ວັນນະສອນເຈົ້າຂອງລາຍການສຽງເພງຈາກແດນໄກຂອງຈະມາຈັດເພງລາວໃໝ່ໆ
ຈາກວົງໜຸ່ມເສຣີ ກຸ່ມສິນລະປິນລາວໃນສະຫະລັດມາສະເໜີທ່ານ ຂໍເຊີນເຂົ້າສູ່ລາຍ
ການໄດ້ເລີຍ.
ສະບາຍດີທ່ານຜູ້ຟັງທຸກໆທ່ານ ວັນນະສອນ ຄ່ຳຄືນນີ້ ວັນນະສອນຈະມາຈັດເພງລາວ
ມ່ວນໆຂອງວົງດົນຕີ ໜຸ່ມເສຣີ ຈາກລັດ Ohio ເປັນກຸ່ມສິນລະປິນວົງຣ໊ອກທີ່ມີຜົນງານ
ມາ ໄດ້ຫຼາຍທົດສະວັດແລ້ວ ແລະຊຸດນີ້ ກໍເປັນຊຸດໃໝ່ທີ່ຫາກໍອອກມາ ວິທະຍຸກະຈາຍ
ສຽງອາເມຣິກາ ຂອງພວກເຮົາ ແມ່ນໄດ້ຮັບເປັນຄົນແລກ ຊຶ່ງເພງທຳອິດທີ່ຈະຫຼິ້ນໃຫ້ຟັງນີ້
ເປັນເພງຣ໊ອກຫວານໆ ທີ່ບຸນປອນ ວັທນານົນ ເປັນຄົນແຕ່ງແລະຂັບຮ້ອງ ເພງນີ້ມ່ວນ
ຫຼາຍ ພາໃຫ້ຜູ້ຈັດລາຍການຟັງໄປ ເຄີບໄປກັບສຽງເພງເລີຍ ແລະວັນນະສອນ ຫວັງວ່າ
ທ່ານຜູ້ຟັງ ກໍຄົງຈະມີຄວາມຮູ້ສຶກແບບດຽວກັນ. ເອົາຂໍເຊີນໄປຟັງເພງ Maybe
Tomorrow ພ້ອມໆກັນເລີຍເນາະ.
ນອກຈາກ ບຸນປອນ ວັທນານົນ ຜູ້ເປັນອ້າຍຂອງວົງ ໜຸ່ມເສຣີ ແລ້ວຍັງມີນ້ອງຊາຍ
ເບ ວັທນານົນ ຮວມຢູ່ໃນວົງນຳ ເປັນນັກດົນຕີຄືກັນກັບອ້າຍ ເນື່ອງຈາກວ່າ
ໜຸ່ມ ບຸນປອນ ແລະ ເບ ເປັນຄົນມາຈາກທາງໃຕ້ ແຖວປາກເຊພຸ້ນ ບຸນປອນຈຶ່ງໄດ້
ສະແດງອອກ ຊຶ່ງຄວາມຮູ້ສຶກທີ່ໄດ້ບັນລະຍາຍເຖິງ ຄວາມໂຫຍຫາ ຄິດເຖິງບ້ານ
ຜ່ານທາງຕົວໂນ໊ດ ຈຶ່ງກາຍເປັນບົດເພງນີ້ຄິດເຖິງປາກເຊ. ວັນນະສອນ ຂໍຈັດພິເສດ
ໃຫ້ທ່ານຜູ້ຟັງທີ່ຢູ່ທາງໃຕ້ ທາງປາກເຊ ທຸກໆທ່ານ ຫຼືບໍ່ ກໍພວກທີ່ເປັນໃພ້ເປັນເຂີຍ
ທາງໃຕ້ພຸ້ນນໍ ແລະວ່າພໍໄດ້ຟັງເພງນີ້ແລ້ວ ກໍຢ່າລືມກັບໄປຢ້ຽມຢາມປາກເຊແດ່ເດີ
ເພື່ອໃຫ້ຫາຍຄວາມຄິດເຖິງ.
ຂໍອຳລາທ່ານຜູ້ຟັງໄປໃນຄ່ຳຄືນນີ້ ດ້ວຍເພງ ທີ່ໜ້າຮັກໆ ແບບສະໜຸກສະໜານ ມ່ວນຊຶ່ນ
ຟັງເພງໄປ ຮ້ອງໄປ ເຕັ້ນລຳໄປ ແລະຖ້າວ່າມັກເພງຂອງໜຸ່ມເສຣີແລ້ວ ກໍໃຫ້ຕິດຕໍ່ຫາ
ບຸນປອນແລະ ເບ ທາງ Facebook. ທາງ VOA ຕ້ອງຂໍຂອບໃຈນຳເບທີ່ເປັນຜູ້ສົ່ງເພງ
ຊຸດນີ້ມາໃຫ້ ຂໍສັນລະເສີນແລະເປັນກຳລັງໃຈ ໃຫ້ວົງໜຸ່ມເສຣີ ໄດ້ສືບຕໍ່ຂໍສ້າງຜົນງານດີໆ
ເຮັດເພງລາວມ່ວນໆ ເພື່ອຄົງໄວ້ຊຶ່ງສິນລະປະວັນນະຄະດີ ອັນດີງາມຂອງລາວເຮົາຕໍໄປ
ບົນຜືນແຜ່ນດິນນີ້. ຂໍໃຫ້ທຸກທ່ານໆນອນຫຼັບຝັນຫວານ ພົບກັນໃໝ່ ໃນສັບປະດາໜ້າ.
