ລັດຖະບານທະຫານມຽນມາ ໄດ້ໃຫ້ອະໄພຍະໂທດ ແກ່ນັກໂທດຫຼາຍກວ່າ 3,000 ຄົນ ເພື່ອເປັນການລະນຶກເຖິງວັນບຸນປີໃໝ່ຕາມປະເພນີ, ແຕ່ຍັງບໍ່ທັນ ເປັນທີ່ຈະແຈ້ງເທື່ອວ່າ ຜູ້ທີ່ຖືກປ່ອຍຕົວນັ້ນ ລວມເຖິງຜູ້ຖືກຄຸມຂັງຍ້ອນການ ເມືອງຫຼາຍພັນຄົນຫຼືບໍ່. ໂທລະພາບລັດຖະບານລາຍງານວ່າ ສະພາບໍລິຫານແຫ່ງລັດ ຊຶ່ງເປັນອົງການປົກຄອງທີ່ສ້າງຂຶ້ນໂດຍທະຫານ ໄດ້ໃຫ້ອະໄພຍະໂທດແກ່ນັກໂທດ 3,113 ຄົນ, ໃນນັ້ນມີຄົນຕ່າງປະເທດ 98 ຄົນທີ່ຈະຖືກເນລະເທດ. ການປ່ອຍນັກໂທດຈໍານວນຫຼວງຫຼາຍ ແມ່ນເປັນເລື່ອງປົກກະຕິ ໃນວັນບຸນທີ່ສໍາຄັນ. ຜູ້ຖືກຄຸມຂັງທາງການເມືອງປະມານ 17,460 ຄົນ, ລວມທັງອະດີດຜູ້ນໍາພົນລະເຮືອນຂອງມຽນມາ ທ່ານນາງ ອອງຊານ ຊູຈີ ແມ່ນເຊື່ອກັນວ່າຈະຖືກກັກຂັງຢູ່, ອີງຕາມອົງການຂ່າວເອພີ (AP)
ເຈົ້າໜ້າທີ່ຈາກຄຸກອິນເຊນຂອງນະຄອນຢ່າງກຸ້ງ ທີ່ກ່າວໂດຍບໍ່ປະສົງອອກນາມຍ້ອນວ່າລາວບໍ່ໄດ້ຮັບອະນຸຍາດໃຫ້ເປີດເຜີຍຂໍ້ມູນ, ກ່າວວ່າຈຳນວນ ແລະຊື່ຂອງຜູ້ທີ່ຈະໄດ້ຮັບການປ່ອຍຕົວ ອອກຈາກຄຸກໃຫຍ່ທີ່ສຸດຂອງປະເທດແມ່ນຍັງບໍ່ທັນຮູ້ເທື່ອ. ການປ່ອຍຕົວນັກໂທດດັ່ງກ່າວຄາດວ່າ ຈະເລີ່ມຕົ້ນຂຶ້ນໃນວັນຈັນ ມື້ນີ້.
ມຽນມາໄດ້ຕົກຢູ່ພາຍໃຕ້ການປົກຄອງຂອງທະຫານນັບແຕ່ປີ 2021, ເມື່ອກອງ ທັບຂອງປະເທດນັ້ນ ໄດ້ຂັບໄລ່ລັດຖະບານທີ່ໄດ້ຮັບການເລືອກຕັ້ງຂອງທ່ານນາງຊູຈີ. ການຍຶດຄອງອຳນາດໄດ້ປະເຊີນກັບການຕໍ່ຕ້ານແບບບໍ່ໃຊ້ຄວາມຮຸນແຮງຢ່າງໃຫຍ່ຫລວງ, ຊຶ່ງນັບຕັ້ງແຕ່ນັ້ນມາໄດ້ກາຍເປັນການຕໍ່ສູ້ທີ່ມີການປະກອບອາວຸດທີ່ແຜ່ລາມໄປ.
