ຫົວໜ້າທາງການທະຫານທີ່ມີອຳນາດຂອງ ມຽນມາ ໄດ້ປະຕິຍານ ວ່າຈະຮັກສາປະເທດ ແລະ ປະຊາຊົນຂອງຕົນໃຫ້ຢູ່ໃນເສັ້ນທາງ ໄປສູ່ “ຄວາມຈະເລີນຮຸ່ງເຮືອງ” ແລະ ໄດ້ຕັກເຕືອນ ກ່ຽວກັບ ສິ່ງ ທ້າທາຍຕ່າງໆທີ່ປະເທດອາດຈະໄດ້ປະເຊີນ ໃນຂະນະທີ່ພວກ ເຂົາເຈົ້າກຳລັງກາຍມາເປັນປະເທດ ປະຊາທິປະໄຕຢູ່ນີ້.
ການກ່າວໃນວັນອາທິດມື້ນີ້ທີ່ພິທີເດີນສວນສະໜາມວັນກອງທັບ ປະຈຳປີໃນນະຄອນຫຼວງ Naypyidaw ນັ້ນ, ນາຍພົນອະວຸໂສ Min Aung Hlaing ກ່າວວ່າ “ຂ້າພະເຈົ້າຂໍແຈ້ງໃຫ້ຊາບຢ່າງຈິງ ຈັງໃນເລື່ອງທີ່ວ່າ ທະຫານ Tatmadaw ຈະໃຫ້ການຮ່ວມມືເພື່ອ ນຳເອົາຄວາມຈະເລີນຮັ່ງມີມາສູ່ສະຫະພາບ ແລະ ປະຊາຊົນ ຂອງຕົນ.”
ນອກນັ້ນ ທ່ານນາຍພົນຍັງໄດ້ກ່າວຕື່ມວ່າ “ອຸປະສັກ 2 ຢ່າງທີ່ສຳຄັນຕໍ່ການກາຍເປັນ ປະຊາ ທິປະໄຕ ແມ່ນການບໍ່ຍຶດຖືເອົາລະບຽບກົດໝາຍ ແລະ ການມີໜ້າຢູ່ ຂອງພວກກຸ່ມຕໍ່ຕ້ານ ຕິດອາວຸດຕ່າງໆ. ສິ່ງເຫຼົ່ານີ້ອາດນຳໄປສູ່ການຈະລາຈົນປະຊາທິປະໄຕ.”
ການກ່າວຄຳປາໄສຂອງນາຍພົນ Hlaing ໄດ້ເກີດຂຶ້ນບໍ່ເທົ່າໃດມື້ ກ່ອນພັກປະຊາທິປະໄຕ ຂອງທ່ານນາງ Aung San Suu Kyi ຈະເລີ່ມປະຕິບັດໜ້າທີ່ ຫຼັງຈາກການປົກຄອງໂດຍ ທະຫານໃນປະເທດ ມຽນມາ ເຊິ່ງຮູ້ຈັກກັນອີກຊື່ໜຶ່ງວ່າ ພະມ້າ ມາເປັນເວລາຫຼາຍປີນັ້ນ.
