ພັກພະລາດອນພາບມຸສລິມຂອງອີຈິບ ໄດ້ປະຕິຍານວ່າ ຈະທ້າທາຍຕໍ່ການເຄື່ອນໄຫວ ຂອງພວກທະຫານເມື່ອໄວໆມານີ້ ທີ່ຈະເສີມຂະຫຍາຍອຳນາດຂອງຕົນ ຂະນະທີ່ບັນດານາຍພົນທີ່ປົກຄອງປະເທດຢູ່ໃນເວລານີ້ ບໍ່ໄດ້ໃຫ້ຄວາມສຳ ຄັນກ່ຽວກັບຄວາມຢ້ານກົວ ຕໍ່ການພະຍາຍາມກໍ່ລັດຖະປະຫານຂຶ້ນນັ້ນ.
ພັກພະລາດອນພາບມຸສລິມ ໄດ້ຮຽກຮ້ອງໃຫ້ມີການປະທ້ວງໃນທົ່ວປະເທດໃນວັນອັງຄານມື້ນີ້ ຕໍ່ຕ້ານການປະກາດຂອງພວກທະຫານ ທີ່ມອບການອອກຄຳເຫັນຂັ້ນສຸດທ້າຍໃຫ້ແກ່ພວກທະຫານແລະສານກ່ຽວກັບສ່ວນໃຫຍ່ຂອງນະໂຍບາຍພາຍໃນປະເທດນະໂຍບາຍການຕ່າງປະເທດ ແລະຂັ້ນຕອນການຮ່າງລັດ ຖະທຳມະນູນ. ຂະບວນການຊາວໜຸ່ມວັນທີ 6 ເມສາ ແລະສະຫະພັນກຳມະບານຫຼາຍແຫ່ງ ກໍໄດ້ຮຽກຮ້ອງໃຫ້ມີການໂຮມຊຸມນຸມຄັ້ງໃຫຍ່ຄັດຄ້ານຕໍ່ການຍາດແຍ່ງເອົາອຳນາດຂອງພວກທະຫານເມື່ອໝໍ່ໆມານີ້. ການກະທໍາດັ່ງກ່າວມີຂຶ້ນຫຼັງຈາກພັກພະລາດອນພາບມຸສລິມໄດ້ຖືກປະກາດໃຫ້ເປັນຜູ້ໄດ້ຮັບໄຊຊະນະການເລືອກຕັ້ງປະທານາທິບໍດີແບບເສລີເທື່ອທຳອິດຂອງປະເທດ.
ສະພາປົກຄອງສູງສຸດຂອງກອງທັບໄດ້ປະກາດໃນວັນຈັນວານນີ້ວ່າຈະປະຕິບັດ ຕາມຄຳໝັ້ນສັນຍາທີ່ຕົນໄດ້ໃຫ້ໄວ້ ທີ່ຈະມອບໂອນອໍານາດໃຫ້ແກ່ປະທານາທິບໍ ດີທີ່ຫາກໍຖືກເລືອກໃໝ່ນັ້ນ ໃນທ້າຍເດືອນນີ້. ການປະກາດດັ່ງກ່າວມີຂຶ້ນ 1 ມື້ ຫຼັງຈາກສະພາປົກຄອງທະຫານ ໄດ້ປະກາດກ່ຽວກັບລັດຖະທໍາມະນູນຊົ່ວຄາວສະບັບໃໝ່ ຊຶ່ງເຮັດໃຫ້ອໍານາດຂອງຜູ້ທີຊຶ່ງຫາກໍໄດ້ຮັບໄຊຊະນະໃນການເລືອກຕັ້ງຫຼຸດໜ້ອຍລົງ.
ໃນນະຄອນຫຼວງວໍຊິງຕັນ ທັງກະຊວງການຕ່າງປະເທດແລະທໍານຽບ 5 ແຈ ທີ່ ເປັນຜູ້ກຳກັບນຳການພົວພັນທາງທະຫານ ລະຫວ່າງສອງປະເທດນັ້ນ ກໍໄດ້ສະ ແດງຄວາມເປັນຫ່ວງເປັນໃຍ ຂອງການເຄື່ອນໄຫວວ່າງໝໍ່ໆນີ້.
ໂຄສົກຂອງກະຊວງການຕ່າງປະເທດສະຫະລັດ ທ່ານນາງ Victoria Nuland ໄດ້ກ່າວວ່າ ສະຫະລັດຈະຖືວ່າທາງສະພາປົກຄອງທະຫານຍຶດໝັ້ນຕໍ່ຄໍາສັນຍາຂອງຕົນ ກ່ຽວກັບຂັ້ນຕອນການຮ່າງລັດຖະທໍາມະນູນທີ່ມີຫຼາຍພັກຝ່າຍເຂົ້າຮ່ວມ, ການເຂົ້າຮັບໜ້າທີ່ໃນເວລາອັນສົມຄວນຂອງສະພາທີ່ຫາກໍຖືກເລືອກໃໝ່ ແລະການໂອນອໍານາດຢ່າງວ່ອງໄວແລະຖາວອນໃຫ້ແກ່ລັດຖະບານພົນລະເຮືອນນັ້ນ.
