ໂຄງການສ້າງເຂື່ອນຈີນ ທີ່ຖືກໂຈະແລະມີເລື້ອງຜິດຖຽງກັນ ໃນມຽນມານັ້ນ ຄາດວ່າ ຈະຄອບງຳ ການເຈລະຈາຫາລືໃນວັນພະຫັດມື້ນີ້ ລະຫວ່າງຜູ້ນຳທີ່ແທ້ຈິງຂອງມຽນມາ ທ່ານນາງ Aung San Suu Kyi ແລະນາຍົກລັດຖະມົນຕີ Li Keqiang ທີ່ນະຄອນຫຼວງປັກ
ກິ່ງ.
ການເດີນທາງໄປຢ້ຽມຢາມນະຄອນຫຼວງຈີນ ຂອງທ່ານນາງ Aung San Suu Kyi ແມ່ນການຢ້ຽມຢາມທາງການທູດທີ່ສຳຄັນ ນັບຕັ້ງແຕ່ພັກສັນນິບາດແຫ່ງຊາດເພື່ອປະຊາທິປະໄຕ ໄດ້ຮັບໄຊຊະນະຢ່າງຖ້ວມລົ້ນໃນການເລືອກຕັ້ງແຫ່ງຊາດເມື່ອປີກາຍນີ້ ທີ່ເຮັດ ໃຫ້ການປົກຄອງຂອງພວກທະຫານເປັນເວລາ 5 ທົດສະວັດສິ້ນສຸດລົງ. ທ່ານນາງ Aung San Suu Kyi ທີ່ໄດ້ຮັບລາງວັນໂນແບລຂະແໜງສັນຕິພາບ ໄດ້ຖືກຫ້າມບໍ່ໃຫ້ເປັນປະທານາ ທິບໍດີ ພາຍໃຕ້ລັດຖະທຳມະນູນທີ່ລັດຖະບານທະຫານເປັນຜູ້ຮ່າງຂຶ້ນມາ ແຕ່ທ່ານນາງກໍໄດ້ກຳຕຳແໜ່ງທີ່ສຳຄັນໆຫລາຍໆຕຳແໜ່ງ ຮວມທັງທີ່ປຶກສາລັດຖະບານແລະລັດຖະມົນຕີ ການຕ່າງປະເທດ.
ຈີນແມ່ນມີຄວາມກະຕືລືລົ້ນ ທີ່ຈະເລີ້ມຄືນ ໂຄງການສ້າງເຂື່ອນ Myitsone ທີ່ມີມູນຄ່າ 3 ພັນ 6 ຮ້ອຍລ້ານ ຢູ່ໃນພາກເໜືອຂອງມຽນມາ ໃນແມ່ນ້ຳອີຣະວະດີ. 90 ເປີເຊັນຂອງໄຟ
ຟ້າທີ່ຜະລິດຈາກເຂື່ອນຈະສົ່ງໄປຈີນ. ແຕ່ໂຄງການດັ່ງກ່າວໄດ້ຖືກສັ່ງໃຫ້ໂຈະໃນປີ 2011 ພາຍໃຕ້ການປົກຄອງຂອງລັດຖະບານເຄິ່ງພົນລະເຮືອນທ່ານເທນເຊນ ຍ້ອນມີການຄັດຄ້ານ ຢ່າງແຂງແຮງ. ພວກຄັດຄ້ານໄດ້ອ້າງເຖິງຜົນກະທົບຕໍ່ສິ່ງແວດລ້ອມ ແລະການຂາດກະແສ ໄຟຟ້າຢູ່ໃນມຽນມາ ເປັນເຫດຜົນທີ່ພາໃຫ້ໂຈະໂຄງການນີ້.
ລັດຖະບານມຽນມາໄດ້ສ້າງຕັ້ງກຳມາທິການນຶ່ງຂຶ້ນເພື່ອທົບທວນການສ້າງເຂື່ອນ Myitsone ແລະໂຄງການສ້າງເຂື່ອນໄຟຟ້າພະລັງນ້ຳອື່ນໆອີກ.
ຍັງເປັນທີ່ຄາດກັນວ່າ ທ່ານນາງ Aung San Suu Kyi ຈະຫາລືກ່ຽວກັບການເຈລະຈາ ສັນຕິພາບລະຫວ່າງລັດຖະບານຂອງທ່ານນາງແລະກຳລັງກະບົດຂອງພວກຊົນກຸ່ມນ້ອຍຕ່າງໆ ທີ່ຢູ່ໃນບໍລິເວນຊາຍແດນມຽນມາຕິດກັບຈີນ. ການສູ້ລົບກັນໃນເຂດດັ່ງກ່າວເຮັດໃຫ້ມີອົບພະຍົບຈຳນວນນຶ່ງເຂົ້າໄປໃນຈີນ.
ທ່ານນາງມີໝາຍກຳນົດຈະພົບປະກັບປະທານປະເທດຈີນ ທ່ານ Xi Jingping ໃນວັນສຸກມື້ອື່ນນີ້.
