ່າຍເງິນໃຫ້ແກ່ ທ່ານ Pohamba ຈຳນວນ 5 ລ້ານດອນລາ ໃນ
ໄລຍະ 10 ປີ ຕໍ່ຈາກນັ້ນ ຈະມອບໃຫ້ທ່ານ ຕື່ມອີກ 200,000 ດອນລາ ຕໍ່ປີຫຼັງຈາກນັ້ນ.
ລາງວັນນີ້ ແມ່ນມອບໃຫ້ຜູ້ນຳອາຟຣິກາ ຜູ້ທີ່ໄດ້ຖືກເລືອກຕັ້ງຢ່າງເປັນປະຊາທິປະໄຕ ມີ
ຄວາມສາມາດ ແລະ ປະຕິບັດງານໄດ້ດີເລີດ ໃນຕຳແໜ່ງ ແລະ ອອກຈາກຕຳແໜ່ງໄປ
ໂດຍດີ ໃນເວລາທີ່ວາລະການດຳລົງຕຳແໜ່ງ ເສັດສິ້ນລົງ.
