ມຽນມາ ຕ້ອງການຢາກໃຫ້ ສະຖານທູດສະຫະລັດ ຢຸດໃຊ້ຄຳເວົ້າ “ໂຣຮິງຢາ” ເວລາກ່າວເຖິງຊົນກຸ່ມນ້ອຍທີ່ບໍ່ຖືກຮັບຮູ້ຂອງປະເທດ ອີງຕາມເຈົ້າໜ້າທີ່ລັດຖະ ບານຄົນນຶ່ງ ທີ່ໄດ້ກ່າວຕໍ່ວີໂອເອ ໃນວັນພຸດມື້ນີ້.
ທ່ານ Aung Lin ເລຂາທິການຖາວອນຂອງກະຊວງຕ່າງປະເທດ ກ່າວວ່າ “ພວກເຮົາຈະມີຄວາມດີໃຈ ຖ້າຫາກສະຖານທູດຢຸດເຊົາການໃຊ້ຄຳດັ່ງກ່າວ.” ທ່ານກ່າວເພີ້ມອີກວ່າ ການສືບຕໍ່ໃຊ້ຄຳເວົ້ານີ້ “ຈະບໍ່ຊ່ວຍຫຍັງສຳລັບພວກເຮົາ.”
ເຖິງຢ່າງໃດກໍດີ ເຈົ້າໜ້າທີ່ທ່ານນີ້ ກ່າວວ່າ ທ່ານ “ຍັງບໍ່ຮູ້ເທື່ອວ່າ” ໃນວັນອັງ ຄານວານນີ້ ທາງກະຊວງໄດ້ຂໍຮ້ອງຢ່າງເປັນທາງການໄປຫາສະຖານທູດຫລືບໍ່ ກ່ຽວກັບການໃຊ້ຄຳເວົ້າດັ່ງກ່າວ.
ໃນວັນພຸດມື້ນີ້ ສະຖານທູດໄດ້ປະຕິເສດບໍ່ຍອມໃຫ້ຄວາມກະຈ່າງແຈ້ງກ່ຽວກັບວ່າ ໄດ້ ມີການສົນທະນາໃນເລື້ອງດັ່ງກ່າວໃນມື້ວານນີ້ຫຼືບໍ່ດັ່ງທີ່ໄດ້ລາຍງານໂດຍ ສື່ມວນຊົນ. ໂຄສົກສະຖານທູດຄົນນຶ່ງໃນນະຄອນຢ່າງກຸ້ງ ທີ່ບໍ່ປະສົງອອກຊື່ ກ່າວຕໍ່ ວີໂອເອ ວ່າ “ພວກເຮົາບໍ່ໃຫ້ຄວາມເຫັນໃນການສົນທະນາທາງການທູດກັບລັດຖະບານ.”
ເອກອັກຄະລັດຖະທູດສະຫະລັດ ທ່ານ Scot Marciel ໃນກອງປະຊຸມນັກຂ່າວ ເມື່ອວັນ ທີ 28 ເມສາຜ່ານມາ ເຖິງຢ່າງໃດກໍດີ ໄດ້ປະຕິເສດທີ່ຈະຫລີກລ່ຽງຕໍ່ການໃຊ້ຄໍາເວົ້າດັ່ງ ກ່າວ ເຖິງແມ່ນວ່າ ຖ້າຫາກລັດຖະບານມຽນມາ ຈະບໍ່ໃຊ້ ໂດຍກ່າວວ່າມັນເປັນການປະ ຕິບັດຕາມປົກກະຕິຂອງສະຫະລັດ ແລະປະຊາຄົມສາກົນເພື່ອຮັບຮູ້ວ່າ “ບັນດາປະຊາຄົມທຸກຫົນແຫ່ງມີຄວາມສາມາດທີ່ຈະຕັດສິນໃຈວ່າ ເຂົາເຈົ້າສົມຄວນຮ້ອງຕົນເອງຢ່າງໃດ. ແລະຕາມປົກກະຕິແລ້ວເມື່ອສິ່ງນັ້ນເກີດຂຶ້ນ ພວກເຮົາກໍຈະຮ້ອງເຂົາເຈົ້າໃນສິ່ງທີ່ເຂົາເຈົ້າ ຢາກໃຫ້ຮ້ອງ. ນີ້ບໍ່ແມ່ນການຕັດສິນໃຈດ້ານການເມືອງ ມັນພຽງເປັນການປະຕິບັດທຳ ມະດາ.”
ສະຖານທູດໄດ້ປະເຊີີນໜ້າກັບການຕິຕຽນຈາກພວກຫົວຊາດນິຍົມມຽນມາ ນັບແຕ່ໄດ້ອອກຖະແຫລງ ສະແດງຄວາມເສົ້າສະຫລົດໃຈ ຫລັງຈາກໄດ້ເກີດອຸບັດເຫດທາງທະເລເມື່ອວັນທີ 19 ເມສາ ທີ່ເຮັດໃຫ້ຊາວໂຣຮິງຢາ ຫລາຍເຖິງ 40 ຄົນ ໄດ້ຈົມນໍ້າຕາຍ.
