ເຈົ້າໜ້າທີ່ກອງທັບ ມຽນມາ ປະມານ 200 ຄົນໄດ້ຖອນຕົວອອກໄປສູ່ຂົວແຫ່ງນຶ່ງທີ່ເຊື່ອມຕໍ່ເຂດຊາຍແດນຂອງເມືອງ ມີຢາວັດດີ ກັບປະເທດ ໄທ ໃນວັນພະຫັດມື້ນີ້ ລຸນຫຼັງການໂຈມຕີໝົດມື້ໂດຍພວກກະບົດຕໍ່ຕ້ານລັດຖະບານທະຫານໃນເຂດດັ່ງກ່າວ, ອີງຕາມໂຄສົກຂອງກຸ່ມຕິດອາວຸດຊົນເຜົ່າ ແລະ ສື່ມວນຊົນໃນທ້ອງຖິ່ນ.
ລັດຖະບານທີ່ດຳເນີນການໂດຍກອງທັບຂອງ ມຽນມາ ແມ່ນກຳລັງຕໍ່ສູ້ກັບກຸ່ມກະບົດຕິດອາວຸດໃນຫຼາຍດ້ານ ແລະ ໄດ້ປະສົບກັບຄວາມຜ່າຍແພ້ຫຼາຍຄັ້ງໃນເຂດຊາຍແດນຕ່າງໆ.
ການຖອນກຳລັງຂອງລັດຖະບານທະຫານໃນເມືອງ ມີຢາວັດດີ, ເຊິ່ງຕັ້ງຢູ່ກົງກັນຂ້າມກັບເມືອງ ແມ່ສອດ ຂອງ ໄທ, ເປັນສັນຍານຂອງຄວາມຜ່າຍແພ້ທີ່ອາດເປັນໄປໄດ້ຂອງກອງທະຫານໃນດ່ານຊາຍແດນການຄ້າທີ່ສຳຄັນອີກຄັ້ງນຶ່ງ ທີ່ມີທາງດ່ວນເຂົ້າຫາຫຼາຍພາກສ່ວນໃຈກາງຂອງ ມຽນມາ ໂດຍກົງ.
ໃນວັນພະຫັດມື້ນີ້, ທະຫານທີ່ໄດ້ຫຼົບໜີປະມານ 200 ຄົນໄດ້ເຕົ້າໂຮມກັນຢູ່ດ່ານຊາຍແດນໄປຫາປະເທດ ໄທ, ອີງຕາມການກ່າວຂອງທ່ານ ຊໍ ຕໍ ນີ, ໂຄງສົກສຳລັບສະຫະພັນ ກະຫຼ່ຽງ ແຫ່ງຊາດ, ເຊິ່ງແມ່ນກຸ່ມຕໍ່ຕ້ານລັດຖະບານທະຫານທີ່ນຳໜ້າການໂຈມຕີໃສ່ເມືອງ ມີຢາວັດດີ ນັ້ນ.
ສື່ມວນຊົນໃນທ້ອງຖິ່ນ Khit Thit ໄດ້ລາຍງານວ່າບັນດາເຈົ້າໜ້າທີ່ ໄທ ແມ່ນກຳລັງລົມກັບພວກທະຫານດັ່ງກ່າວເພື່ອຕັດສິນວ່າຈະອະນຸຍາດໃຫ້ເຂົາເຈົ້າລີ້ໄພຫຼີບໍ່.
ໂຄສົກສຳລັບລັດຖະບານທະຫານບໍ່ໄດ້ຕອບຕໍ່ການຂໍຄຳເຫັນ.
ສະຫະພັນ ກະຫຼ່ຽງ ແຫ່ງຊາດໄດ້ກ່າວໃນອາທິດທີ່ຜ່ານມາວ່າ ກອງທະຫານຂອງເຂົາເຈົ້າໄດ້ໂຈມຕີຄ້າຍຂອງລັດຖະບານທະຫານໃກ້ກັບເມືອງ ມີຢາວັດດີ, ບັງຄັບໃຫ້ເຈົ້າໜ້າທີ່ຮັກສາຄວາມປອດໄພ 600 ຄົນ ແລະ ຄອບຄົວຂອງເຂົາເຈົ້າຍອມຈຳນົນ.
ດ່ານຂ້າມຊາຍແດນແມ່ນບໍລິເວນເປີດສຳລັບພົນລະເຮືອນຜູ້ທີ່ໄດ້ເດີນທາງເຂົ້າ ໄທ ຈາກ ມຽນມາ ຈຳນວນຫຼວງຫຼາຍ, ອີງຕາມການກ່າວຂອງພັນເອກຕຳຫຼວດ ບໍ່ວອນພົບ ສູນທອນເລຂາ, ຜູ້ກຳກັບຄົນເຂົ້າເມືອງໃນຈັງຫວັດ ຕາກ ຂອງ ໄທ, ບ່ອນທີ່ເມືອງ ແມ່ສອດ ຕັ້ງຢູ່ນັ້ນ.
ຟໍຣັມສະແດງຄວາມຄິດເຫັນ