ໃນຂະນະທີ່ສົງຄາມ ລະຫວ່າງ ອິສຣາແອລ ແລະ ກຸ່ມຮາມາສ ຮຸນແຮງຂຶ້ນໃນເຂດກາຊາ, ຄົນຕ່າງປະເທດຫຼາຍຄົນທີ່ອາໄສຢູ່ໃນ ອິສຣາແອລ ແມ່ນໄດ້ຖືກອົບພະຍົບອອກໄປປະເທດຂອງເຂົາເຈົ້າ. ແນວໃດກໍ່ຕາມ, ຄົນເຂົ້າເມືອງຊາວມຽນມາສ່ວນຫຼາຍທີ່ອາໄສຢູ່ໃນ ອິສຣາແອລ ແມ່ນບໍ່ມີແຜນທີ່ຈະກັບຄືນໄປມຽນມາ ທີ່ຖືກປົກຄອງໂດຍທະຫານ, ດັ່ງທີ່ເຂົາເຈົ້າໄດ້ກ່າວຕໍ່ວີໂອເອໃນການສຳພາດເມື່ອບໍ່ດົນມານີ້.
ພະນັກງານຮ້ານອາຫານ ທ້າວ ຄຸນ ອອງ ເມື່ອບໍ່ດົນມານີ້ໄດ້ກ່າວຕໍ່ວີໂອເອຜ່ານທາງ Zoom ວ່າ “ຂ້ອຍຮູ້ສຶກປອດໄພກວ່າຢູ່ພີ້. ຢູ່ພີ້, ຢ່າງໜ້ອຍພວກເຮົາຈະໄດ້ຍິນສຽງສັນຍານເຕືອນ ກ່ຽວກັບການໂຈມຕີດ້ວຍຈະຫຼວດລ່ວງໜ້າ, ສະນັ້ນ ພວກເຮົາມີເວລາທີ່ຈະກຽມຕົວ ແລະ ຫາບ່ອນຫຼົບລີ້. ໃນມຽນມາ, ມັນບໍ່ມີການເຕືອນແບບນັ້ນ, ແລະ ການໂຈມຕີແມ່ນມາຈາກທະຫານຂອງພວກເຮົາເອງ. ຂ້ອຍບໍ່ຮູ້ສຶກປອດໄພໃນ ມຽນມາ ນັບຕັ້ງແຕ່ພວກທະຫານໄດ້ເຂົ້າຄວບຄຸມ.”
ທ້າວ ອອງ ໄດ້ຢູ່ໃນ ອິສຣາແອລ ນັບຕັ້ງປີ 2019, ເວລາທີ່ລາວໄດ້ໄປຮຽນ ກ່ຽວກັບ ກະສິກຳ ຢູ່ໂຮງຮຽນແຫ່ງນຶ່ງໃນພາກພື້ນທະເລຊາຍ ເນເກຟ, ຫຼື Negev Highlands. ຍ້ອນໂຣກລະບາດໂຄວິດ-19 ແລະ ການກໍ່ລັດຖະປະຫານໂດຍທະຫານໃນມຽນມາ ປີ 2021, ລາວໄດ້ຕັດສິນໃຈທີ່ຈະຢູ່ ແລະ ປັດຈຸບັນນີ້ ອາໄສຢູ່ໃນນະຄອນຫຼວງ ແທລ ອາວີບ. ເວລາທີ່ລາວອາໄສຢູ່ໃກ້ເຂດຊາຍແດນຕິດກັບເຂດກາຊາ ໃນລະຫວ່າງການຝຶກງານຂອງລາວນັ້ນ, ສັນຍານເຕືອນ ກ່ຽວກັບການໂຈມຕີດ້ວຍຈະຫຼວດແມ່ນສິ່ງທີ່ປົກກະຕິ. ແນວໃດກໍ່ຕາມ, ການໂຈມຕີຢ່າງກະທັນຫັນໂດຍພວກຫົວຮຸນແຮງ ຮາມາສ ໃນວັນທີ 7 ຕຸລາທີ່ຜ່ານມາ, ທ້າວ ອອງ ໄດ້ກ່າວວ່າ, ມັນ “ໜ້າຕົກໃຈຍ້ອນຄວາມໜັກໜ່ວງ ແລະ ຄວາມໂຫດຮ້າຍຂອງມັນ.”
