ນັກຂ່າວ 2 ຄົນ ຢູ່ໃນມຽນມາຖືກຕັດສິນວ່າຜິດໃນຖານໝິ່ນ
ປະໝາດ ແລະຖືກລົງໂທດ ໃຫ້ຈຳຄຸກ 2 ເດືອນ ສຳຫລັບບົດ
ຂຽນອັນນຶ່ງ ທີ່ລວມມີການອ້າງເຖິງຄຳເວົ້າ ໂດຍສະມາຊິກສະພາ
ຄົນນຶ່ງ ທີ່ຄອບງຳດ້ວຍທະຫານນັ້ນ.
ການຖືກຕັດສິນວ່າຜິດ ຂອງຫົວໜ້າບັນນາທິການ ໜັງສືພິມ
Myanmar Post ທ່ານ Than Htaik Thu ແລະ ນັກຂ່າວ
ທ່ານ Hsan Moe Tun ເປັນເຫດການຫລ້າສຸດ ທີ່ໄດ້ກໍ່ໃຫ້
ເກີດຄວາມກັງວົນຕ່າງໆ ກ່ຽວກັບເສລີພາບທາງດ້ານການຂ່າວ
ທີ່ຮ້າຍແຮງຂຶ້ນຢູ່ໃນມຽນມາ ຊຶ່ງປະເທດດັ່ງກ່າວ ໄດ້ພະຍາຍາມ
ຜ່ານຜົ້ນອອກຈາກລະບອບປົກຄອງດ້ວຍທະຫານແບບພະເດັດການ ທີ່ຍາກລຳບາກຫຼາຍທົດສະວັດມາແລ້ວນັ້ນ.
ບົດຂຽນທີ່ມີຂໍ້ສົງໄສ ຊຶ່ງໄດ້ຂຽນເມື່ອປີກາຍນີ້ ໄດ້ອ້າງເຖິງຄຳເວົ້າຂອງຜູ້ແທນ ພັນຕີ Thein Zaw ທີ່ສະເໜີແນະວ່າ ບັນດາສະມາຊິກສະພາທີ່ເປັນທະຫານ ມີລະດັບການສຶກສາທີ່ຕ່ຳ.
ຜູ້ແທນດັ່ງກ່າວ ໄດ້ປະຕິເສດວ່າ ຕົນບໍ່ໄດ້ກ່າວດັ່ງນັ້ນ.
ນັບຕັ້ງແຕ່ການປົກຄອງຂອງທະຫານໂດຍກົງໄດ້ສິ້ນສຸດລົງ ໃນປີ 2011 ມຽນມາໄດ້ເອົາ
ບາດກ້າວຕ່າງໆ ເພື່ອປັບປຸງສິດເສລີໃນການປາກເວົ້າ ລວມທັງຍຸດຕິການກວດກາສື່
ມວນຊົນໂດຍກົງເຊັ່ນໜັງສືພິມຕ່າງໆຂອງປະເທດ ແລະ ປ່ອຍບັນດານັກຂ່າວບາງສ່ວນ
ທີ່ຖືກກັກຂັງຢູ່ນັ້ນ.
ແຕ່ບັນດານັກຂ່າວ ສືບຕໍ່ເປັນເນື້ອເລື້ອງຂອງການຈັບກຸມ ການຂົ່ມຂູ່ ແລະ ການກວດກາ ຕະຫລອດມາ. ຫຼາຍໆຄົນໄດ້ຖືກຈັບສົ່ງເຂົ້າຄຸກຫຼັງຈາກລາຍງານ ກ່ຽວກັບບັນຫາຕ່າງໆ
ຂອງລັດຖະບານ ທີ່ວ່າລະອຽດອ່ອນຫຼາຍ ທີ່ຈະຕ້ອງໄດ້ນຳມາສະເໜີ.
ກຸ່ມນັກຂ່າວບໍ່ມີພົມແດນ ຫຼື Reporters Without Borders ກ່າວວ່າ ມຽນມາ ຖືກຈັດອັນດັບຢູ່ພຽງ 144 ຈາກ ທັງໝົດ 180 ປະເທດ ຂອງດັດຊະນີອິດສະຫຼະພາບ ດ້ານການຂ່າວ.
