ປະທານາທິບໍດີມຽນມາ ທ່ານ Htin Kyaw ເດີນທາງໄປຢ້ຽມຢາມ ສປປ ລາວ ໃນວັນສຸກ ມື້ນີ້ຊຶ່ງເປັນການຢ້ຽມຢາມຕ່າງປະເທດຢ່າງເປັນທາງການເທື່ອທຳອິດ ພ້ອມດ້ວຍຜູ້ນຳທີ່ ແທ້ຈິງແລະທີ່ປຶກສາຂອງລັດຖະບານທ່ານນາງອອງຊານ ຊູຈີໂດຍໄດ້ພົບປະກັບປະທານ ປະເທດ ສປປ ລາວ ທ່ານບຸນຍັງ ວໍລະຈິດ ຢູ່ທີ່ທຳນຽບປະທານປະເທດໃນນະຄອນຫຼວງ ວຽງຈັນ.
ການຢ້ຽມຢາມໃນຄັ້ງນີ້ ແມ່ນການຢ້ຽມຢາມຕ່າງປະເທດເທື່ອທຳອິດສຳລັບທັງທ່ານ Htin Kyaw ແລະທ່ານນາງອອງຊານ ຊູຈີ ຜູ້ນຳຂອງພັກສັນນິບາດແຫ່ງຊາດເພື່ອປະຊາທິປະໄຕ ນັບຕັ້ງແຕ່ລັດຖະບານຊຸດໃໝ່ຂອງມຽນມາ ທີ່ຈັດຕັ້ງຂຶ້ນໂດຍພັກດັ່ງກ່າວ ເຂົ້າກຳອຳ ນາດໃນເດືອນເມສາຫຼັງຈາກໄດ້ຮັບໄຊຊະນະຢ່າງຖ້ວມລົ້ນໃນການເລືອກຕັ້ງທົ່ວໄປເມື່ອ ເດືອນພະຈິກປີກາຍ.
ຖະແຫຼງຂ່າວຂອງກະຊວງການຕ່າງປະເທດ ສປປ ລາວກ່າວວ່າ ທັງສອງຝ່າຍຕົກລົງກັນ ທີ່ຈະລົງເລິກ ໃນການຮ່ວມມືທາງດ້ານການຄ້າ ການລົງທຶນ ການສຶກສາ ແລະທ່ອງທ່ຽວ ແລະຈະເຮັດວຽກໄປສູ່ການສ້າງຕັ້ງການເປີດຖ້ຽວບິນໂດຍກົງລະຫວ່າງປະເທດທັງສອງ.
ນອກນັ້ນ ຖະແຫຼງການຍັງເວົ້າວ່າ ທັງສອງຝ່າຍຕ່າງກໍໄດ້ຊົມເຊີຍ ການຮ່ວມມືໃນໄລຍະຜ່ານມາ ແລະຮັບຮູ້ວ່າປະເທດທັງສອງແມ່ນມີຄວາມເຫັນຮ່ວມກັນກ່ຽວກັບບັນຫາຕ່າງໆທັງໃນລະດັບພູມີພາກແລະລະດັບໂລກ.
ການຢ້ຽມຢາມເປັນເວລານຶ່ງມື້ດັ່ງກ່າວນີ້ ແມ່ນຍັງຈະຮວມທັງ ການພົບປະກັບນາຍົກລັດ ຖະມົນຕີຂອງ ສປປ ລາວ ພ້ອມທັງໄປຢ້ຽມຢາມສະຖານທີ່ຕ່າງໆໃນນະຄອນຫລວງວຽງຈັນ.
ໃນປັດຈຸບັນນີ້ ສປປ ລາວແມ່ນເປັນປະທານຂອງສະມາຄົມອາຊ່ຽນ ຊຶ່ງປະເທດມຽນມາເອງກໍເປັນສະມາຊິກ.
