ອິນໂດເນເຊຍ ແລະ ມາເລເຊຍ ໄດ້ຕົກລົງທີ່ຈະໃຫ້ທີ່ພັກພາອາໄສ
ຊົ່ວຄາວແກ່ຊາວອົບພະຍົບ ແລະພວກເຄາະຮ້າຍຈາກການຄ້າ
ມະນຸດ ຫຼາຍພັນຄົນ ທີ່ຕົກຄ້າງຢູ່ກາງທະເລ.
ຄວາມກ້າວໜ້າດັ່ງກ່າວ ໄດ້ມີຂຶ້ນໃນວັນພຸດມື້ນີ້ ຫຼັງຈາກທີ່ໄດ້ມີ
ການປະຊຸມລະຫວ່າງບັນດາລັດຖະມົນຕີການຕ່າງປະເທດຂອງ
ອິນໂດເນເຊຍ ມາເລເຊຍ ແລະ ໄທ ຊຶ່ງເປັນພວກປະເທດທີ່ໄດ້
ລັ່ງເລໃຈຕໍ່ການຊ່ອຍເຫຼືອພວກອົບພະຍົບເຫຼົ່ານີ້.
ລັດຖະມົນຕີການຕ່າງປະເທດມາເລເຊຍ ທ່ານ Anifah Aman
ໄດ້ກ່າວວ່າ ພາຍໃຕ້ຂໍ້ຕົກ ລົງນີ້ ມາເລເຊຍ ແລະ ອິນໂດເນເຊຍ “ຈະສືບຕໍ່ໃຫ້ການຊ່ອຍເຫຼືອດ້ານມະນຸດສະທຳ”ຕໍ່ຊາວອົບພະຍົບທີ່ຄາດວ່າມີປະມານ 7 ພັນ ຄົນນັ້ນ.
ທ່ານ Aman ກ່າວຕື່ມວ່າ: “ພວກເຮົາຍັງໄດ້ຕົກລົງທີ່ຈະສະເໜີໃຫ້ທີ່ພັກພາອາໄສຊົ່ວຄາວ ແກ່ພວກອົບພະຍົບເຫຼົ່ານີ້ໂດຍມີຂໍ້ຈຳກັດວ່າ ຂັ້ນຕອນການຕັ້ງຖິ່ນຖານໃໝ່ແລະການສົ່ງ
ເຂົາເຈົ້າກັບຄືນ ຈະມີຂຶ້ນພາຍໃນໜຶ່ງປີ ໂດຍປະຊາຄົມນາໆຊາດ.”
ລັດຖະມົນຕີການຕ່າງປະເທດມາເລເຊຍ ໄດ້ຮຽກຮ້ອງໃຫ້ປະເທດອື່ນໆແລະບັນດາອົງການ
ບໍ່ຂຶ້ນກັບລັດຖະບານທັງຫຼາຍ ໃຫ້ການຊ່ອຍເຫຼືອ ໃນການປະຕິບັດງານທີ່ວ່ານີ້ດ້ວຍ.
ມີເກືອບ 3 ພັນ ຄົນ ໃນອັນທີ່ເອີ້ນວ່າອົບພະຍົບທາງເຮືອ ຫຼື boat people ໄດ້ຖືກຊ່ອຍກູ້ຊີວິດໄວ້ ຫຼືບໍ່ ກໍໄດ້ໄປຮອດໄປເຖິງຝັ່ງມາເລເຊຍ ອິນໂດເນເຊຍ ແລະ ໄທ. ແຕ່ບັນດາ ກຸ່ມປົກປ້ອງສິດທິມະນຸດເຕືອນວ່າ ຍັງມີອີກຫຼາຍພັນຄົນ ທີ່ຍັງຕົກຄ້າງຢູ່ໃນທະເລ ແລະວ່າ ເຂົ້າປາອາຫານຂອງພວກເຂົາໃກ້ຈະໝົດລົງແລ້ວ.
ວິກິດການດັ່ງກ່າວ ໄດ້ເລີ້ມຂຶ້ນ ໃນຕົ້ນເດືອນນີ້ ເວລາປະເທດໄທ ເລີ້ມທຳການປາບປາມຕາໜ່າງການຄ້າມະນຸດ ທີ່ແນເປົ້າໝາຍໃສ່ຊາວໂຣຮິງຢາ. ພວກທີ່ທຳການຄ້າ ໄດ້ພາກັນຫລົບໜີຖິ້ມໃຫ້ພວກເຄາະຮ້າຍຕົກຄ້າງຢູ່ກາງທະເລ.
ມຽນມາ ຊຶ່ງໄດ້ຮັບການຕິຕຽນຈາກທາງນາໆຊາດ ກ່ຽວກັບບົດບາດຂອງຕົນໃນເລື້ຶອງຊາວອົບພະຍົບຢູ່ເອເຊຍອາຄະເນ ໄດ້ກ່າວໃນເຊົ້າວັນພຸດມື້ນີ້ວ່າ ຕົນກໍພ້ອມແລ້ວທີ່ຈະໃຫ້ການຊ່ອຍເຫຼືອພວກທີ່ຕົກຄ້າງຢູ່ໃນທະເລນັ້ນ.
ອິນໂດເນເຊຍ ມາເລເຊຍ ໃຫ້ບ່ອນພັກ ຊົ່ວຄາວ ແກ່ ອົບພະຍົບ
