ກອງປະຊຸມບັນດາລັດຖະມົນຕີເສດຖະກິດປະຈຳປີ ຂອງອາຊ່ຽນ
ຫຼື ບັນດາປະຊາຊາດໃນເຂດເອເຊຍຕາເວັນອອກສຽງໃຕ້ໄດ້ເປີດ
ຂຶ້ນຢູ່ໃນມຽນມາ ໂດຍຈະເພັ່ງເລັງໃສ່ການເຈລະຈາ ກ່ຽວກັບເຂດ
ການຄ້າເສລີ ຢູ່ໃນຂົງເຂດ.
ໃນການກ່າວຄຳປາໄສເປີດກອງປະຊຸມ ທີ່ນະຄອນຫຼວງ
Naypyidaw ເມື່ອວັນຈັນວານນີ້ ປະທານາທິບໍດີ Thein Sein
ໄດ້ສະແດງອອກເຖິງຄວາມຫວັງວ່າ ມຽນມາ ຈະໄດ້ຮັບຜົນປະ
ໂຫຍດຈາກການຮວມຕົວ ຂອງຂົງເຂດອາຊ່ຽນ.
ຢູ່ໃນການເຈລະຈາຕອນເປີດປະຊຸມ ໃນວັນຈັນວານນີ້ບັນດາ
ລັດຖະມົນຕີ ໄດ້ປຶກສາຫາລືກັນ ການຜ່ອນຜັນພາສີແລະອາກອນຕ່າງໆ ຂອງຂົງເຂດ
ດັ່ງກ່າວ ແລະ ການສ້າງຕັ້ງກົດລະບຽບຕ່າງໆ ສຳຫລັບການຄ້າ ກ່ອນທີ່ຈະເລີ້ມຈັດຕັ້ງ
ປະຕິບັດ ປະຊາຄົມເສດຖະກິດອາຊ່ຽນ ຫຼື ASEAN Economic Community ໃນປີ
ໜ້ານີ້.
ລັດຖະມົນຕີຖະແຫລງຂ່າວ ທ່ານ Ye Htut ບອກກັບຜູ້ສື່ຂ່າວວີໂອເອ ພະແນກພາສາ
ມຽນມາ ວ່າ ໃນຂະນະທີ່ເປັນປະທານວຽນຂອງອາຊ່ຽນຢູ່ນີ້ ມຽນມາແມ່ນຈະສຸມໃສ່ການ
ສົ່ງເສີມປູກຈິດສຳນຶກ ຊຶ່ງຈຸດທີ່ສຳຄັນ ຈຸດນຶ່ງ ເພື່ອສວຍເອົາໂອກາດ ກັບເຂດການຄ້າ
ເສລີ ທີ່ກຳລັງຈະມາເຖິງນີ້.
ທ່ານ ເວົ້າຕື່ມວ່າ ມຽນມາ ຫວັງທີ່ຈະລຸດຜ່ອນລະດັບຄວາມແຕກໂຕນ ໃນການພັດທະນາ
ກັບບັນດາສະມາຊິກອື່ນໆ ຂອງກຸ່ມຈັດຕັ້ງ ໃນຂົງເຂດດັ່ງກ່າວ ດ້ວຍການຊອກເອົາ ໂອກາດ ຕ່າງໆ ເພື່ອສ້າງວຽກເຮັດງານທຳຫຼາຍຂຶ້ນ ແລະຊອກສະແຫວງຫາການລົງທຶນຂອງຕ່າງ
ປະເທດ.
ບັນດາຜູ້ແທນຈາກສະຫະລັດ ຈີນ ຣັດເຊຍ ຍີ່ປຸ່ນ ແລະປະເທດອື່ນໆ ໄດ້ຖືກເຊື້ອເຊີນໃຫ້ເຂົ້າຮ່ວມໃນກອງປະຊຸມທີ່ສຸມໃສ່ເລື້ອງການຄ້າເສລີ ແລະ ການລົງທຶນ ໃນອາທິດນີ້.
ທ່ານ Ye Htut ໄດ້ກ່າວອີກວ່າ ທ່ານຄາດຄິດວ່າຈະມີການເຊັນສັນຍາຫຼາຍສະບັບ ໃນການຕົກລົງດ້ານການຄ້າ ໃນລະຫວ່າງກອງປະຊຸມລະຍະ 4 ມື້ນີ້.
