ກຸ່ມປົກປ້ອງສື່ມວນຊົນກຸ່ມນຶ່ງໄດ້ບົ່ງຊື່ມຽນມ້າວ່າເປັນນຶ່ງໃນຈຳນວນ 40 ປະເທດ ທີ່ຈຳກັດຮັດແຄບເສຣີພາບຂອງວົງການຂ່າວຫລາຍທີ່ສຸດຂອງໂລກ.
ໃນລາຍງານສະບັບນຶ່ງທີ່ເປີດເຜີຍອອກໃນວັນຈັນມື້ນີ້ ກຸ່ມນັກຂ່າວບໍ່ມີພົມແດນ ຫລື Reporters Without Borders ໄດ້ບົ່ງຊື່ພວກນັກການເມືອງ
ພວກຜູ້ນຳດ້ານສາສະໜາແລະພວກກອງຫລອນມຽນມາທີ່ກຸ່ມດັ່ງກ່າວເວົ້າວ່າເປັນພວກທີ່ມີອຳນາດໃນການກວດກາຈັບເຂົ້າຄຸກ ລັກພາໂຕ ທາລຸນນະກຳ ແລະໃນກໍລະນີທີ່ຮ້າຍແຮງທີ່ສຸດ ກໍແມ່ນ ຄາດຕະກຳພວກນັກຂ່າວ.
ກຸ່ມນັກຂ່າວບໍ່ມີພົມແດນທີ່ມີສຳນັກງານຕັ້ງຢູ່ໃນກຸງປາຣີ ກ່າວວ່ານາຍພົນ Than Shwe ຫົວໜ້າລັດຖະບານທະຫານບໍ່ຍອມລົດຜ່ອນການຮັດແໜ້ນຂອງທ່ານຕໍ່ສື່ມວນຊົນແລະອິນເທີແນັດ ທີ່ຢູ່ພາຍໃຕ້ການ ຄວບຄຸມຂອງສະພາກວດກາວົງການຂ່າວຂອງມຽນມ້ານັ້ນ. ກຸ່ມນີ້ກ່າວຕື່ມວ່າພວກລູກ ນ້ອງຂອງນາຍພົນ Than Shwe ຍັງສືບຕໍ່ຕິດຕາມຫາພວກນັກຂ່າວຄົນໃດກໍຕາມທີຖືກສົງໄສວ່າສົ່ງຂ່າວຂໍ້ມູນແລະຮູບວີດີໂອໄປຍັງຕ່າງປະເທດທີ່ສະແດງໃຫ້ເຫັນສະພາບການຫາຍະນະ ຂອງປະເທດ.
ນອກນັ້ນ ມຽນມ້າຍັງຖືກບົ່ງຊື່ຢູ່ໃນລາຍງານສະບັນນຶ່ງຂອງກຸ່ມ Free-dom House ໃນສັບປະດາຜ່ານມາວ່າ ເປັນນຶ່ງໃນຈຳນວນ 10 ປະເທດທີ່ຮ້າຍກາດທີ່ສຸດ ໃນດ້ານເສຣີພາບຂອງວົງການຂ່າວ.
