ສະບາຍດີທຸກໆທ່ານ ຍິນດີຕ້ອນຮັບທ່ານຜູ້ຟັງເຂົ້າສູ່ລາຍການສຽງເພງຈາກແດນໄກ ມື້ນີ້ ວັນນະສອນ ຈະມາຈັດເພງໃຫ້ບັນດາທ່ານຜູ້ຟັງທີ່ຕິດຕາມຮັບຟັງ ພວກເຮົາ ໂດຍສະເພາະ ບັນດາທ່ານທີ່ຄ່ອຍສົຟ່ງຂ່າວ ແລະຂຽນເຂົ້າຫາພວກເຮົາ ຕອນທີ່ອອກອາກາດສົດນັ້ນ. ທ່ານກ່ອງປະກັນ ກໍເປັນຜູ້ນຶ່ງທີ່ທາງເຮົາເຄີຍສຳພາດແລະການຊ່ອຍເຫຼືອ VOA ມາໂດຍຕະຫຼອດ ແລະຫວັງວ່າເພງ ປົດປ່ອຍ ຂອງນ້ອງ ຕ່າຍ ຈາກຄ້າຍເພງອິນດີ ນີ້ ຄົງຈະພາໃຫ້ທ່ານກ່ອງປະກັນ ຟັງເພງແນວໃໝ່ທີ່ໄວຮຸ່ນເຂົາມັກຟັງກັນ ແລະກໍຫວັງວ່າ ຫຼາຍທ່ານກໍເຊັ່ນກັນ ມັນນ້ຳສຽງຂອງນ້ອງຕ່າຍ…
ນ້ຳສຽງດີມີຄຸນນະພາບຂອງຕ່າຍ ກໍຄົງຈະເຮັດໃຫ້ຫຼາຍໆທ່ານທີ່ມັກຮັກເພງລາວຫຼາຍຂຶ້ນ ຊຶ່ງກໍມີຫຼາກຫຼາຍໃຫ້ເລືອກ ຈັ່ງໃດ ກໍຂໍໃຫ້ສະໜັບສະໜຸນຊ່ອຍສົ່ງເສີມເພງລາວ ໃຫ້ຢູ່ຄູ່ກັບຄົນລາວຕະຫຼອດໄປ. ອັນດັບຕໍ່ໄປຂໍແນະນຳຜົນງານເພງມ່ວນໆຂອງສິນລະປິນ ທີ່ໃສ່ຊື່ວ່າ The Final ໃນບົດເພງ ທຸກລົມຫາຍໃຈ ສິນລະປິນສາວນ້ອຍຄົນນີ້ ແມ່ນກຳລັງມາແຮງ ແລະເປັນທີ່ນິຍົມໃນໝູ່ໄວລຸ່ນ…ເອົາໄປຟັງເພງມ່ວນໆ ແບບສະບາຍໆພ້ອມໆກັນເລີຍ.
ສ່ວນເພງສຸດທ້າຍນີ້ ເປັນເພງທີ່ຟັງແລ້ວສະບາຍໃຈ ມ່ວນຫູທັງທຳນອງແລະ ສຽງຮ້ອງ ເຖິງແມ່ນວ່າຈະບໍ່ເຂົ້າໃຈປານເລີຍກໍຕາມ ແຕ່ ໃນຂ້າງລຸ່ມວີດີໂອ ຂຽນວ່າ ເພງຄິດຮອດ ບ້ານນາ ຂັບຮ້ອງໂດຍສິນລະປິນລາວ-ມົ້ງ ນ້ອງ ແອນນາ ຢາງ. ເອື້ອຍວັນນະສອນ ກໍຕ້ອງ ຂໍລົບກວນທ່ານຜູ້ຟັງທີ່ຟັງພາສາມົ້ງອອກນັ້ນ ຢ່າລືມຂຽນມາບອກແດ່ ເດີ ວ່າຄວາມຈິງຂອງ ບົດເພງນີ້ ແມ່ນມີຄວາມໝາຍດັ່ງທີ່ຂຽນໄວ້ຫຼືບໍ່ ແຕ່ຖ້າຟັງຈາກນ້ຳສຽງແລ້ວແມ່ນວ່າ ເສົ້າ ຄິດຮອດບ້ານນາ ແທ້ໆໂອ. ພົບກັນໃໝ່ໃນສັບປະດາໜ້າ.
