ການສະແຫວງບຸນປະຈຳປີ ທີ່ເອີ້ນວ່າ Hajj ໃນຊາອຸດີ ອາຣາເບຍ
ແມ່ນເຖິງຈຸດສູງສຸດ ໃນວັນພຸດມື້ນີ້ ໂດຍມີຊາວມຸສລິມ 2 ລ້ານຄົນ
ພາກັນໄປເຕົ້າໂຮມກັນຢ່າງໜາແໜ້ນ ຢູ່ທີ່ຮ່ອມພູ Arafat ເພື່ອສູດ
ມົນພາວະນາ ເປັນເວລານຶ່ງມື້.
ສະຖານທີ່ດັ່ງກ່າວ ເຊື່ອກັນວ່າ ເປັນບ່ອນທີ່ ພະສາດສະດາ
Muhammad ໄດ້ເທດສະໜາເປັນຄັ້ງສຸດທ້າຍ ປະມານ 1,400
ປີກ່ອນ ທີ່ຮຽກຮ້ອງໃຫ້ຊາວມຸສລິມທັງຫຼາຍຈົ່ງມີ ຄວາມສະເໝີ
ພາບ ແລະ ຄວາມສາມັກຄີກັນ.
ການສະແຫວງບຸນ Hajj ທີ່ໃຊ້ເວລາທັງໝົດ 5 ມື້ ໄດ້ເລີ້ມຕົ້ນຂຶ້ນ
ໃນວັນອັງຄານວານນີ້ ໂດຍມີພວກສະແຫວງບຸນພາກັນຍ່າງອ້ອມຫີນດຳ ສັກສິດ Kaaba ທີ່ວັດໃຫຍ່ອິສລາມ ໃນນະຄອນ Mecca ຊຶ່ງເປັນສະຖານທີ່ກາບໄຫວ້ຂອງຊາວມຸສລິມ ທັງມວນ.
ຈາກສະຖານທີ່ແຫ່ງນັ້ນ ພວກເຂົາຈະໄປແວ່ທີ່ເມືອງ Mina ກ່ອນຈະເດີນທາງຕໍ່ໄປຍັງພູ Arafat.
ສາສະໜາອິສລາມ ກຳນົດໃຫ້ຊາວມຸສລິມ ຜູ້ມີຄວາມສາມາດທັງໝົດ ໃຫ້ໄປສະແຫວງບຸນ
ເທື່ອນຶ່ງໃນຊີວິດ. ການສະແຫວງບຸນນັ້ນ ແມ່ນນຶ່ງໃນ 5 ຫຼັກການຂອງສາສະໜາອິສລາມ
ຊຶ່ງຍັງລວມມີການເຊື່ອຖື ໃນຄວາມເປັນອັນນຶ່ງອັນດຽວຂອງພະຜູ້ເປັນເຈົ້າ ແລະພະສາສະດາ
Muhammad ເປັນສາສະດາອົງສຸດທ້າຍ ທີ່ນຳເອົາຄຳເທດສະໜາ ຂອງພະອົງ ມາເຜີຍແຜ່
ໃຫ້ຊາວມຸສລິມ ທີ່ຕ້ອງໄດ້ສູດມົນພາວະນາ 5 ຄັ້ງຕໍ່ມື້ ໂດຍປິ່ນໜ້າໄປ ທາງຫີນ Kaaba
ການໄປສະແຫວງບຸນປະຈຳປີ ແລະການອົດກິນອາຫານ ໃນລະຫວ່າງເດືອນສັກສິດ Ramadan.
ສຳຫລັບຫຼາຍໆຄົນແລ້ວ ການໄປສະແຫວງບຸນ Hajj ນັ້ນ ຈະເປັນຈຸດເດັ່ນສຸດໃນຊີວິດ
ການປະຕິບັດຄວາມເຊື່ອໃນສາສະໜາ ຂອງພວກເຂົາເຈົ້າ.
ພວກສະແຫວງບຸນ ກໍບໍ່ໄດ້ຫວັ່ນໄຫວເຖິງແມ່ນວ່າ ເຄື່ອງຍົກກໍ່ສ້າງ ໄດ້ ຫັກພັງລົງມາທັບ
ພວກສະແຫວງບຸນ ຢູ່ທີ່ວັດໃຫຍ່ອິສລາມໃນນະຄອນ Mecca ທີ່ໄດ້ເຮັດໃຫ້ມີ 109 ຄົນ
ເສຍຊີວິດ ລວມມີຊາວຕ່າງຊາດນຳດ້ວຍ ເມື່ອຕົ້ນເດືອນນີ້.
ປະມານ 400 ຄົນ ໄດ້ຮັບບາດເຈັບ ຍ້ອນການລົ້ມທັບຂອງເຄື່ອງຍົກ ທີ່ກຳລັງທຳການ
ຂະຫຍາຍ ພື້ນທີ່ອັນສັກສິດ ຂອງສາສະໜາອິສລາມຢູ່ນັ້ນ.
